Shakau Lap A Hkamja Lam Akyu

Shakau lap hpe e lu sha shat mai ni hta bang sha lang ga ai zawn muk hpan amyu myu ni hta mung bang sha nga ga ai re.Anhte Myanmar mungdan masha ni sha nrai,hpunau miwa myusha ni a shat mai malu masha ni hta mung shakau lap grai bang sha jai lang ai hpe mu lu nga ga ai.Rai tim ndai shakau lap hta na kaning re ai hkam ja lam akyu ni lu la mai ai hpe gaw nchye ai masha grai law nga ga ai.

Shakau  lap sha nna lu la mai ai hkam ja lam akyu ni hpe hka ja yu ai shaloi shakau lap gaw salum a matu kaja ai lu sha rai nga ai.Hpa majaw nga yang shakau lap hta rawng ai ahkyak ai drup pound ni hta na Allicin gaw cholesterol shadang hpe shayawm kau ya lu nna salum hkamja lam hpe garum ya lu ai.Dai Allicin gaw sai rawt ai hpe mung jahkrat ya lu ai sha n-ga potassium rawng ai malu masha hte pawng hpawm dat yang salum sai lam hpe hkra machyi shangun ai lam yawm shangun ai lam chye lu ai.

Hkam jan n-gun kaja shangun ai – shakau lap hta vitamin C grai law rawng ai a majaw hkum hkrang hkam jan n-gun hpe sharawt ya nna sai lam,cell,tissue hte lasa shan ni nnan bai shabyin ai hta n nga n mai rai nga ai collagen htuk shapraw ai hpe jasu alun ya lu nga ai.

Nra hkamja shangun ai – kaga malu masha ni hta nau nmu lu ai vitamin K dat  hpe shakau lap hta lak lai  rawng ai hpe mu lu nga ai.Vitamin K gaw nra hpe ja hkak  shangun ai numhkak hpe jaw lu ai majaw nra hkamja lam a matu grai kaja nga ai.

Cancer ana hpe makawp maga ya lu ai – shakau lap gaw sinda shan cancer,jit bawng cancer,pu kaba cancer,sinwawp cancer, pu jat cancer ana hte kaga cancer ana law law hpe makawp maga ya lu ai lam tsun da nga ai.Bai nna hkum hkrang kata na gung dat jasat rai ni hpe mung yawm mat hkra la shaprai kau ya lu nna cancer byin shangun lu ai cell ni chyambra ai lam nbyin hkra ning hkap shing dang ya lu ai majaw cancer ana hpe makawp maga ya lu ai lu sha hta lawm nga ai.

Myi n-gun kaja ai – shakau lap hta rawng ai carotenes ni gaw myi n-gun lasa hpe jam jau jaw ya lu ai dat bang rai ni hpe shayawm kau ya lu ai.Asak kaba wa ai majaw byin ai myit nsan,myi mam mam ai hpe makawp maga ya lu ai.Dai majaw shakau lap galoi mung sha ya nga ai ni gaw myi nmu,myi mam mam ai lam lawan nbyin hkra garum ya lu nga ai majaw asak kaba tim myi kaja ai akyu hpe jaw ya lu ai.

Gung dat ni hpe jasan kau ya lu ai – shakau lap gaw jit hkaw kaja ai atsam loili rawng ai hte gung ni hpe jasan shaprai kau ya lu ai atsam,bacteria ana kanu ni hpe si mat shangun lu ai atsam ni rawng ai majaw hkum hkrang kata na n kaja ai gung dat jasat rai ni hpe jasan jaseng kau ya lu nga ai.Hkum hkrang kata na maza mala gung ni,jum dat hte sau ni hpe hka hkaw ai hte rau shapraw kau ya lu hkra n gun jaw garum ya lu nga ai.

Shat kan myit ai – shakau lap hta rawng ai drup pound ni gaw shakau hpraw zawn sha atsam rawng ai lam chye lu ai.Malu masha rin ai hpe garum ya lu ai zawn shat kan n myit nna byin ai mang hkang hpe hkyamsa shangun lu ai.Bai nna shakau lap a bacteria ana kanu ni hpe si shangun lu ai atsam a majaw shat kan hte pu lam ni hta jam jau jaw lu ai salmonella bacteria kanu hpan ni kaw na makawp maga ya lu ai.Tsun ga nga yang shakau lap gaw pu lam a magam bungli ni hpe kaja shangun ai majaw malu masha ni kaw na lu sha n-gun dat ni hpe grau nna chyup la shangun lu ai atsam ni rawng ai majaw shakau lap hpe sha nna hkam kaja ai akyu hpe hkam la nga ga law.

Salum ana hpe makawp maga ya lu ai – shakau lap gaw shakau hpraw,shakau hkyeng ni zawn sai dip n-gun hpe shayawm ya lu nna sai pa gumdin ai lam n byin hkra makawp maga ya ai majaw salum ana hta ai,salum a kajawng sha adawt hkra machyi ai hpe hkyamsa shangun lu ai.Bai sai kata na n kaja ai cholesterol ni hpe mung shayawm kau ya lu ai akyu ni shakau lap nna lu la mai nga ga ai re.

Shingrai tsawra ai shiga madat nu wa hpunau ni ndai shakau lap gaw hkum hkrang hkam ja lam akyu law law jaw ya lu ai lam daini anhte kalang mi bai hka ja la lu saga ai re.Shakau lap hpe katsing sha ai,malu masha shat mai shadu ai hta bang nna sha nga ga ai.Shadu jahkut kau nna sha ai hta katsing sha ai gaw hkamja lam akyu hpe  grau nna jaw ya lu ai lam chye lu ai.