Sumgaawn Lap Hta Na Lu La Mai Ai Hkamja Lam Akyu Ni

Ndai lamang hta gaw Sumgawn Lap sha nna lu la mai na hkamja lam akyu hte seng nna chye tawn da ai made hpe garan kachyan ya mayu ai.Ndai sumgawn lap hpe anhte Wunpawng myusha ni mung grai law sha ga ai hpe mu lu nga ai.Sumgawn lap gaw masha yawng sha ya na htap htuk ai lu sha kaja re ai zawn tsi mawan kaja mung rai nga ai.

Sumgawn lap hpe yup npyaw byin ai masha ni madung sha ya na htap htuk ai lam tsun da nga ai. Sumgawn lap shadu ntsin hpe shana shagu yupra shang mahka lu ya ai rai yang yup pyaw,sha mu nna masha hpe hkam kaja zet let ai akyu ni jaw ya lu nga ai.

Bai nna Sumgawn lap hkalung hpe  myit hkra htu abraw la nna jum dwi loi mi bang rai lu ya jang hka yam kan ana hpe hkyamsa shamai ya lu ai.Sumgawn  lap hpe hka hpun lum hta tsing nna lu ya yang kan chyat,kan shing dang ,nbung shing dang ana hkyamsa mai tsai lu ai,kraw katsi ai dat hpe mung jaw ya lu ai,hka hkaw,jit sa kaja shangun lu nga ai.

Shat kan ana,hka li ana,hpyi hpraw ana kap wa ai lam ni hpe sumgawn lap sha ya nna hkyamsa,mai tsai shangun lu ai.Salum ana byin ai masha ni sumgawn lap kyap 5,nam htan hkan mi hte jum ram daw bang shadu nna shani shagu lu ya yang kaja ai.Bai nna sumgawn lap hkalung hpe gyit mawng ntsin hta tsing nna jum,magyeng si hte majap bang rai htu nna ntsin jaw lu ya ai rai yang sin bum shan htoi ana hte shagyi ana ni hpe hkyamsa lu ai nga nna tsun da nga ma ai.Bai langai mi gaw sumgawn lap kung naga sai hpe jum loi mi bang rai,myit hkra htu mani nna ntsin hpe pa nlawm hkra shup nna jen lu ya ai rai yang myi machyi ai,myi kaw nra ka-ut machyi ai ana ni hpe hkyamsa shangun lu ai tsi mawan kaja lu sha rai nga ai.