Laban Shani Na Mungga -Karai Kasang hpe hkap tau hkalum ai rai yang hkye hkrang la hkrum na( Pranwan Ladaw 31 )

Pranwan Ladaw (31), C, 2022

Karai Kasang hpe hkap tau hkalum ai rai yang hkye hkrang la hkrum na

Zacchaeus a lam

Lai wa sai laban hta gaw kang hta ai wa langai a lam hpe na lu saga ai. Lai wa sai laban na kang hta ai wa gaw Madu Yesu a ga shadawn kaw na masha sha rai nga ai. Ndai laban na lu ai kang hta ai wa gaw kaja teng ai masha rai nga ai.

Chyum Laika Sara San Luka gaw Zacchaeus a lam tsun dan ai a marang e, Yesu Madu gaw, mara lu ai ni hpe, shi hpang de, hpu nau wa hku, n myit mada ai ladat hte, si mani ai hku saw shaga nga ai lam, anhte hpe tsun dan ai rai nga ai.

Zacchaeus mying ai wa (Lk 19:1)

Lai wa sai laban hta, Roma Asuya ni a ahkun hkanse hta ai ladat hte seng nna tsun lai wa saga ai. Lit shatsam da hkrum ai lit hkam kang hta ai wa gaw, shawa masha ni kaw na ahkun hkanse hkan hta shinggyim la na matu shingdep shingtau kang hta ai ni hpe shatsam jat da ai.

Shingdep shingtau kang hta ai ni gaw Asuya kaw na msat da ai ahkun hkanse hta grau law htam ai hku, shawa masha ni kaw na hta shinggyim la lu ai made hta shinggyim la nna, masat da ai hte hpe sha dai lit hkam kang hta wa hpe bai ap jaw ma ai. Ngam jan ai hte yawng hpe gaw shanhte ni a matu shatai la ma ai.

Zacchaeus gaw Roma Asuya e lit shatsam da hkrum ai lit hkam kang hta ai wa rai nga ai. Kang hta ai bungli hpe masha hkum shagu galaw mayu ai gaw rai ma ai. Myit n rawng ai, law hpa myit kaba ai ni a matu amyat law law lu ai majaw rai nga ai.

Kang hta ai Zacchaeus gaw, San Luka tsun ai hte maren, lu su ai wa rai nga ai (Lk 19:2). Shi a mying ‘Zacchaeus’ a lachyum gaw, myit san seng ai, dingman dinghpring ai, ngu ai lachyum rai nga ai. Mying hte shi hta byin ai lam htihtang rai taw nga ai zawn rai nga ai. Kang hta ai ni hpe ‘mara lu ai ni’ ngu shaga shamying ma ai. San Luka tsun ai mung jaw ang nga ai.

Shi gaw Yesu ngu ai wa kadai re ai hpe mu la mayu ai (Lk 19:3)

Yesu hpe mu hkrum mayu ai hpe masam maram yu yang Zacchaeus gaw, n ra ai kaw hkan chya pa lawm, chye mayu ai myit rawng ai wa rai na masa hta nga ai. Shi hpe, San Luka gaw, pyaw pyaw nga chye ai wa, mungkan sut rai hkum tsup ai rai nna manghkang n nga ai wa ngu tsun da ai. Nta masha langai ngai machyi ai majaw Yesu hpe saw shaga ai mung rai na re ngu, chyum laika sawk sagawn ai ni masam maram da ma ai.

Shi gaw Yesu hpe mu hkrum nna, Shi a lam chye la lu na hpe gaw n shadu lai wa na re. Shi gaw, Yesu ngu ai wa kadai re ai hpe sha chye mayu lai wa ai. Raitim, Yesu hte mu hkrum ai shaloi, Karai Kasang kadai re ai hpe chye la lu ai.

“Shi gaw hkum kaji kadun ai rai nga ai; Dai majaw, Yesu hpe mu lu hkra shawa masha ni a shawng e gat lai nna, Yesu Lai sa wa na lam makau na lakum hpun hta lung dung nga ai” (Lk 19:3-4)

Shi gaw Yesu hpe mu mayu la ai majaw, shawng de kalang pyi n galaw yu ai, hpun ntsa lung ai lam galaw lai wa ai. Shi zawn arawng aya kaba ai magam gun langai, ma kasha zawn hpun ntsa lung lai wa ai. Hpun lap ni lapran kaw na Yesu hpe mu taw nga sai.

Yesu hpe mu ai shaloi shi a myi gaw kaga de myit n lawm mat sai. Yesu hpe sha azi yu nga ai. Shi Yesu hpe maram nga yang Yesu gaw shi a lam azing ayang mu chye la na hpe gaw myit n nawn kau dat ai.

“Yesu dai shara de du yang, shi dap mada yu ai” (Lk 19:5).

Shi shangai wa ai ten kaw nna nan Yesu Madu shi hpe yu  taw nga sai rai nna shi hpe tam nga sai rai nga ai. Ndai hkrum zup lu ai gaw ang katut n rai nga ai. Yesu Madu tau nau hkyen lajang da sai rai nga ai.

“Zacchaeus e, alawan yu wa rit” (Lk 19:5).

Kalang pyi n hkrum yu ai wa, shi a mying hpe shaga ai hpe na lu ai shaloi Zaccaeus gade ram mau na hpe myit lu na ma ai. Shi a lam Yesu Madu hpe kadai tsun dan ai kun, ngu myit nga na re.

Myihtoi Isaiah, Yeremiah, hte San Pawlu ni zawn “kanu a hkritung kaw nna nye a mying hpe chye da, matsing da sahka” ngu myit yang myit la na nhten (Is 46:1; Yer 1:4; Gal 1:15).

Yesu Madu gaw Zacchaeus a masin salum hpe akawk hpaw nna shi amying shaga lai wa sai rai nga ai. Zacchaeus mahtang, shi sut masa lam hta lup dau nga ai majaw Yesu shaga lai wa ai hpe na lu na lam pat shing dang hkrum ai rai nga ai.

“Alawan yu wa rit, dai ni ngai na nta e hkring manam na nngai” (Lk 19:5).

Lawan galaw u, aten n nga sai, nang gaw aten kadun laman hkye hkrang la hkrum lu na n rai, na nta kaw ngai shang manam na, na a masin salum hpe ngai madu ai nta shatai nna galoi mung nga nga na, ngu Madu tsun ai rai nga ai.

Shi kalang pyi n hkam sha yu ai kabu pyaw lam hte hpring kabrat wa ai rai nna hting hkang da n lu rai nga ai. Shawng de, ja, gumhpraw, sut rai ni gaw shi a matu madung ahkyak rai lai wa tim, Yesu Madu hte mu hkrum ai shaloi, dai ni gaw akyu n rawng mat sai. Shi a shawng kaw du nga ai Sara Yesu (Rabbi) mahtang shi a matu ahkyak dik htum rai wa sai. Kaga hpa lam mung shi a matu ahkyak n rai mat sai.

“Dai hpe mu ai masha ni yawng gaw, ndai masha wa gaw yubak mara kap ai wa langai mi a nta hta shang manam sai, nga nna aput angun nga ma ai” (Lk 19:7).

Shanhte yawng gaw Yesu Madu hpe mara shagun, dinglun ma ai. Dai ni gaw Madu Yesu a mara dat hkyam sa garai n hkam la lu shi ai ni naw rai na ma ai.

Kang hta ai wa Mahte gaw aput apai n re ai, sharung shayawt ai wa n re ai gaw teng sha rai nga ai.

Yubak mara lu ai wa a nta kaw shang manang ai gaw, dai ten na masha ni galaw ai lai hte nhtan shai nga ai.

Yesu Madu hta gaw dai zawn galaw na ladat nga nga ai. Mat mat ai masha, mara lu ai masha hpe hkan tam nna hkye la ra ai.

Yesu Madu a yaw shada lam hte lai ladat ni hpe, aten na wa ai hte maren, shanhte ni chye na wa ma ai.

“Zacchaeus gaw rawt tsap jan rai nna” (Lk 19:8).

Ndai wa gaw loi ra ai wa rai sam ai, ngu shi hpe masha ni tsun ai hpe Zacchaeus ahkyak n la lai wa ai. Shanhte mung shi zawn Yesu Madu hpe hkrum katut nna hkam sha chye ai rai yang shanhte myit mang ai lam ni galai shai wa na ma ai rai nga ai.

“Zacchaeus gaw rawt tsap nna, Madu e, nye a sut rai ka-ang hkup matsan mayan ni hpe ngai garan jaw na we ai; bai langai ngai hpe ngai mawp sha kau ai rai yang gaw, htam mali ngai bai wa na we ai, ngu nna Madu hpe tsun wu ai” (Lk 19:8).

Je ai gumhpraw kasha pyi jaw n ja ai wa, matsan ai ni hpe mawp sha na chyu myit ai wa, Madu Yesu hte hkrum ai hpang gaw, shi a sut su ai arung arai matsan ai ni hte shi mawp sha da ai hkrum ai ni hpe bai garan jaw nu ai.

Tara hte maren nga yang, mawp la nna lu ai arai ni hte rau dai arai a htam manga hta na htam mi hpe mung jat jaw ra ai rai nga ai (၀တ် Prumat 5:24; တော Jaw Jau 5:7). Zacchaeus gaw htam manga kaw na htam mali n re ai sha, dai hta grau ai, htam mali bai jaw lai wa ai rai nga ai.

“Daini ndai nta hta hkye hkrang la ai lam pru sai” (Lk 19:9).

Hkye hkrang la lam hpe masha kaga langai ngai hku galaw ai n re ai sha, hkye la Madu hkum nan hkye hkrang la lam hpe gun sa ai rai nga ai.

Zaccheus gaw tsun dan n ma, mau hpa kabu pyaw lai wa ai. Yesu mahtang grau kabu lai wa ai. Mara lu ai masha langai hpe hkye hkrang la lam ntsa atsawm sha bai woi da lu ai hpe dum chye wu ai. Yesu Madu gaw dai hkye hkrang la lam ntsa du wa ai ni a ra kadawn ai hpe mung matut jahkum jaw ya ai.

Karai Kasang, anhte hpe hkye hkrang la na matu, hpa rai atsam kaba dat ai rai

Ndai ga san a mahtai hpe, ndai laban na chyum daw langai “Wisdom of Solomon” hte htai lu nga ai. “Solomon Hkawhkam A Hpaji Byen-ya Laika” rai nga ai. Ndai Chyum Laika buk hpe Hpu nau Hkristan nkau ni n hkap la ma ai. Kahtawlik Nawku Hpung gaw, moi hpu nau Hkristan ni n karan mat shi ai ten kaw nna nan hkap la da sai rai ga ai.

Mungkan ga hpe Karai Kasang hte shingdaw ga nga yang, jahpawt manap e ga ntsa hkrat ai numri kahtawk mi daram sha rai nga ai (Solomon a Hpaji Byen-ya 11:22).

Karai Kasang gaw kaji htum ai hpan magam hpe raitim, tsaw ra myit kaba ai hpung dagu hte hpan da ai re majaw grai manu shadan ai.

Karai Kasang gaw hpang da hkrum nga yawng nga pra hpe sharawng awng ai rai nna n hten n mat hkra galoi mung anga nga shangun mayu ai.

Karai Kasang a tsawra myit gaw sak rawng ai ni a ntsa grau ai gaw teng sha rai nga ai. Shi sharawng awng ai gaw si hkrung si htan lam hta n re ai; sak hkrung nga lu ga ai ni hpe sharawng awng ai.

Shinggyim masha hte seng ai hta, Karai Kasang a tsaw ra myit gaw htum ngu n nga ai. Shinggyim masha ni, mara galaw nna, Karai Kasang hpe ninghkap ai raitim, shanhte hpe tsaw ra dingyang rai nga ai. Shinggyim masha ni gaw manu dan la ai rai nna, hten run ai mat n mai ai. Dai majaw, Kara Kasang gaw, shinggyim masha ni hpe, lam amyu myu, ladat amyu myu hte, shi hpang de bai shaga la ai re lam, Solomon Hkawhkam a Hpaji Byen-ya Laika hta tsun da nga ai.

“” (Hpaji Byen-ya 12:2).

Zacchaeus hte Madu Yesu hkrum ai mabyin gaw, Karai Kasang gaw, hkrat sum taw nga ai shinggyim masha ni hpe gade daram tsaw ra ai hpe shadan shadawng da ai.

Anhte masha hkum shagu hpe hkye hkrang la na, Karai Kasang hpang jahtum ten du hkra atsam dat shakut ai sakse nan rai nga ai.

Mat mat ai masha ni hpe tam la nna hkye hkrang la na matu du sa ai Madu rai nga ai (Lk 19:10).

Karai Kasang anhte hpe mara dat hkyam sa ya ai gaw n htum n wai mat ai shi a matsan dum tsawra myit a majaw rai nga ai. Shinggyim masha ni hpe hkye hkrang la na matu kaba la ai tsawra myit hpe arang kaba bang da ai rai nga ai.

Karai Kasang gaw, anhte hkye hkrang la hkrum na hpe hkum tsup ai hku shangut shakre da ya na ra ai

Anhte hkam sha yu sai mahkrum madup hte maren nga yang, Karai Kasang a matsan dum tsaw ra ai hpe, hpang prat hta mung myit um-ang hpa n nga ai.

Hkye hkrang la lam hpe nnan hpang ai Karai Kasang gaw dai hpe hpang jahtum du hkra galaw na rai nga ai. Madu Hkristu hta kam sham ai a majaw, anhte a gawng kya ai lam ni hpe hpan da hkrum shaloi na zawn re ai chyeju hkum tsup hkra bai jaw bang ya na rai nga ai. Ndai gaw, San Pawlu Htesaloni ni kaw shagun dat ai laika lahkawng hta lam matsun sharin shaga da ai rai nga ai.

San Pawlu a shagun laika lahhawng gaw Ga Shaka Ningnan Chyum Laika ni hta shawng ningnan na chyum laika ni rai ma ai.

Thesaloni na Hkristan ni gaw, Madu Yesu bai kalang du sa na lam hte seng nna gade nna yang dik wa sana ra ai ngu myit kam nga ma ai. San Pawlu hkum nan dai zawn hkaw tsun ai ngu ai shiga shadam pru lai wa yu ai. Shanhte gaw mungkan lam hte seng nna myit n lawm mat ma ai majaw bungli nan n galaw mat masai rai nga ai.

Ndai masa hta rai nga ai Hkristan ni hpe San Pawlu hpaji jaw lam matsun lai wa ai.

Shiga shadam a majaw myit hkum bra nga mu; magam bungli ni hpe hkum jahkring da mu; yi ngam magam hpe matut galaw mu; kun dinghku masha ni hpe mung hkum kau da, hkum kabai da mu; Kaja htum Karai Kasang du sa na hpe myit mada ala dingda nga ai ngu ai gaw tinang a lit magam ni hpe lit la gun hpai ai lam rai nga ai, ngu San Pawlu hpaji jaw lam matsun ai rai nga ai.

Matut nna shanhte hpe matsun ai. San seng chyoi pra jat wa na lam tam mu; dai zawn hkawm sa ai rai yang, Hkristu gaw nanhte a hkye hkrang la lam hpe hkum tsup, byin shangun na ra ai, ngu hpaji jaw shadum let shanhte a matu akyu hpyi ya nga na lam San Pawlu ga sadi jaw da ai.

Hkristan ni a hkye hkrang la hkrum na lam gaw shanhte hte Hkristu a matu hpung shingkang kaba rai nga ai. Myit tsang shara n mai nga ai.

San Pawlu Htesaloni ni hpe lam matsun ai gaw anhte yawng a matu mung rai nga ai. Anhte a hkye hkrang la lam hte seng nna myit tsang, hkam sha nga ra ga ai. Gade n na yang du wa sana. Yesu Madu gaw, anhte si wa ai shaloi, sumsing mundan hta hkap tau hkalum la nna, masha hkum shagu hpe “daini na a nta hta hkye hkrang la lam du nu ai, nang lawt lu sai, htani htana shanglawt lu na ra ai” ngu anhte hpe tsun na ra ai.

Akyu hpyi saga

Wa Karai Kasang e, anhte hkum nan hkye hkrang la hkrum na hte seng nna myit tsang pu ba nga ga ai hpe hkam jan hkam sharang lu na atsam jaw bang ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Pranwan Ladaw hta (31) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – Wisdom of Solomon Hpaji Ningli 11:22-1:2

Chyum Mungga Daw (2) – 2Thes 1:11-2:2

Kabu Gara Shiga – Lk 19:1-10

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.