Simsa Lam Samram Nhtoi Hpe Myit Mada Nga ga: Gasat Gala Majan Mang Hkang Hte Hkrit Maja Ra Ai Nsin Aten Ni Lawan hkoi mat u ga matu lajin dat ai lam

Tsawra ai hpu nau ni, Tinang a prat hpe bai sumru dinglik yu let Karai Kasang hte bai htingram hkat lam ni shabyin la ai aten rai nga ai ndai chyoi pra ai Lu Sha Gam Ladaw hpe anhte lai di hkawm sa nga ga ai aten, simsa lam a matu Wa Sarabyin Francis lajin saw shaga ai lam ni hpe anhte yawng myit hkrum myit ra madat mara hkan sa nga ga. Gasat gala majan manghkang lam ni law law a majaw hkra machyi hkrum nga ai mungkan ga hpe yu nna, Wa Sarabyin Francis shi a masin salum kraw lawang kata kaw nna simsa lam a matu akroi anoi tsun lajin ai lam ni galaw nga ai.

Anhte hkrum nga ai gasat gala majam manghkang lam ni yawng hpe mahkra dang chye ai Karai Kasang shazim kau ya u ga, myit mada shara samram nhtoi lawan dawng pru wa u ga, anhte yawng rau lahput hput di let akyu hpyi nga ga.Mara kata masha ni a hkrap ngu hkrap ngoi yawn madai nga ai nsen ni, adip arip di hkrum ai lam ni a majaw hkrap madai nga ai masha ni a madai nsen ni, majan nhpan lapran asak lawt lu na matu garum hpyi jahtau nga ai masha ni a jahtau nsen ni hpe, anhte a shani shagu na akyu hpyi ai lam ni hta, shalawm ya na nmalap kau nga ga. Jahten shaza lam ni shabyin ai maga n yawng lawm ai sha, simsa lam hpe shabyin ai lam hpe madaw lata hkawm sa ga, nga nna mungkan mungdan ni hpe tsun lajin nga ai Wa Sarabyin a lajin ga ni hpe hkap la hkan sa nga ga.

Ndai Lu Sha Gam ladaw laman hta, Madu Yesu a sharin shaga ai lam ni hpe myit sumru dinglik yu nga ga. Jet ai n gun atsam gaw shagrit shanem ai hte dau jaw ai magam bungli ni kaw nna sha lu la mai ai, ngu ai lam hpe Madu Yesu shi hkum nan kasi ningli madun dan lai wa sai rai nga ai.Jet ai daru magam arawng aya ngu ai gaw, up hkang reng sha lu ai, ngu ai lam ni kaw nna lu la mai ai baw n rai, tinang a hkum hpe nyet kau nna manang ni hpe daw jau ai lam galaw ai kaw nna sha lu la mai ai baw re, ngu ai lam hpe Madu Yesu kasi madun lai wa sai rai nga ai.

Dai ni na prat aten hta, kasat gala majan mang hkang lam ni mungkan shara magup hta byin hkrum nga ga ai. Madu Yesu shangai wa ai chyoi pra ai buga hta pyi byin nga ai. Bai, Ukraine mungdan hte anhte a mungdan hta mung byin nga ai. Simsa lam a matu aja awa akyu hpyi nga ga. Tara rapra lam hte gaw gap da ai simsa lam ngu ai chyeju kum hpa anhte hpe jaw ya rit ga, Madu Karai Kasang kaw akyu hpyi nga ga. Anhte a buga hta nga ai manu dan ai nhprang sut rai ni hpe manu shadan nga ga, majan mang hkang lam ni hpe jahpai nna ndai manu dan ai nhprang sut rai ni hpe n gawn n sawn shaza ai lam ni n galaw ai sha, du na ra ai prat ban ni hta nga pra sa wa na ban hte ban na amyu sha ni asung jashawn jai lang lu na lai ladat ni hte nhprang sut rai ni hpe manu shadan lam galaw ga.

Ndai zawn prat ban shagu na masha ni a matu myit shalawm nna galaw sa wa ai lai ladat ni gaw ngang grin ai simsa lam lu la na matu shakut galaw ai lam nan rai nga ai. Wa Sarabyin tsun lajin nga ai lam ni hpe mungkan masha ni ahkyak shatai madat hkan sa wa mu ga, shada da tsun bawng ban lam ni galaw nna bai htingram hkak lam ni gaw gap la lam galaw ai gaw, simsa lam a npawt nhpang re ngu ai lam hpe mungkan masha ni chye na hkap la wa mu ga.

Anhte a myit masin salum hta myit mada lam galoi mung tu grung nga u ga, anhte a masin salum kata na shada da nhkrum nra nju ndawng hkat lam ni hpe tsep kawp yeng seng kau lu hkra shakut galaw ai lam hpe dingrun galaw shakut nga ga. Ramma ni hpe Wa Sarabyin Francis kaw nna hkring hkring tsun shadum lam galaw nga ai: “Nanhte a myit mada lam ni hpe hkum gashun la kau shangun mu, dai ni mungkan ga hta byin nga ai mayak mang hakng lam ni hpe yan hparan lam galaw mu, si ai hpe dang kau nna, teng man ai asak jaw ya ai, hkrung rawt sai Madu Hkristu hta anhte a myit mada lam ni bai asak hkrung wa u ga.

Ndai myit mada lam gaw asak a nhtoi byin tai wa na ra ai, myit daw myit hten lam ni hpe tawt lai lu shangun na ra ai, myit hkrum sai ninghtan lam byin shangun nna jahten sharun lam byin shangun ai nhkru ai lam ni hpe shamyit kau lu na, rai nga ai” Majan hta sung lang ai jahten shaza ai sinat lak nak arung arai ni yawng, simsa lam hpe gaw gap ai lam hta jai lang ai arung arai ni byin tai wa ra ai,hkrit tsang ai lam ni gaw kam hpa ai lam ni byin tai wa ra ai, ngu ai lam hpe mungkan mungdan ni yawng myit shatawng galaw sa wa lu mu ga.

Anhte yawng gaw hpu nau ni rai ga ai, ngu ai anhte a ga, mungkan ting chyam bra wa u ga, anhte a shamu shamawt ai lam shagu gaw simsa lam hpe shabyin ai shamu shamawt lam ni rai u ga. majan shabyin nga ai masha ni a myit ja ai nhkru ai masin salum ni hpe Karai Kasang a chyeju hte shakya kau ya nna, simsa lam hpe ra sharawng ai, htingram hkat lam hta hkawm sa mayu ai masin salum ni byin wa hkra shanhte a masin salum hpe kalai ya na matu Madu Karai Kasang kaw akyu hpyi nga ga.

Shanthi, Shalom, Peace, Salaam

Wa Saradaw Kaba Cardinal Charles Bo

Archbishop of Yangon,

President of CBCM (Catholic Bishops Conference of Myanmar)

President of FABC(Federations of Asia Bishops Conferences)