Du Sa Ladaw Laban 1, 2019 - Karai Kasang a Mungga

Chyum Laika Ni - Isaia 2: 1-5;            Roma 13:11-14;         Mahte 24: 37-44

Tsawra ai Nu Wa Hpu Nau ni, Nawku Hpung a Nawku daw jau ai ladaw nnan de anhte bai du shang nga saga ai. Ndai bat gaw, Adventu ngu ai hkye la Madu hkristu hpe ala ding da nga ai du sa ai ladaw hta langai ngu na laban rai nga ai.

Ndai du sa ai ladaw laman hta “ala maja nga mu” ngu nna tsun shadum ai ga hpe anhte chya hkring hkring na la lu na rai ga ai. Hkrak nga yang ndai du sa ai ladaw hta sha nrai aten shagu hta hkye la Madu bai du sa wa na hpe anhte ala maja let nga nga ra ai rai nga ai, hpa majaw nga yang Hkristian ni a prat gaw tinang a Wenyi hten bya ai de ndu mat u ga tut e sadi maja makawp maga let nga pra nga ra ai prat rai nga ai.

Raitimmung, ndai du sa ai ladaw laman hta hkye la Madu shangai wa ai Hkrismas poi hpe galaw na matu anhte a prat hpe hkyen lajang ai lam ni galaw nga ga ai laman hta, hkye la Madu du sa ai wa ladaw a ngu ai, Adventu ladaw a lachyum hte yaw shada ai lam ni hpe sung sung sumru ding lik yu ai lam ni galaw na matu mai kaja ai aten ladaw mung rai nga ai.

Madu Yesu anhte hpang de du sa wa ai hpan mali hpe shaleng na matu du sa ai ladaw ngu ai hta laban mali rawng nga ai. Langai ngu na gaw masha hkum shan dagraw la nna anhte hpang du du sa wa ai lam, lahkawng ngu na gaw anhte a myit masin salum kata de du sa wa ai lam, masum ngu na gaw anhte hkum shagu langai hpra a si ai shani anhte hpang de shi du sa wa na lam, bai hpang jahtum mali ngu na gaw, je yang daw dan ai wa hku nna hpang jahtum shani shi Madu bai du sa na lam ni rai nga ai. Ntsa lam hku nna anhte galoi mung myit dum tsun nga ai Madu Yesu a du sa wa ai lam hpan lahkawng gaw, shing gyim hkum shan sa dagraw la nna shangai chying hkai du sa wa ai lam hte, hpang jahtum Mungkan htum ai shani je yang daw dan na matu hpung shing kang hte shi bai du sa wa na ngu ai lam rai nga ai.

Shing gyim masha ni a labau hpe bai yu dat ai shaloi, shing gyim masha ni a myit nyan hpe jahtoi shaleng ya na matu Karai Kasang hpe hpyi jahtau lai wa ma ai shaloi, Karai Kasang gaw Moshe a lata hku nna shing gyim masha ni hpe Tara kanu lam shi jaw ya ai. Raitim mung, dai tara ni hpe shing gyim masha ni tang du hkra hkan nang shatup lu ai lam ni n-nga ai ngu ai hpe dai tara ni nan sakse hkam ya nga ai. Shing gyim masha ni lang hte lang aten hte aten dai tara ni hpe tawt lai mat wa ma ai rai nga ai. Dai zawn re ai masa hta shing gyim masha ni hpe shadum la na matu myi htoi ni hte tara sara ni hpe pan hte pan Karai Kasang shangun dat ya lai wa yu ai raitim, dai tara ni hpe shing gyim masha ni sadi dung ai myit hte hkan nang hkan sa lu hkra n-galaw ya lu lai wa ma ai rai nga ai. Shing gyim masha ni gaw shut hpyit mara a wunma hkang ni hte hpring chyat nga let lawt lu na matu atsam mung nrawng dai tara ni hpe htep lahti hkan nang hkan sa na matu atsam kata zawn rai hkam sha nga ma ai aten, shi a chyeju kum hpa hte shinggyim masha hpe hkye la na matu Karai Kasang shi a kasha hpe Mungkan ga de shangun dat ya ai rai nga ai.

Tara dara je yang daw dan na matu shi bai du sa na re, nga nna mung Madu Yesu ga sadi jaw da nga ai. Shawng na lang hkum shan hte shi du sa ai shaloi gaw, dik hkra shagrit shanem ai masa hte du sa wa ai rai nga ai raitim, shi bai du sa wa ai shaloi gaw, daru magam hpung shing kang hta, hkaw hkam ni a hkaw hkam zawn du sa wa ai hpe sum mwi hta masha yawng mu lu na ma ai, lamu ga jahtum maga mi kaw nna pru wa ai myit hprat hpe kaga jahtum maga mi kaw nna mu mada lu ai htoi kabrim ai myit hprat zawn shi Madu hpe mu lu na, bai dai shani shi a du sa wa ai lam gaw akajawng sha byin wa na ra ai re majaw nhkru ai masha ni hkrit kajawng kaba hkrum na ma ai mung rai ma ai. Dai shi a lahkawng lang ngu na du sa wa na nhtoi gaw sha-u ing ai garai nhkrum shi yang No-ah prat na  zawn a-kajawng sha byin wa na rai nga ai, dai shaloi na masha ni ndum nmai rai lu sha nang let, num wa num la rai pyaw daw kadaw nga ma ai aten sha-u ing wa nna yawng hka hte kashin sat kau hkrum lai wa masai rai nga ai.

Madu Yesu shi shangai chying hkai du sa wa ai lam a yaw shada ai lam hte seng nna mung shi hkum nan tsun sharin ai lam hpe Luka 4:18-19 hta mu lu nga ga ai, dai gaw, “Madu a Wenyi nye a ntsa e nga nga ai, matsan mayan ni hpe kabu gara shiga hkaw tsun na matu, shi ngai hpe na man chya ya ni ai, bawng dung ai ni hpe shalawt lu na lam, myi kyaw ai ni hpe myi bai mu lu na lam, hkaw tsun na matu mung, zingri zingrat hkrum ai ni hpe dat dat shangun na hte Madu a sharawng awng ai shaning hkaw tsun dan na matu mung shi ngai hpe shangun dat ni ai” nga nna shi da sa ai lam a yaw shada ai lam hpan (5) hpe Madu Yesu hkum nan asan sha tsun da nga ai.  

Anhte shing gyim masha ni a shut hpyit mara hpe gun la kau ya nna de a malai htani hta na asak hkum tsup ai asak hpe jaw ya na matu Madu Yesu mungkan ga de du sa wa ai rai nga ai.

Bai, ndai bat na Kabu gara ai shiga Mahte laika Mt. 24: 42 hta “dai ahkying hpe nanhte nchye myit dai majaw, sadi maja nga mu’ nga nna tsun ai Madu Yesu a mungga gaw ndai du sa ai ladaw hta anhte a myit masin hta rawng nga ra ai myit masa rai nga ai. Madu Yesu mung, shi lahkawng lang ngu na bai du sa wa na aten hpe anhte yawng sadi maja let ala ding da nga na hpe myit mada nga ai. Dai nhtoi gaw galoi rai na hpe anhte nchye ga ai raitim lani mi kaja wa hkrum kadup na nhtoi rai nga ai zawn anhte a matu ahkyak dik ai nhtoi mung rai nga mali ai. Anhte nshajin da ai ahkying hta dai nhtoi a kajawng sha anhte kaw du pru wa lam nbyin u ga,  tut nawng shajin maja nga na matu “sadi maja nga mu” nga nna Madu Yesu sadi jaw ai lam rai nga ai.

Madu yesu bai du sa wa na aten hte ahkying hpe anhte kadai nchye lu ga ai, raitim mung, Hkristian ni mahkra shi madu galoi ten mi du sa tim jin jin rai nga lu hkra shajin let ala maja nga ra na rai ga ai. Shi madu hpe hkap la lu na matu aten shagu shajin maja ai lam ni galaw nga ra ai zawn maga mi de mung, dai zawn rai ala maja nga ga ai aten anhte hpe ap ya da ai lit magam ni hpe kangka ai hte galaw gun hpai nga na matu mung tsaw shaga da hkrum ai ni anhte rai ga ai.

Dai zawn myit mada let ala nga ga ai laman hta dai madu hkum nan lam amyu myu hku, grau nna Sacramentu ni hku nna anhte hte rau, anhte a lapran hta shanu nga ai hpe mung anhte dum shai ra ga ai. Bai anhte gaw shi Madu hpe sha ala yu mada nga ai hku nrai, shi madu hte rau ala yu nga na mung rai nga ga ai. Lachyum gaw, anhte a masin salum ni, shi Madu hte shi a mungga hta maju jung da na hpe mung shi ra sharawng nga ai. Ndai myit masa hte shi hpe ala nga ai ni a matu gawm mat shara hte, myit htum shara teng sha ntai mat na rai nga ai. Hpa majaw nga yang shi gaw hkye hkrang la ai chyeju hte kaga shaman chyeju ni law law lang let teng sha du sa wa na rai nga ai.

Ahkyak ai gaw, shi Madu hpe ala nga ga ai ten, anhte a Wenyi hpe jasat kau ya lu ai shut hpyi mara kaba langai ngai hpe tawt lai nna anhte a Wenyi ni si nga ai masa hta nnga nga hkrup na hpe sha sadi ra na rai ga ai.

Akyu hpyi saga: Wa karai kasang e, ndai du sa ai ladaw laman e, tsawra matsan dum ai amu ni hpe hkan galaw nna, du sa na ra ai Hkristu madu hpe kam sham ai myit kaba hte hkap hkalum lu na matu garum ya mi, anhte a madu Yesu Hkristu a marang e hpyi nem nga ga ai.

Fr.Bernard Dashi Tang Ji   Advend (1), 2019, Year A              1-12-2019, Laban

Add new comment

7 + 0 =

Please wait while the page is loading

Du Sa Ladaw Laban 1, 2019 - Karai Kasang a Mungga | Radio Veritas Asia

Error

The website encountered an unexpected error. Please try again later.