Karai Kasang a Mungga - Chyoi Pra Ai Wenyi Yu Hkrat Wa Ai Laban

Chyoi Pra ai Wenyi yu hkrat wa ai poi, A, 2020

31 May 2020, laban shani na Mungga

 Hkristu hta tsawra ai,

Nu Wa Hpu Nau ni e, ndai laban gaw nawku daw jau  ladaw hta poi kaba langai mi rai nga ai “Chyoi Pra ai Wenyi yu hkrat wa ai poi” hpe galaw nga ga ai re. Nawku hpung labau hta Paska poi hte Chyoi Pra ai Wenyi yu hkrat wa ai poi hpe jau dik a ten kaw na nan galaw hpang wa ai poi lahkawng rai nga ai. Ndai poi lahkawng hpe ni htep ai hku galaw ai rai nna, ndai laban na Chyoi Pra ai Wenyi yu hkrat wa ai poi gaw nawku dau jau shaning na paska ladaw jahtum ai laban mung rai nga ai. Ndai poi galaw ai a marang e hkam la lu ai akyu chyeju kaba ni hpe chye da ra ga ai. “Pentecost” ngu ai gaw Greek ga rai nna, (50) lang na ngu ai lachyum pru ai lam chye lu ai. Yuda masha ni a matu Paska poi ngut ai hpang nhtoi (50) ya ngu lachym nga ai re da. anhte Hkristan ni a matu bai hkrungrawt ai hpang nhtoi (50) ya ngu lachyum pru nga ai. Yuda masha ni Karai Kasang a hkang da tara hte maren ahkyak dik ai poi kaba (3) hta na langai mi rai nga ai. Pru Mat ai Laika 23:14-17 kaw hti yu yang (1) March shata kaw na April shata lapran hta Paska poi ladaw (2) May shata kaw na June shata lapran hta (Pentecost) Chyoi Pra ai Wenyi yu hkrat wa ai poi ladaw (3) September shata kaw na October shata lapran hta

Ndai poi kaba (3) hpe hkrun lam hkawm poi ngu na mung shamying ma ai da. Hpa majaw nga yang, asak ram ai la sha ni gaw Yerusalem hte n’tsan ai nawku htingnu ni kaw nawku daw jau ai lamang ni hta sa lawm ra ma ai majaw re da. Akyu rawng dik ai poi gaw Paska poi raitim, (Pentecost) Chyoi Pra ai Wenyi yu hkrat wa ai poi shani gaw daini na la ai chyum mungga hta na zawn nawku daw jau poi sa lawm ai masha grai law ma ai da.

Karai Kasang gaw shinggyim masha hpe hkye la ai hta nawku daw jau poi ni hte matut manoi hkyen lajang ya ai a marang e shi a ningmu masa hpe chye na lu nga ai. Yuda masha ni Karai Kasng a hpung dagu hte Hparaw hkawhkam kaw na shanglawt lu ai hpe myit dum ai Paska poi hpe Yesu ndu sa shi a shaning law law kaw na nan galaw hpang wa ma ai. Raitim Karai Kasang gaw Paska aten hta Kasha Yesu asak apnawng nna, bai hkrungrawt na hpe shaning law law na ai kaw na nan tau nau hkyen da sai rai nga ai.

Hparaw hkawhkam kaw na Israela myusha ni shanglawt lu wa gaw Yesu Madu shi a nni nkri yubak hkam la nna si hkam ai a marang e nat sadan a mayam prat kaw na shinggyim masha ni hpe shalawt dat ai kumla masat dingsat hku Karai Kasang lajang da ya ai rai nga ai. Yuda masha ni a matu Pentecost poi hte bung ai lam bying lai wa ai lam nga nga ai. Karai Kasang gaw dai shani Chyoi Pra ai Wenyi hpe kasa ni a matu shangun dat nna, nawku hpung hpe asak jahkrung ya sai. Dai majaw Pentecost poi hpe “nawku hpung shangai nhtoi” ngu mung shamying ma ai. Karai Kasang gaw Wenyi hpe kasa ni a matu shangun dat ya na matu kaja dik htuk dik htum ai nhtoi kaga nnga sai. Pentecost poi shani Karai kasang hte Israela masha ni zaibru jang kaw ga shaka tawn ta masat htu da ma ai. Karai Kasang gaw Hkristu e shi a a sai hte shagring da sai ga shaka ningnan hpe gaw de da ai. Dai ga shaka hpe nan, Wenyi gaw kashing kamun chyeju kumla hku Hkristan masha shagu a masin salum hta shagring da ya nga ai. Pentecost poi gaw Karai Kasang Sinal bum ntsa hta tara kanu lam (10) hpe jaw da ai hpe Yuda masha ni myit dum galaw ai poi rai nga ai. Dai hpe “Karai Kasang a Tara Kanu lam shi” ngu hkungga lara di shamying ai re. Karai Kasang gaw pentecost poi nhtoi hpe lata shaang nna, Yesu Madu gaw de ai “Tsawra myit tara nnan” hpe ndau da nga ai. Dai tara gaw “Shada da tsaw ra nga mu. ngu nna Tara ningnan ngai nanhte hpe jaw made ai. Ngai nanhte hpe tsaw ra made ai zawn, nanhte mung shada da tsaw ra nga lu na rai myit dai.,” ngu ai rai nga ai.(Yawhan 13:34)

Karai Kasang a Tara Kanu lam (10) gaw Karai Kasang shi hkum nan, lungpa ntsa ka da ai re. Ya Tara ningnan hpe marai hkum shagu a masin salum hta Wenyi e ka bang da ai re ngu Myithtoi Ezakiel laika 36:27 hta myithtoi da nga ai. Hpang jahtum hta Yuda myusha ni gaw n-si naisi shu la dan la nna chyeju dum poi hpe Pentecost poi nhtoi hta galaw ma ai. Dai shani Karai Kasang gaw San Petru hkaw tsun da ai ga hte maren nawku hpung hta wenyi n-si naisi law law hpe dan la shu la ai. Dai zawn sha nawku hpung hta htum ngu nnga ai prat shagu hta dan la shu la nga na re. Anhte gaw masha hpe hkye la na matu Karai Kasang a ningmu hpe mau kabu let shakawn shagrau n’htum n’ma rai nga ai. Dai hpe grau chye na la na matu mung anhte ni hpe garum shingtau ya u ga shakawn kungdawn nga ra ga ai.

Daini na chyum daw langai kasa lai ka hta na shaw la ai Pentecost poi hta kasa ni a n-tsa yu hkrat wa ai hpe tsun dan da nga ai. Kabu gara shiga hpe San Yawhan laika hta na shaw la ai rai nna, Yesu Madu a bai hkrung rawt ai shana daw na mabying masa hpe tsun dan da ai.

Wenyi hpe shawng garan gachyan ya ai lam

Yesu Madu gaw si ai kaw na bai hkrung rawt ai hpang shawng ningnan kasa ni hte hkrum ai shaloi Wenyi hpe kasa ni hpe jaw ya ai. Lu su nna shawang myit hte jaw ya mayu ai wa gaw tinang a sutgan hpe garan kachyan ya mayu ai zawn Yesu gaw kasa ni hpe Wenyi hpe minute  mi second mi pyi n’hpang hkrat ai. Madu wudang n-tsa kaw noi nga ai shaloi Yuda masha ni sat kau n’lu ai Karai asak rai nga ai. Bai kasa ni hte masha yawng a matu shi a asai hte nawng jau ya ai chyeju sutgan rai nga ai. Yesu Madu gaw Wenyi chyeju kumhpa hte wenyi kaw na kumhpa ni hpe kasa ni yawng hpe la sa ya ai. Dai Kumhpa ni gaw (1) Mara dat hkyam sa ai lam. (2) Mara dat hkyam saa ai hte rau simsa lam (3) simsa lam kaw na ngwi pyaw ai lam ni rai nga ai.

(1) Mara dat hkyam sa ai kumhpa. Kashing Kamun jaw ai Yawhan Batistma tau nau hkaw tsun ai zawn, kasa ni hpe wenyi hte Yesu Madu kashing kamun jaw ai. (Lk 3:16) Bai, n-htoi gaw n-sin hpe hpaw malang kau ai zawn Wenyi gaw kasa ni a myit masin salum na mara ngu ai n-san n-seng ai maza hpe kashing shatsai kau ya ai. Shanhte ni kaga masha ni hpe mara n’raw dat ya shi yang tinang hkum nan a matu Yesu Madu jaw na rai nga ai mara dat hkyamsa lam hpe shawng hkam la lu na rai nga ai.

 (2) Mara dat hkyam saa ai hte simsa lam kumhpa. Simsa lam ngu tsun ai hta yu maya simsa lam hpan nre ai sha, Yesu Madu hkum nan hpang jahtum daw sha poi hta jaw da ai simsa lam she rai nga ai.

 (3) simsa lam kaw na ngwi pyaw kumhpa. Kasa ni kalang pyi n’hkam sha yu ai Yesu Madu a kabu pyaw ai lam hpe hkam sha ai rai nga ai. Yesu Madu gaw kasa ni myit mada da yu ai galai shai ai lam ni hku shawang tsawra myit kaba hte jaw ya da ai.

Pentecost poi nhtoi hta Wenyi chyeju jaw ya ai lam

San Luka a kabu gara shiga laika hta Yesu Madu gaw Pentecost poi shaloi tsun da ai zawn gara sharai kaw na mung paw wa ai nre; sumsing lamu de na nseng hpe na lu ai hku nre; Karai Kasang a ga nseng hpe wan shinglet hte shadan dan ai rai nga ai. Kasa ni mung wenyi a akyu pru ai lam hpe yawng mu lu hkam sha lu ma ai. San Petru a hkaw tsun ai mungga hta hpaji nchye ai sha karai hpaji ninghkring kaba zawn tengman jaw hkrak ai lam nga ai hpe mau hpa mu lu nga ai. Kasa ni gaw Hkristu a bai hkrungrawt ai lam hpe makoi magap da ai lam nnga ai sha, bau dum shana shabra na myit rawt nga ma ai. Shanhte a tsun shapraw dan mayu gwi ai myit marai hpe mau hpa mu lu nga ai. Shanhte gaw de a shawng hta gaw hkrit tsang nga ai ni rai ma ai.

Yesu Madu bai hkrungrawt ai nhtoi hta kasa ni hpe wenyi hpe jaw bang ya ai lam gaw kashing kamun hkam ai lam nan rai nga ai. Pentecost poi hta jaw ya ai ngu ai hte shagring da nga ai. Nawku hpung gaw daini htuk ang ai chyum mungga daw ni hte hpaji madun da nga ai.

Hkristan masha ni a matu galoi mung Pentecost poi rai ra nga ai.

Kasa laika hta Yesu Madu gaw Wenyi hpe kasa ni hpe Pentecost poi shani hte Paska poi shani hta sha jaw ya ai ngu tsun mayu ai nre. Nawku hpung gaw Pentecost poi hta shangai wa ai zawn hpun madung hte lahkung laking ni matut manoi ai ga shadawn hte Yesu Madu Kasa ni hpe hpang jahtum dawsha poi hta sang lang dan da ai. (Yawhan 15:1-8) Hpun madung rai nga ai Yesu lakung laking rai nga ai kasa ni de shi a asak hka hpe lwi shang ya taw nga ai. Dai zawn Wenyi jaw ya ai lam gaw Kashing Kamun hte N-gun shaja chyeju kumla hkam la ai shaloi sha n ga, Yesu Madu kaw na anhte ni hpnag de asak lwi shang wa ai hpe masha a baw kaw na hkum hkrang de asak lwi hkrat wa ai zawn rai nga ai nga nna, San Pawlu tsun da nga ai. San Pawlu shi mungga hta Hkristu hte Wenyi gaw Hkristan nawku hpung a matu rai nna, hkum hkrang de lwi yu wa ai ga shadawn hpe chyahkring hkring tsun da nga ai. Hkristu gaw Baw rai nna, Hkristan nawku hpung gaw hkum hkrang adaw achyan ni rai nga ai. Wenyi gaw nawku hpung hpe asak jaw ai masin salum rai nga ai ngu shingdaw mai nga ai. Anhte ni wenyi a magam hpe shingdaw shadan shalen dan na matu yak nga ai. (1) Wenyi gaw anhte a mara kashing kau ya ai. Mara hpe shani shagu, lam yan amyu myu hku ladat shaw kashin kau ra nga ai. (2) Wenyi gaw galoi mung hkrit tsang chye ai anhte ni a masin salum hta simsa lam bai jaw ya ai. Anhte ni a tingkyen myit jasat gaw simsa lam hpe galoi mung dingbai dingna jaw chye ai. (3) Wenyi gaw anhte ni a myit masin salum hta tengman ai ngwi pyaw lam jaw bang ya ai. Mara a jaw e lachyum nnga ai pyaw daw gadaw ai lam hpe jahten sharun kau ya nna, myit yawn myit kaji lam hpe galai bang ya ai. (4) Wenyi gaw Karai Kasang a Mungga hte tengman ai nyan hpaji, hte, Karai Karang a ra sharawng ai hpe chye na lu hkra ninghtoi jaw ya ai. (5)Wenyi gaw tengman ai Hkristan sak hkrung lam hte sakse hkam lu na n-gun atsam marai jaw bang ya ai. Anhte ni shani shagu hkrum sha nga ai dam ana hkang ni hpe tsi tsi lajang lu hkra Wenyi sha garum ya lu ai.

Anhte ni langai hpra hpe Wenyi chyeju garan jaw ai hta Yesu Madu a shawang tsawra myit hte Wenyi hpe mu lu ai re. Wenyi gaw anhte langai hpra a ra gadawn ai hpe masa lam hta hkan nna, galoi mung htap htuk hkra galaw jaw ya ai. Yesu Madu, Shi a Wenyi hpe kasa ni hpe jaw da ai daram anhte hpe mung jaw ya ai ngu tsun mayu ai n rai tim, dai chyeju hpe matut manoi jaw ya nga ai re. Hkrisatn ni a matu shani shagu Pentecost rai nga ra ai. Yesu Madu sharawng awng ai hte jaw ya ai Wenyi hpe ning hkap ai shing nrai n hkap la ai gaw Wenyi a chyeju hpe pat shingdang ai tai nna, myit yawn hpa rai nga ai.

Anhte hpe langai hpra hta Wenyi hpe jaw bang ya gaw hkum hkrang ting matu rai nga ai. Tsun mayu ai gaw, Hkristan Nawku Hpung ting a matu rai nga ai. Dai ni na Chyum Mungga daw (2) gaw San Pawlu a ahkyak ai sharing shaga ai lam rai nga ai. Wenyi gaw manu daw dan nlu ai kumhpa rai nga ai. Raitim, hkap la ai wa hta lit kaba nga nga ai. (a) Shawng nnan, Wenyi gaw Hkristan Nawku Hpung masha ni hpe galoi mung hkam ja kung hpan shangun ai. Hkraw hkun mat sai hpun lakun lakin, hpun lap ni gaw wan nat kau na matu sha rai nga ai, (Yawhan 15:6). Dai zawn sha, hkum hkrang hkam ja sak galaw na matu asak nrawng ai hkum adaw achyan ni hpe la kau ra nga ai. Wenyi hte n htan shai ai mara shagu kade mi makoi magap da ai rai tim, Nawku Hpung a matu dingbai dingna nga nga ai. Anhte a Hkristan sak prat hta atang shalang di n gawn ai lam nga taw jang Wenyi hte Nawku Hpung hpe hkra machyi shangun wa ai re. (b) Wenyi gaw anhte ni hkap la lu ai kumhpa ni hpe kaga masha ni hpe gam garan kachyan na matu sharawng awng nga ai. Shawng na Nawku Hpung gaw Nawku Hpung madu ai arung arai hpe gam garan ai hta ladu sai ai lam ni nga lai wa ai hpe chye lu ai. Wenyi gaw dai ni na prat hta hkan nna, matsan masha ni hpe garum ya na sharawng awng tim, aten shagu nmai bing taw nga ai. Anhte a makau grup yin hta matsan mayan ni garum ningtum galoi mung ra kadawn nga ma ai gaw Wenyi shanu nga ai kumla rai nga ai.

Wenyi chyeju garan kachyan ai hta jarit masat ai lam nmai nga ai. Anhte Hkristan Nawku Hpung gaw makam masham lam, nawku daw jau akyu hpyi lam, dum hprang ai lam, hpaji jaw lam, n-gun jaw madi shadaw lam, simsa lam, ngwi pyaw lam ni hpe garan kachyan ra ga ai. Gara tingkyen myit jasat hte rai tim, hpu nau ni hpe pat shing dang ai lam n mai galaw ai. Tengman ai Hkristan masha gaw Nawku Hpung matu aten shagu tinang hkum hpe shangun ma zawn daw jau ai wa ngu mu la hkam la chye ra ai. N’kam n’sham ai ni hte Kahtawlik Hpung masha nre ai ni hpe mung garan kachyan daw jau ai lam nga ra ai.

Pentecost shani na San Petru hpe katsi hpe mu lu nga ai. Shi gaw Hkristu a lam tsun shapraw ai shaloi jang Wenyi hpe hkam la lu ai. Hkristu hta kam sham ai makam gaw manu dan dik ai sut gan kaba langai rai nga ai. Raitim, mungkan ga na sut gan hte n bung ai. Mungkan ga na sut gan gaw gam garan magan yawm htum wa magang; Makam masham sut gan gaw gam garan kachyan magam law jat wa magang rai nga ai.

Kaga masha ni hpe gam garan na Wenyi chyeju anhte hta nga ai n’nga ai hpe san jep yu ra ga ai. (c) Hkristan masha shagu gaw Nawku Hpung masha law htam wa na matu hte Nawku Hpung galu kaba wa na matu sasana magam hta shang lawm garum na lit nga ai. Tsi Du ni machyi masha nkau ni a hkum hkrang adaw achyan ni a akyu pyu akyu rawng ai lachyum hpe hkrak tup n chye shi ma ai da. Hkum hta na adaw achyan langai ngai gaw ntsa lam hta ahkyak ai lam n’nga ai ngu tim, akyu n’rawng ai ngu nmai tsun nga ai. Anhte lawm taw ai Hkristu a Hkum gaw dai zawn sha rai nga ai. Kadai raitim, tinang hkum hpe akyu n rawng ai, shing nrai, sari manu n nga ai ngu n mai myit la ai. Nawku hpung gaw mara lu ai ni hpawng de ai Chyoi Pra ai Nawku Hpung rai nga ai hpe dum hprang ra ga ai. Mara lu ai wa mara hta manoi nga yang ngarai mung hta hkru lawm ra na sha rai nga ai. Raitim, Hkristu a sak jaw ap nawng ai a marang e Karai Kasang a ting yang shawng hta hkye la lam hkam la lu nna, sari sadang nga na rai nga ai. 1Petru 1:18 hta San Petru gaw hpaga yun ga ni manu n nga ai arai hpe manu law law jaw nna n mari ma ai. Anhte ni gaw asai hte mari ra ai majaw Hkristu hta sari manu nga nga ai ngu tsun da nga ai. Anhte gaw Wenyi hpe hkap la saga ai majaw Hkristan Nawku hpung hpe madi shadaw garum na lit nga ga ai. Karai Kasang gw anhte ni a akyu rawng ai n rawng ai hpe shinggyim masha masat ai kasi madang (joi shadang) hte n yu ai sha, anhte ni a wenyi sak prat kung hpan lam hta hkan nna she hkap la na rai nga ai. Hkristan sak prat hta lata la na lam kaga n nga ai. Anhte ni gaw Hkristu a hkum daw chyan sak hkrung lam hte n-gun yawm ai lam hta hkan nna Hkristu a Nawku hpung hta akyu jaw ai, shing nrai, dingbai dingna jaw na rai nga ai. Ahkyak ai sumru lam gaw anhte ni shani shagu Wenyi a chyeju kumhpa matu Hkristu hpe shakawn ra ga ai. Bai anhte ni hta Wenyi sak hkrung nga lu u ga anhte hkum hpe hting hkang la ra nga ga ai.

Akyu hpyi saga:

Wa Karai Kasang e, Kasa ni a ntsa yu hkrat wa ai Wenyi anhte ni hta mung up hkang lam woi ningshawng nga u ga. Anhte ni Wenyi chyeju hkam la sak hkrung nga lu let makau grup ying hte mungkan masha ni hpe dai Wenyi chyeju gam garan kachyan ya ai a majaw Hkristu a Hkum hta jawm pawng nga lu na matu shaman ya rit. Anhte a Madu Hkristu a marang e hpyi nem nga ga ai. Amen.

Hkristu hta tsawra ai kanu kawa Tarahkaw Sara/num ni hte nu wa hpu nau ni e,

Ndai laban gaw Chyoi Pra ai Wenyi Kasa ni a ntsa yu hkrat wa ai poi laban rai nga ai. Hpawt ni hti ang ai Ja Chyum Mungga ni gaw;

Chyum Mungga Daw (1)  Kasa 2:1-11

Chyum Mungga Daw (2) 1Kor 12:3-7,12-13

Kabu Gara Shiga      Yawhan 20:19-23

Ndai Ja Chyum Mungga ni hpe hti nna hpawtni na nawku daw jau lamang ni hpe woi awn nga ga.