Mungkan Ga Gaw Anhte Shinggyim Masha Yawng A Matu Langai Sha Re Ai Shanu Shingbyi Shara Rai Nga Ai

Mungkan Ga Yawn Madai Taw Nga Sai

Tsawra ai shiga madat Nu Wa Hpunau ni anhte shanu nga ai mungkan ga hpe tsawra ga.Anhte a makau grupyin shingra tara hpe makawp maga la nga ga.Daini mungkan ga gaw yawn madai taw nga sai re.Mungkan ga hte makau grupyin shingra tara hpe tsawra makawp maga chye na matu Wa Sarabyin Francis a matsun laika rai nga ai Nang Madu Kaw Hpung Shingkang Shakawn Kungdawn Anga Nga U ga Law ( Laudato Si ) hta mung anhte mungkan masha ni yawng hpe ra ahkyak dik ai lam ni hpe madi madun matsun da ya nga ai re.

Mungkan ga gaw anhte shinggyim masha yawng a matu langai sha re ai shanu shingbyi shara rai nga ai.Daini anhte shanu nga ai mungkan ga ndai,langai sha re ai shanu shingbyi shara wa gau ngwi ngwi rai hten za wa magang nga sai.Laning hte laning grau grau kahtet jat wa ai hpe anhte hkrum sha ra nga ga ai  gaw mungkan ga ntsa nga pra ai asak hkrung baw hpan yawng a matu hkrit tsang hpa shara nan byin taw nga sai.Hpun kawa,nam maling ni,hka kata nga asak hkrung ai baw hpan nga,ashu ashan ni,hkarang kawng e nga ai asak hkrung ai baw hpan dusat du myeng amyu myu hkum sumhpa ni wa nli mat magang wa nga ai.

Du hkra ladaw galai shai wa ai,jan laja lana ja sawng ai,lamu hpawng ladu lai ai,marang htu ladu lai ai,hka kaba,hka mawru ru,nbung laru kaba wa,nnang nawn nawn ai,sharut ga gyi ai ndai zawn re ai shingra hpyen ni law wa nga ai.Ndai lam ni hpe kadai shabyin dat ai rai nga ai kun? Nang ngai anhte shinggyim masha ni galaw ai majaw byin ai lam grau law nga ai hpe mu mada lu ai.Anhte a shinggyim masha ni a marin law hpa myit,tigyeng akyu hpe madung tawn ai myit ni a majaw mungkan ga hte makau grupyin shingra tara hpe tsawra makawp maga la ra ai tara hpe tawt lai taw nga ga ai.

Dai majaw tsawra ai shiga madat Nu Wa Hpunau ni anhte shanu shingbyi nga ai,langai sha re ai shanu shingbyi shara mungkan ga hpe tsawra makawp maga la na gaw anhte nang ngai yawng hta lit kaba nga mali ai re. Dai ni na mungkan ga hta hpun kawa hte hka shi hka nu ni hpe nau zingri kau ai majaw du hkra ladaw ni galai shai wa ai,mahtai tam nmu ai ana zinli ni mung grai law jat wa ai hte mungkan gaw ahpye alam rai nna machyi hkrum yawn madai taw nga sai re.

Anhte a tinggyeng akyu ara hpe nau shanang ,madung tawn ai myit jasat,mungkan ga a namak lawhpa myit marin ai lam ni hpe galai shai kau nna,anhte a ngasat ngasa lai len kaja ni hpe sharawng awng ai myit ,galai shai la na lam tam shajang mayu ai myit rawng ra nga ga ai.Karai Kasang hpan da ya ai mungkan ga hte makau grupyin shingra tara hpe jahten shaza, ningma hkang shakap nna machyi yawn madai shangun ai lam hta anhte nlawm saga,dai hpe shayawm kau lu hkra makawp maga sa wa na matu anhte nang ngai yawng lit kaba lu ai ni hkrai rai nga ga ai law.

Lamang tang madun ai - Julia Ndawng Ja Ing

Add new comment

9 + 1 =

Please wait while the page is loading

Mungkan Ga Gaw Anhte Shinggyim Masha Yawng A Matu Langai Sha Re Ai Shanu Shingbyi Shara Rai Nga Ai | Radio Veritas Asia

Error

The website encountered an unexpected error. Please try again later.