Lwidwi Si Hta Lu La Mai Ai Hkamja Lam Akyu Ni

Lwidwi si hta e vitamin C grai law ai hku rawng ai rai nna vitamin A,vitamin B,carbonhydrate,potassium,magnesium,selenium,zinc dat,phosphorus,folic hte mawm dat zawn re ai akyu jaw ai dat ni rawng nga ai.

Ndai akyu jaw ai dat ni a majaw lwidwi si sha nna lu la mai na hkamja lam akyu ni gaw (1) bawnu magam bungli hpe kaja shangun ai – lwidwi si hta rawng ai potassium,folic hte kaga dat jasat rai ni gaw bawnu hte maju lasa ni a matu grai madi shadaw garum ya lu nga  ai.Dai majaw lwidwi si ding run sha ya ai a marang e Alzheimer ana,nyan marai hten mat ai ana,jahkring hkring malap ai lam ni hpe shayawm kau ya lu nna bawnu matsing nyan hpe grau kaja wa shangun lu ai.

2)Salum hkamja lam hpe garum ya lu ai – lwidwi si hta rawng ai mawm dat,potassium,vitamin C hte vitamin B6 ni gaw salum hkamja lam a matu garum ya lu nga ai.Sai kata na n kaja ai cholesterol hpe mung shayawm jahkrat kau ya lu ai.Lwidwi si sha ya ai a marang e sai byip n-gun hpe shayawm kau ya nna salum sai lam chyum gyip ana byin wa na masa hpe shayawm kau ya lu nga ai.

3) Sade a matu kaja ai  – lwidwi si dingrun sha ya ai,shing nrai lwidwi si gayau ntsin galoi mung lu ya taw ai gaw jit sa lam hpe n-gun jat jahpring ya nna hka sa lam hta ana kanu shang ai hpe makawp maga ya lu ai zawn sade hta nlung rawng ai lam nbyin hkra mung garum ya lu nga ai.

4)Ana Kanu Kap Ai Lam Shayawm Ya Lu ai – lwidwi si hta vitamin C alaw ahtam rawng ai majaw hkum hkrang a hkamjan n-gun sharawt ai hta kaja nna shing gang kaw na ana kanu ni loi loi hte nkap shang wa hkra makawp maga ya lu ai.

5) Cancer ana byin masa kaw na shayawm ya lu ai – lwidwi si hta Phytochemicals grai law rawng ai majaw hkum hkrang hpe hkra machyi nna cancer ana byin shangun ai free radicals ni hpe ning hkap kau ya lu ai.

6) Hpyi hte kara hkamja lam a matu kaja ai – lwidwi si hta rawng ai vitamin C gaw hkamjan n-gun kaja shangun ai sha nrai,hpyi hte kara a matu mung ahkyak ai protein myu mi rai nga ai collagen protein  htuk shapraw ai hpe mung garum ya lu nga ai.Dai sha n-ga vitamin A dat rawng ai majaw mung kara tsawm kaja na matu garum ya lu nga ai.

7) Shat kan hte pu hkamja lam hpe garum ya lu ai – lwidwi si hta mawm dat grai law rawng ai majaw shat kan hte pu lam hpe hkamja shangun nna kan sa man ai,kan chyat,kan shing dang ai lam nbyin hkra makawp maga ya lu ai.Pu kaba cancer byin wa lu masa hpe mung shayawm kau ya lu ai lam ni gaw lwidwi si sha nna lu la mai ai hkamja lam akyu ni rai nga ai.

Tsawra ai shiga madat nu wa hpunau ni anhte sadi ra na langai mi gaw lwidwi si hta potassium dat grai law rawng ai rai nna sade n kaja ai rai yang dai potassium dat hpe nlu shapraw kau ai majaw hkum hkrang kata potassium dat grai law wa ai.Dai majaw sade ana lu ai masha ni,sade n kaja ai masha ni gaw lwidwi si hpe nsha yang kaja ai,sha ai raitim law law nmai sha na hpe sadi jaw matsun da ai lam ni mung nga nga ai majaw tinang a hkamja lam masa hta hkan nna lwidwi si a kaja ai akyu hpe hkam la nga ga law.