Karai Kasang A Mungga - Pran Wan Ladaw 27 ၊ (Chyum Laika Laban) 2019

Chyum Laika

Mihtoi Habakok 1:2-3; 2:2-4, 2 Timoti 1:6-9, 13-14, Luka 17:5-10  

 

Tsawra ai nu wa hpu nau ni, ndai lai wa sai September 30 ya shani gaw San Pra ai Jerome a poi nhtoi rai nga ai. San pra ai Jerome gaw Chyum laika hpe Latin ga hku ka kale da ya ai wa, Chyum laika a lachym ni hpe sang lang ya ai laika buk ni law law hpe ka shapraw da ai, chyum laika ning hkring ni yawng hpe makawp maga ai san pra ai wa rai nga ai. Dai re majaw, lai wa sai bat Sept 30 ya shani hta sha, Wa sarabyin Francis kaw nna ya du wa na shaning kaw nna Pranwan ladaw hta 3 ngu na laban hpe “Karai kasang a mungga laban” ngu nna masat galaw na matu nawku hpung tinag hpe ndau shana dat sai rai nga ai. Ndai San pra ai Jerome a poi nhtoi hpang jang na laban hpe Chyum laika laban ngu nna masat galaw na matu anhte Myanmar mungdan Kahtawli saradaw hpung rapdaw kaw nna masat ndau matsun da ai lam mung nga nga ai. Dai re ai majaw hpawt ni na laban gaw Chyum laika laban nhtoi rai nga ai.

Ndai chyum laika laban nhtoi shani hta, jau gin wang shagu hkan chyum laika hte seng ai lamang ni galaw na matu mung saradaw ni kaw nna matsun da nga ai. Anhte galaw lu mai ai chyum laika hta seng ai lamang ni hta, Chyum laika hte seng nna hkaw matsun ai lam, Chyum laika gam garan ai lam, Chyum laika hta na mau mwi kadun ni hpe hkai dan ai, hkrang shala galaw ai lam ni, chyum laika kadun kadaw ni hpe hti matsing la nna tsun shing jawng ai lamang zawn re ai ni hpe anhte jau ginwang mare kahtawng nawku jawng ni hkan galaw mai nga ai.

Tsawra ai Nu wa hpu nau ni, Chyum laika laban hpe anhte masat galaw nga ga ai aten, hkye hkrang la ai de du lu na matu asak hkrung ai mungga rai nga ai ja chyum mungga hpe jaw ya ai majaw karai kasang hpe anhte chyeju dum mai nga ga ai. Bai ndai Karai kasang a mungga hpe htim sum ru lu na matu, anhte a buga hta chyum laika hpe ndut ndang lu la mai ai, tinang a myu sha ga hte hti lu ai chyeju ni lu nga ga ai majaw mung karai kasang hpe chyeju dum mai nga ga ai.  Hpa majaw nga yang, buga shara nkau mi hkan, Chyum laika hpe wang lu wang lang hpai lang na ahkang nlu ai, hkrit maja ra ai shar ani nga nga ai, nkau myu sha ni bai rai yang gaw, hti mayu tim tinang chye na ai tinang a myu sha ga hte ka kale da ai chyum laika nnga ai, nkau mi bai yang gaw grai hti mayu ai raitim ja gum hpraw nlu matsan ai lam a majaw chyum laika nlu mari lang ai, nkau mi bai rai gaw grai hti mayu, chye na mayu ai rai tim, laika nchye ai majaw nhti lu ai, ndai zawn re ai masa ni buga shara nkau ni hta nga nga ai. Raitimmung anhte a buga hta gaw chyum laika hpe wang lu wang lang mari tam la mai ai, nhkrit ntsang hpang hkawm lu mai ai, tinang chye na ai myu sha ga hte ka kale da ai chyum laika ni lu ai, anhte nlu mmari lang na daram mung chyum laika buk ni manu nhpu ai, ndai zawn re ai chyeju ni anhte hkam la lu nga ga ai hpe myit dum nna karai kasang hpe chyeju dum mai nga ga ai.  

Anhte a prat hta ru ai yak ai lam ni hpe hkrum kadup wa ga ai aten, chyum laika ni hpe hti sum ru nna, dai ru ai yak ai lam ni a lapran kaja ai mahtai ni shaw la chye na matu ndai bat na ja chyum mungga ni hte, nawku hpung anhte hpa shadum n-gun jaw ya nga ai.

Langai ngu na ndai bat na ja chyum mungga rai nga ai myi htoi Habakok a myi htoi laika hta, jam jau hkrum nga ai majaw myi htoi Habakok karai kasang hpe aput ngun nga ai lam mu lu na ga ai. Myi htoi wa tsun ai hta “Karai kasang e, nang nmadat ya ai, ngai gaten du hkra hpyi jahtan na rai ta, kashun kashe hkrum ai majaw ngai nang hpe marawn jahtau tim mung, nang garum la ai nrai, nang hpa majaw nshawp nkap ai amu ngai hpe madun dan nna myit magaw ai lam mu shangun nga nta, hten bya ai hte kashun kashe, nye a man e rai nga nna ndang kalang hkat ai hte ga law ga la ai law htam nga ai” nga nna myi htoi wa tsun ai hpe Habakok laika 1:2-3 hta mu lu na ga ai. Karai kasang a mung ga hpe ka jahkrat da na matu myi htoi wa hpe karai kasang matsun ai. Habakok 2:2-3 hta “shing ran ga hpe ka da u, hti ai wa gaw gat let hti lu hkra dai hpe lung pa hta dan dan pra pra ka da u, kaning rai nme law ndai shingran gaw, ndat da ai aten hte seng nna dik wa na matu, lawm nga ai hte, masu na nrai, ala nga u dai gaw teng teng du na ra ai, hpang hkrat na nrai” nga ai. Lachyum gaw, ngai hta kam hpa nga u, ngai jaw da ai ga sadi hpe ngai lale kau na nrai, dai ga ni dik wa na matu ala nga ai laman hta ru ai yak ai lam ni hkrum lu mai ai, raitimmung ngai ndat da ai ga ni kaman lila tai mat na nrai shi a aten hta, teng sha dik wa na ra ai, nanhte myit mada da ai hta grau law ai masa hte dik wa na ra ai ngu nna, myi htoi wa hpe karai kasng tsun ai lam rai nga ai.

Lahkawng ngu na kasa Pawlu Timoty hpang de shagun dat ai laika hta mung, asak naw kaji ai Timoty hku nna sagu hpung masha ni hpe sagu rem hku nna woi awn ning baw ai lam hta myit ru ai yak ai lam ni hkrum hkra wa ai raitim myit daw ai lam ni nnga u ga matu kasa Pawlu htawng hta rawng nga ai aten laika hte ka nna n-gun jaw dat ai lam rai nga ai. Kasa Pawlu tsun ai hta, “karai kasang gaw hkrit chye ai myit anhte hpe njaw myi ai, n-gun lagaw rawng ai myit tsawra chye ai myit, si si nga chye ai myit she jaw mi ai, dai rai nna anhte a mdu a sakse hkam ai lam hta mung, shi a bawng dung ai nye a lam hta mung, nang kaya ai myit nrawng ai sha, karai kasang a n-gun lagaw rawng ai hte maren dai kabu gara ai shiga matu mara ru tsang ai rau hkrum nga ga” nga nna n-gun jaw dat ai rai nga ai.

Ndai bat na kabu gara ai shiga hta anhte na la ai lam gaw, Yerusalem mare de lung wa nga ai lam hta kasa ni hpe tsun sharin ai lam rai nga ai. Kade nna yang Yerusalem mare hta madu yesu nni nkri hkam la na aten du ni magang sai re ai majaw mung, shi madu a nni nkri lam ni hte seng nna kasa ni hpe asan sha tsun hpaw dan ai lam ni galaw wa ai, ndai lam ni a majaw kasa ni mau ai hte, myit ru hkrum nga ma ai mung rai nga ma ai, dai zawn re ai aten hta shada mara raw ya ra ai lam ni sharin shadum ya ai, mara raw ya ra ai ngu ai shaloi mung 70 e 7 lang ngu nna tsun ai, ndai lam ni gaw kasa ni a matu hkap la na hkan sa na grai yak ai lam ni chyu rai nga ma ai. Dai re ai majaw ndai bat anhte na la lai wa ai daw hta, kasa ni hku nna, madu e, anhte a kam sham ai myit shalaw ya mi ngu nna hpyi lajin wa ma ai rai nga ai. Dai shaloi madu yesu gaw, nanhte hta kam sham ai myit chying hkrang tum daram rawng myit yang gaw, ndai labri hpun hpe, hpu e ru hte nawng baw nna namukdara e sa tu nga u law, ngu nna tsun yang, nanhte a ga madat na ra ai, ngu nna htan ya lai wa ai rai nga ai. Lachyum gaw, gawng kya ai lam ni kasa ni hta nga nga ai raitim, shi madu hta kam sham ai makam masham hte, bungli kaba shanhte shachyen lu na ma ai, shing gyim masha a n-gun atsam gaw nhkum zup ai raitim, karai kasang hta kam sham kam hpa ai lam nga ai rai yang, dai shing gyim masha a gawng kya ai lam ni hpe karai kasang shadaw shangang ya na rai nga ai, ngu ai lachyum rai nga ai.

Madu yesu hta kam sham ai ngu ai lam gaw shi madu tsun sharin ai lam ni mahkra teng man ai lam ni re ngu ai lam hpe hkap la da ai lam san san sha nrai, makam masham ngu ai gaw shi a daw jau ai magam hta tut e sadi dung let hkan sa daw jau nga ai hte shi hta aten shagu tsep kawp kam hpa manoi manat nga ai lam rai nga ai. Madu yesu hta kam sham ai makam masham ngu ai gaw karai kasang jaw ya ai chyeju kum hpa rai nga ai majaw ngai lu la ging ai re ngu nna kadai ntsun lu mai nga ga ai, myit masin kaja ai ni mahkra hpe karai kasang jaw ya ai kumhpa rai nga ai. Anhte hta nga mai ai kaba dik ai sutgan mung ndai makam masham rai nga ai. Dai majaw, madu yesu hpe nlu madu da lu ai wa gaw matsan mayan dik ai lam re nga nna mung wa sarabyin Fracis tsun ai lam mung nga nga ai.

Makam masham gaw shagrit shanem ai myit masin salum hta bawng ring rawt jat kaba wa lu ai rai tim, gum rawng gum tawng ai lam gaw makam masham hpe jahten kau ya lu ai, gum rawng gum tawng ai lam gaw madu shatsam da ai magam bungli ni galaw ai lam ni ma hkra hpe mung shahten sharun kau ya lu nga ai. Anhte ding hta prat ngut mat wa ai hpang lu la na htani htana ngwi pyaw sim sa ai lam a nli tum gaw makam masham nan rai nga ai.

Dai re ai majaw tsawra ai nu wa hpu nau ni, anhte a prat hta kaning re ai ru ai yak ai lam ni hkrum hkra wa ai rai tim, hkyik hkam dik ai anhte a makam masham hpe njasum kau na matu sadi ra na ga ai, aten ladaw langai mi laman ru ai yak ai ngu ai lam ni hkrum lu mai ai raitim, karai kasang ndat da ai aten hta shi jaw da ai ga sadi ma hkra dik wa ai nhtoi teng sha du wa na rai nga ai.

Akyu hpyi saga: Wa karai kasang e, na a tsawra ai myit gaw anhte myit mada ra sharawng ai hta grau nna kaba la nga ai. Anhte a shut hpyit mara ni hpe raw kau ya nna na a simsa ai hta hkawm sa nga lu na matu garum ya rit, shingrai anhte hkye hkrang la ai hkrum lu u ga anhte hpe lam woi la ya nga rit anhte a madu hkritsu a marang e hpyi nem nga ga ai.

Mungga htawn ya ai : Wajau Bernard Dashi Tang Ji

Add new comment

2 + 0 =

Please wait while the page is loading

Karai Kasang A Mungga - Pran Wan Ladaw 27 ၊ (Chyum Laika Laban) 2019 | Radio Veritas Asia

Error

The website encountered an unexpected error. Please try again later.