Laban Shani Na Mungga - Pranwan Ladaw (26), C, 2022 Lu lu ai lam gaw dingbai dingna jaw chye ai

Pranwan Ladaw (26), C, 2022

Lu lu ai lam gaw dingbai dingna jaw chye ai

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (26) ngu na laban rai nga ai.

Sutgan arung arung arai hpe n tara ai hku madu la ai gaw tinang hkum hpe jahten la ai tai nga ai.

Hkristan ni gaw mungkan sutgan lu su ai lam hta grau ai wenyi sutgan lu su na hpe madung da shakut ra ai.

Lu su sutgan hpe tara ai hku n jai lang yang shinggyim wuhpung wuhpawng hpe jahten ai tai na

Myihtoi Amos laika hpe “shinggyim tara rapra ai myihtoi laika” ngu shamying mai ga ai. Lai wa sai laban hta na lu saga ai hte maren, Yuda myusha rai nga tim, Isarel mungdan hta lu su nga mai ai Samari masha ni hpe shadum sadi jaw na matu Karai Kasang shangun dat ai.

Dai ten, matsan ai ni kaw na amyat htuk nna lu su wa ai ni law ma ai hte n hkru ai lam ni law wa ai ten rai nga ai. N tara ai, n hkru ai lam ni hte seng nna Myihtoi ni jahkring hkring sadi jaw lai wa ma ai. Raitim lak lai shai ai lam hpa n nga lai wa ai.

Lu su ai ni gaw shanhte a mungkan sut arai ni hte shakawng ma ai; tam la yak ai manu dan arung arai ni, nhprang sut rai ni hte dum nta ni hpe shatsawm ma ai. daini prat na, Affrican dan hte India mungdan ni hta magwi kawng hte galaw shachyaw da ai yupku zawn re ai, kaga nta arung arai ni hpe mung dai hku shatsawm ma ai.

Mu tsawm manu dan grau ai lusha ni hte sabyi kaja lu sha poi ni galaw nna aten shama lai wa ma ai. Hpang jahtum gaw, lu lai, sha lai, ladu lai pyaw shalai nna asak kadun, prat hpe jahtum si mat ra ma ai.

Lu su ai Samari masha ni gaw shanhte a sut rai ni hte shimlam lu la na re ngu hkam la lai wa ma ai. Karai Kasang hte matsan mayan ni hpe myit n shang sha ma ai, n sumru masai rai nga ai.

Shanhte pyaw ten gaw wan hkut zawn chyahkring sha rai nga ai. Shaning kade nna yang, Myihtoi Amos shadum sadi jaw da ai hpe n hkan ma ai majaw shanhte a mare hte mungdan jahten kau hkrum lai wa ma ai. Madu da sut rai ni hte shimlum lam lu sai ngu myit htang da ma ai raitim, hpang jahtum gaw maigan hpyen ni a mayam prat de du mat ma ai.

Sut su ai Samari masha ni zawn sha Yuda myusha ni hte shanhte a mungdan hta mung byin lai wa ai rai nga ai. Samari mung daw jahte hkrum ai hpang shaning (20) hta Syria hkawhkam Sennacherib woi awn ai hpyen hpung wang da ai. Yuda hkawhkam Hezekia gaw Nawku Htingnu kata hte hkawhkam htingnu sut dum na ja, gumhpraw sut arai yawng hpe shagun ya nna Yerusalem mare kaba hpe hkye la ai rai nga ai (2Hk.Hk 18:13-16).

Yerusalem kaw na shagun dat ai ni hta magwi kawng hte galaw da ai yupku ni mung lawm nga ai hpe Sennacherib hkawhkam hkap mu ai rai nga ai.

Anhte na lu ai Amos a shadum sadi jaw ai hta lu su nga mai ai Samari masha ni hta shanhte arawng la jai lang ai mungkan sut arung arai ni rai nga ai gaw dan len nga ai.

Myihtoi Amos gaw ndai lam ni teng ai lam azin ayang tsun da nga ai. Tinang madu da sut arai hpe sha manu shadan kam shamyat nga nna, Karai Kasang hte matsan mayan ni hpe n chye, n mu jahpai hpai ai gaw myit n pyaw hpa shut kaba rai nga ai.

Mungkan sutgan arai gaw shinggyim myit hpe jahkring hkring jahten shangun ai

Yesu Madu gaw shinggyim myit hpe atsawm sha chye da wu ai. Yesu Madu a mungga hpe madat ai masha hpan lahkawng nga ai. (1) Yesu Madu a mungga hpe madat ai ni law malawng gaw bungli shakut ai raitim, n hkru n kat ai, matsan ai ni rai nna dai ni gaw dinghpring dingman ai ni rai ma ai. (2) wuhpawng langai gaw Pharisee ni zawn re ai ni rai nga ai. Shanhte gaw law malawng lu su ai ni rai nna, Karai Kasang a chyeju a majaw mung, Mawshe tara kata lam yawng hpe hkan shatup ai majaw mung lu su ai ni rai ma ai ngu myit la mai ai. Matsan ai ni gaw shanhte zawn n hkan shatup ai majaw matsan ma ai rai nga ai ngu hkam la ai ni rai nga ai.

Yesu Madu ndai laban na ga shadawn hte dai zawn re ai ni hpe jahprak da ai rai nga ai. Ga shadawn a yaw shada lam gaw n tara ai hku lu su ai ni hpe jahprak nna, dinghpring dingman ai a majaw matsan ai ni hpe shalan shabran, n-gun jaw na matu rai nga ai.

“Kalang mi na sahti wa langai mi nga ai. Shi gaw, hpu ging dik ai, hpun palawng bu hpun nna shani shagu pyaw pyaw ning ngai nga ai” (Lk 16:19).

Shi gaw tingkyen myit kaba ai rai nna gawng ba rai dum myit kaba wa ai. Shi lu su ai hpe madun na matu Egypt mungdan kaw na shang wa ai manu dan bu hpun palawng ni hpe sha bu hpun ai. Amos tsun ai sahti ni zawn tinang kan hpe karai shadu nna, hkam la nna shani shagu paw daw kadaw lu lai sha lai poi galaw lai wa ai. Karai Kasang hte nihtep ai matsan mayan ni hpe n myit n nawn ai. Shi a matu chyu sha myit ai. Shi a sut rai ni gaw shi hpe pyaw hpa lam jaw ai ngu hkam la nna dai hte hpring tsup sai shadu lai wa ai.

“Hkum ting kahpaw hpye ai, Lazaru mying ai matsan masha langai mi mung shi a shaku makau kaw nga nga ai” (Lk 16:20).

Dai wa gaw matsan mayan rai nna lu na sha na n lu ai sha n-ga, hkum ting mung ahpye alam rai nga ai; Gwi ni gaw shi a nma ni hpe sa mata ma ai.

“Shaloi dai matsan wa si mat wa nna, lamu kasa ni shi hpe sumsing lamu na lusha poi hta Abraham a makau e dung nga na matu woi bang da mu ai” (Lk 16:20).

Ndai ga shadawn hpe na la ai ni yawng gaw Lazaru hpe matsan dum ma ai. Yesu Madu gaw dai ga shadawn hte sumsing mungdan hte ngarai mung lam tsun dan da ai rai nga ai.

Yesu Madu jaw mayu ai sharin shaga lam gaw asan sha rai nga ai. Karai Kasang gaw lu su ai ni hpe n tsaw ra ai n rai. Matsan ai mung Karai Kasang shanhte hpe n tsaw ra ai majaw n rai nga ai.

Mungkan sut rai hte pyaw hpa lam hpe sha myit manoi ai ni gaw hpang jahtum hta mau hpa hkrit tsan lam hte hkrum katut na chyalu rai nga ai.

Ga shadawn hta na kahpu kanau marai manga a lam

Sihti wa si mat nna ngarai mung de du mat ai. Abraham hpe hpyi shawn ai lam langai galaw ai. Lazaru hpe shangun dat nna shi a kahpu kanau marai manga hpe shadum ya matu hpyi shawn ai. Shi zawn gawng ba rai dum myit n tawn na matu tsun shagun ai rai nga ai. Shanhte mung si mat ai sahti wa hte maren sha rai na masa hta nga ai.

“” (Lk 16:29).

Ndai chyum daw gaw sahti wa hpe htai ya ai mahtai rai nga ai. Chyum laika hte maren, nihtep ai ni hpe gara hku garum na lam asan sha chye na lu ga ai.

Si mat sai wa bai htang tsun dan ai rai yang mungkan ntsa naw nga ai ni hkap la na re ngu si mat sai sahti wa myit ai lam gaw shut ai myit la hkam la lam rai nga ai.

Shanhte hte Mawshe a tara nga ai. Dai hpe pyi n hkan shatup yang gaw si ai wa bai htang tsun dan ai hpe hkap la na gaw n mai byin ai.

Pharishe ni gaw Madu Yesu a lam  ga shaka dingsa prat na ji woi ji wa ni tau nau tsun shana da ai hpe n hkap la ma ai. Madu Yesu bai hkrung rawt ai hpang dai shi a sharin shaga ai lam ni hpe shagrin na ra ai. Dai shaloi raitim, Pharicee ni a myit rawng ai ni gaw matut ninghkap na sha rai ma ai.

Gawng ba, rai dum myit kaba nna, matsan mayan ni hpe n mu jahpai hpai ai hta grau ai dingbai dingna gaw n nga na sai.

Matsan mayan ni hpe n gawn n sawn di ai majaw sumsing mungdan hpe jasum kau na rai ga ai.

Lazaru sumsing mungdan shang ning ngai lu ai gaw hpyi sha ai mawhpyi re ai majaw n rai nga ai. Matsan ai raitim Karai Kasang hpe kam hpa kam shamyat ai majaw sumsing mungdan du ai she rai nga ai.

Lu su ai lam gaw shinggyim masha hpe tingkyen myit hpe loi loi hte byin shangun nna tinang hkum hpe chyu kam hpa myit rawng shangun ai. Matsan ai lam chyawm gaw myit galu kaba hkam sharang, tinang a wudang hpai nna sadi dung ai Karai Kasang hpe kam hpa kam shamyiat ma ai.

Hkristan shagu gaw Hkristu ladawn ya ai wenyi sutgan su na hpe, kaga lam ni hta grau nna n-gun dat ra ai

Chyum daw lahkawng gaw San Pawlu Roma hkyuk htawng hta rawng nga ten, Timothy hpang de shagun dat ai laika rai nga ai. Ephesu mare na Hkristan ni sara shaje ni a lam woi shadam hkrum nna jam jau nga ten ka ai laika rai nga ai.

San seng san pra ai hku nga na lam, tsaw ra matsan dum myit tawn na lam, hte sagu rem langai hku nna myit galu kaba hkam sharang na lam sharin shaga ai laika rai nga ai.

San Timothy gaw San Pawlu zawn kashin kamun hkam la ai hpang nawku hpung a ningbaw hpa-awn tang ngut ai hpang Hkristu hpe kam sham ai sakse tai wa ai.

Mungkan sut su ai lam hta n re ai, sumsing sut su ai myit mada lam tawn da na matu Karai Kasang hpe kam hpa ra ai lam rai nga ai.

“Mai kaja ai galaw na matu mung, mai kaja ai bungli ni hta sut su na matu mung, masha kaga ni hpe karan kachyan jaw jahproi ai lam hta mung, n daw n hta jaw ya na matu jin jin rai nga mu ga shanhte hpe sharin shaga nga u. Ndai hku nna shanhte gaw hpang na prat a matu ngang kang ai npawt nhpang tai nga u ga, hpu ging ai sutgan shanhte mahkawng da lu nna teng man ai asak hkrung lam majing hpe lu la na mara ai” (1Tim 6:17-19).

Akyu hpyi saga

Wa Karai Kasang e, tinang hta grau ra kadawn nga ai ni hte matsan mayan ni hpe garum shingtau chye ai myit masin anhte hta jaw bang ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Pranwan Ladaw hta (26) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – Amos 6:1,3-7

Chyum Mungga Daw (2) – 1Tim 6:11-16

Kabu Gara Shiga – Lk 16:19-31

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.