Chyoi Pra Ai Laban Bat A Lam (What week is Holy Week?)

HOLY WEEK

Chyoipra ai nhtoi, chyoipra ai Laban Bat, ngu nna masat galaw ai lam Ga-shaka Dingsa prat kaw nna nga ai lam chye lu ai: Chyeju dum poi, tap ginsum poi, Paska poi, ngu nna tinang nang a hkum hpe shachyoi shapra ra ai nhtoi/ ladaw ni hpe masat da ai lam chye lu ai. Ga-shaka Dingsa prat hta mung ahkyak dik htum ai poi gaw Paska, shing n rai, Shalai wa poi ngu ai, Israel amyu sha ni Egyip mungdan kaw nna lawt kaw wa lu ai labau, Moshe hpe shangun dat nna Karai Kasang gaw Israel masha ni hpe mayam prat kaw nna hkye hkrang la lam hpe myit dum galaw ai poi gaw ahkyak htum rai nga ai. 

 

Paska poi poi sha ai shaloi, sagu bainam hpe ju kakang sha ai, hka dik ai alap hte sha ra ai (dai gaw, shanhte n htum nni roi rip hkrum ai lam ni hpe shadum ya ai lachyum re); bai, matsi n lawm ai muk hpe sha ai. Sagu a sai hpe mung nta chyinghka ntsa e chya da ra ai. Nta dinghku a hpaawn ngu na wa, dinghku kawa gaw hkye hkrang la ai amu, labau hpe tsun hkai let Karai Kasang hpe chyeju dum shakawn ai ga ni tsun ngut, rai jang sagu shan hpe mung, matsi n rawng ai muk hpe mung sha ma ai re.

 

Hkristu Madu gaw nawngjau jawjau ai amu hpe mung, Tara hpe mung, ningnan galai kau ya ai wa re. Shi hkum nan mungkan mara la kau ya ai Sagu Kasha ajet rai nga ai. Nawngjau ai jau daju mung rai nga ai. Shi hkum nan nawngjau ai wa, shi hkum nan hkungga shan rai nga ai. Yesu shi a hkye hkrang la ai amu magam hpe myit dum na matu, Kasa ni hpe hpang jahtum shana shat sha poi hpe woi galaw ai. Kawa Karai Kasang hpe chyeju dum shakawn ngut ai hpang, matsi n lawm ai muk hpe la nna ning nga tsun ai_

 

Nanhte yawng ndai hpe la nna sha mu! Ndai gaw nanhte a matu ap kau hkrum na nye a hkum rai nga ai”, nga ai.

Muk sha ngut ai htawm sabyi chyaru rawng ai gawm hpe la nna ning nga tsun ai_

Nanhte yawng ndai gawm hta na lu mu; ndai gaw nye a sai rawng ai gawm rai nga ai. Shut hpyit  măra ni hpe raw dat ya na lam, nanhte hte măsha  law law a mătu ru kau ya na, htani htana a’grin nga ai ga-shăka ningnan a sai rai nga ai. Ngai hpe myit dum nga na mătu ndai gălaw mu!” nga ai.

 

Yawhan a laika daw kaba I hta ka da ai hte maren, dai Mungga gaw htani htana Karai Kasang hte nga nga ai, Shi n lawm ai sha hpan da hkrum ai baw hpa n nga ai, nga ai. Dai mungga gaw masha a hkum shan mung sa dagraw la nu ai, nga ai.

 

Shing rai, Hkristu Yesu gaw shi a mungga hte hka hpe sabyi chyaru shatai ai, shi a mungga hte muk hpe shalaw jaw ai, shi a mungga hte kaga hkye hkrang la ai, shamai shatsai ai, jahkrung shrwt ai amu law law galaw dan lai wa sai. Jahtum na aten hta shi a mungga hte muk hpe shi a hkum shan shabyin shatai ai, shi a mungga hte sabyi chyaru hpe shi a asai shatai da ya nu ai. Muk hte sabyi chyaru gaw shi a hkum sai shan tai wa ai lam hpe n kam mai na lam hpa nga a ta? Shi galaw ai hte raw bung pre ai hku galaw lu ai ahkaw ahkang kasa ni hpe hkinghtawng ap jaw da ya nu ai. Nawngjau aya, jau aya hpe jaw da ya nu ai re.

Hpang shani, Yesu shi Wudang ntsa e jen noi si hkam nna nawng kau ya ai wudang hkungga hte muk sabyi chyaru la nna nawng ya ai hkungga hpe langai sha shabyin da nu ai. “Ndai gaw nye a hkum, ndai gaw nye a sai ngu ai hta, shi si hkam ai lam hpe jawjau ai amu hku nna myit dum shangun ai.

 

Dai mabyin a lam chyoipra ai Bat Mali ya shana na nawku dawjau lamang hta myit dum galaw ga ai.

Dai mabyin hte shachyaw nna Laban Bat Manga ya shana na lamang hta wudang hpe laklai ai hku shagrau hkung ga jaw ai lamang galaw ga ai. Si-du a laknak, si ari jaw ai laknak, si amyu, hkrat sum ai kumla dai ni yawng hpe gumhpawn nna Karai Kasang gaw Wudang hpe hkye hkrang la ai laknak, awng padang a laknak shatai dat ai. Dai lam ni hpe myit dum ai hku nna chyoipra ai Bat Manga ya shana na nawku dawjau lamang hpe galaw ga ai re.  

 

Chyoipra ai Laban Bat Kru ya shani hta rai jang, Yesu a moimang lup kata e rawng nga ai lam hpe myit dum ai; Kasa Petru a shagun laika hte maren, Yesu gaw “limbo” ngu shamying ai, tsu ga na masha ni hpang de sa kawan ai. Sumsing Mungdan chyinghka hpaw ya maw sai lam, Adam Ewa hte rawng nga ai ni yawng hpe kabu mai ai shi-ga sa jaw ai.  Labau tup hkrak mi n rai tim Yesu gaw Yuptung aten hta bai hkrung rawt ai, ngu, aten masat la ga ai re. Dai majaw, “Paska Yuptung missa” ngu nna shamying let, Chyoipra ai Laban Bat Kru ya shana na nawku dawjau lamang hpe galaw ga ai re. Hkristu gaw ninghtoi majing re ai lam, ningsin a atsam, nat Satan hte si-du hpe padang dip la lu ai awng padang masat hpe myit dum galaw ga ai.

 

Kaja wa gaw chyoipra ai Laban Bat hpe Paska a shawng na Laban Nhtoi, Kungla shaman poi hte hpaw hpang ai re. Yesu gaw myihtoi ni tau nau tsun da ai hte maren, lawze kasha jawn nna Yerusalem Mare de hkawhkam hku nna, padang ninglaw lu la ai hku nna mare de shang wa ai. Mare masha ni kungla lang let, “Madu a mying ningsang hte du sa ai wag aw Ah nga u ga law”, nga nna mahkawn shakawn ma ai. Dai Laban Nhtoi kaw nna bat kru ya shana du hkra na ladaw hpe “Chyoipra ai Laban Bat” ngu shamying ga ai re. Ga-si dai hpe A.D 300 jan aten kaw nna, Sanpra ai Athanasius shawng lang hpang ai ga-si re. Nawku Hpung hta gau-ngwi ngwi rai Kungla shaman Poi Laban kaw nna Yesu bai hkrung rawt ai shana du hkra hpe “Choipra ai Laban Bat” ngu masat nna, shaning ting na nawku dawjau lamang ni hta manu dan dik htum ai, ahkyak dik htum ai, hkye hkrang la ai amu hte labau ni hpe myit dum galaw ga ai re ai lam sumtang tang dat nngai.

Tang Madun Shapoi ya ai :Wajau Paul Wanghte Lum Dau 

Add new comment

1 + 1 =

Please wait while the page is loading

Chyoi Pra Ai Laban Bat A Lam (What week is Holy Week?) | Radio Veritas Asia

Error

The website encountered an unexpected error. Please try again later.