Oximeter Hpe Ladat Jaw Ai Hku Jai Lang Chye Ga

Tsawra ai shiga madat nu wa hpunau ni daini na hkamja lam lamang hta gaw Oximeter hpe ladat jaw ai hku jai lang chye na hte seng nna garan kachyan ya mayu ai.Ya ten masum lang numdaw nna kalang bai sawng wa ai Covid-19 kapbra ana zinli gaw anhte Myanmar Mungdan masha ni hta mung grai sawng ai masa hku chyambra taw sai rai nga ai.

Ana chyambra sawng ai hte maren ana kap hkrum ai machyi masha ni mung lani hte lani grau grau law jat ding yang rai taw nga ai.

Lai wa sai aten hta Covid ana kap hkrum ai masha ni a matu tsi rung,tsi gawk hte kaga laksan shara ni san da nna gawn lajang tsi tsi shamai ya ai lam ni nga ai raitim ya ten ana kap hkrum ai machyi masha ni gaw tsi rung tsi gawk sa na shara yak hkak lam ni a majaw tinang dum nta kaw nga nna sha tsi tsi shamai la taw ai ni she law nga ga ai re.

Covid  ana kumla madun nna machyi wa ai masha ni mung covid ana jep ai baw jak ( covid test kit ) mari la nna tinang hkrai jep la ai, dai hte maren oxygen shadang yawm n yawm chye lu na matu mung oxygen shadawn jak,Oximeter hpe tinang hkrai mari la nna jep ai lam ni galaw nga ga ai re.

Dai majaw covid ana jep jak (covid test kit ) hte oxygen shadawn jak,( Oximeter ) gaw ndai aten hta tsi hte seng nna grai ahkyak ai arai langai hta lawm taw nga ai.Dai hpe anhte ni jaw ai ladat hku jai lang chye na gaw ra ahkyak na ga ai re.

Jai lang ai shaloi ladat jaw jaw hte jai lang ai rai yang sha jaw teng ai mahtai hpe lu na mung rai nga ai.Oximeter hta masat numbat madun ai shara lahkawng lawm chye nga ai.Langai mi gaw sai kata na oxygen shadawn shadang rai nna yu maya hkam kaja ai masha ni a matu 96 – 100 lapran nga chye ai.

Bai langai mi gaw sai shamu gumlawt ai shadawn shadang rai nga ai.Covid-19 ana byin ai masha ni hta oxygen sha nrai,salum gumlawt shadang, sai shamu gumlawt shadang ni hpe mung yu maram ya na ra nga ai.

Dingrun shamu shamawt hkawm taw ai masha ni a matu 60 – 100 lapran nga chye nna asak kaji,asak kaba ai hta hkan nna 60 npu hte 100 lahta mung nga chye ai.

Sawk sagawn da lu ai mahtai hte maren nga yang Oximeter hpe jai lang ai shaloi  hkra lata a  yung pan hte yung nu kaw shadawn ai gaw grau jaw ai lam tsun da nga ai. Jak shadawn lang taw ai aten hta lata hpe n shamu ai sha,zim rai tawn nna minutes kadun mi maram yu taw ra ai.

Lata lamyin tsi chya da ai,lata lamyin galu da ai rai yang mung mahtai n jaw ai hku pru chye ai lam tsun da nga ai.

Oximeter jak hpe lang ngut shagu pasi hta tsa machyan madit la nna bai gatsut san seng da ya mung  na ra ai.Oximeter ni a jaw teng ai mahtai pru na gaw jak hta mung madung rai nga ai.Ya ten line ntsa hkan, gat hkan dut shabra ya taw ai Oximeter jak n kau mi gaw masat da ya ai madang n dep ai jak ni lawm nga ai majaw atsawm jep yu nna madang dep kaja ai jak hpe mari lang na ahkyak nga ga ai ngu hpaji jaw tsun shadum ya mayu ai.

Bai nna ya aten facebook lang ai,wechat lang ai hte kaga media lam yan ntsa hta Covid ana mai tsi nga nna tsi hpun, tsi lap ni grai matsun shabra nga ma ai re.Tsi hpun,tsi lap law law gaw anhte a makau grupyin hta nga ai shingra tu ai tsi hpun,tsi lap ni law ai hpe mung mu lu ai. Line ntsa kaw tsun shabra shagu tsi kaja re ngu kam nna lai jang hkra jai lang ai hpe grai sadi ga ngu nna mung tsun shadum mayu ai. Tsi ngu ai gaw lawan mai mayu ai majaw nga nna lusha sha ai zawn, hku lu ai zawn majoi mi lu sha,jai lang ai baw nrai nga ai.Shi a shadawn shadang ngu ai nga ai hkrai re hpe dum ga. Nau law jai lang ai gaw tsi n tai ai sha,hpyen bai tai wa chye ai hpe dum ga. Gara tsi hpun, tsi lap ngu nna gaw n tsun sai, kaja wa lu mai,sha mai na re kun, tinang a hkamja lam hte htuk ai kun ngu ai hpe kaja n kaja ginhka la chye nna shadawn sharam rai lu sha jai lang ga ngu n gun jaw tsun shadum ya mayu ai.

Bai covid ana byin nna nsa sa nhkru ai, n sa sa chyat ai masha ni hpe shagum yup yang kaja ai lam mung tsun nga ma ai re.Hpa majaw shagum yup yang kaja ai hpe sagawn yu ai shaloi Covid -19 virus ana kanu ni a majaw pru wa ai mahkak hte ntsin ni a majaw bum ai lam byin wa ai ten hta nbung hku majaw kaji ni gaw apyet dumpa wa nna nsa sa yak ai,sai kata oxygen law hkra nlu ai lam ni byin wa ai re lam ntsa lam tsun da nga ai.

Dai zawn rai byin ai shaloi shagum up rai galeng dat ai rai yang oxygen ra kadawn shadang yawm mat na,ba ai lam hkyamsa mat ai hte sinwawp kata nbung grau lu shang ai majaw oxygen shadang bai rawt wa lu ai.Dai majaw oxygen hkrat taw ai machyi masha ni gaw lani mi hta hkying hkum 12 jan daram shagum yup ya na kaja ai lam matsun da nga ai.Hkying hkum masum din nna n gyeng hku galeng dat, ngut jang bai shagum nna galeng dat rai galaw ya mai ai.Shagum yup ai shaloi n gup hte ladi hpe baw hkum hte nmai magap pat da na hpe chyawm gaw sadi ra na ga ai re.

Shiga madat ni yawng ya byin taw ai Covid-19 kapbra ana  zinli kaw nna lawt lu mu ga law.Mungkan masha yawng Karai Kasang a chyeju hte ngwi pyaw hkam kaja nga mu ga.

Lamang tang madun ai - Julia Ja Ing