Sumri Gau Ai Wa

Masha law malaw gaw tsaw ai shara hpe hkrit ma ai.Ga shadawn,masha langai mi gaw grai ngang nna hpang jahtum galaw shapraw ai nta nnan a nchyun kaw tsap ai ngu ga.Shi gaw kabye shara atsawm sha lu ai.Hkrat wa na hpe shi hpa ntsang ra ai.Raitim,grai tsan ai npu kaw nga ai lam hpe mu mada dat ai hte rau,shi kajawng mat wa ai.Kan hta hpa nrawng mat ai zawn nga ai hpe shi hkrum sha nga ai.Shi a sai lam grau shamu jat wa ai hte shi a lahput shada mung ahkawk hkat wa lu ai.

Ndai zawn hkrit ai lam masha law law hta byin chye ai.Raitim,laklai ai masha nkau mi nga ma ai re.Dai ni gaw grai tsaw ai shara hkan e nhkrit n kang grai kung ai hku nta galaw shachyaw ai hte hkawawt chyinghka ni hpe kashin shatsawm ai masha ni rai ma ai.Ga kaw nna dawng latsa a lahta de tsaw ai shara hkan e,grai gwi ai hku masha ni hpe shangwi shapyaw goi wat ginsup dan ai masha ni hte sumri gau ai masha ni mung nga ma ai.Ndai masha ni gaw simsa ai lasaw lasa lu ma ai hte hkum hpe shading sharam ai hta laklai nna kaja ma ai.Raitim,nhkrit n kang na matu myit masa amyu mi hpe shanhte sharawt shagrai la ma ai.-Sumri gau ai masha law malaw gaw ga hte htep ai sumri hta shawng gau shaman hpang  ma ai.Shanhte a hkum hpe shading sharam ai hta awng dang byin ai wa hte maren,sumri hpe grau tsaw ai de jat sharawt lung wa ma ai.Dai hpang,tsaw ai shara hta shanhte a matu hpa shai ai lam n nga mat mu ai.

Shanhte hpe yu ai masha ni pyi,nshung si hte hprwi  rai wa ma ai.Raitim shanhte galaw madun ai ni gaw hpa hkrit ai lam n nga ma ai re.Shanhte myit daw dan da ai lam hpe galaw dan lu na kam ai rai nna,shanhte shawng de ding yang nawt sit sa wa ma ai.Shanhte gaw ga de n mada yu ma ai sha,shawng de sha yu ma ai re.Tsaw ai hpe shanhte n myit ma ai.Hkrit tsang ra ai hpe shanthe n sumru yu ma ai.Shanhte galaw nga ai lam hpe chyu sha,da ting myit da ma ai.Sumri chyahpa langai mi chyu sha raitim ,dai gaw hkrak ngang ai sumri rai nga ai.Shanhte a myti hpe dai sumri hta azi jung da nna,hkum hpe shading let,shawng de shanhte gau sa wa ma ai.

Rai yang tsawra ai shiga madat Nu Wa Hpu Nau ni anhte yawng ndai sumri gau ai wa kaw na lam lama mi hpe sharin la lu mai nga ga ai.Dai gaw anhte a nga sa prat hta gara hku awng dang na ngu ai hpe anhte sharin la lu mai nga ai.Dai awng dang ai lam hta makoi magap nga ai ti gindai gaw anhte hkawm sa wa ra ai lam hpe asan apan sha chye ra ai.Anhte a myi dai lam kaw azi jung shakap da ra ai hte n hkring n sa anhte shawng de anin sa wa na ra ai ngu ai lam rai nga ai law.