Labyi Lap Mung Shingra Tsi Kaja Langai Rai Nga Ai

Tsawra hkungga ai shiga madat nu wa hpu nau ni dai ni na hkam kaja lam machye machyang hka ja lamang hta gaw labyi lap hpe mung shingra tsi mawan hku nna jai lang mai ai lam hpe garan kachyan ya mayu ai.

Kaja wa nga yang labyi lap gaw lusha dat grai law rawng ai namlap rai nga ai. Labyi lap hta Vitamin C, zinc dat, calcium dat, hpri dat, potassium dat, phosphorus hte maganesium dat ni grai law rawng nga ai. Dai majaw labyi lap gaw chye jai lang ai rai yang grai akyu jaw ai shingra tsi mawan tai ai malu masha langai rai nga ai hte sin a matu mung grai n-gun byin lu ai namlap langai rai nga ai.

Labyi lap sha ya ai gaw hkum hkrang  kata na nbung hte kahtet dat ni hpe la shatsai kau ya lu ai lam chye lu ai. Bai nna baw sin ai, sai kan sa ai hpe tsi shamai ai shaloi mung grai garum ya lu nga ai. Labyi lap gaw sai shan hkam kaja hkalung tsawm hkra mung garum ya lu ai. Jahkru ai hte katsi lawt waw shawn ai hpe mung hkyamsa shangun lu ai. Sai n’gun kaja nna kan chyat kan shingdang ai lam hpe hkyamsa shangun lu ai. Pu jat mawng cancer ana hte sin cancer ana n byin hkra mung ning hkap kau ya lu ai. Labyi lap gaw mi sha tsun ai hte maren sin a matu grai akyu jaw garum ya lu ai re majaw sin bum ai, sin hten za hkra machyi ai lam n byin hkra makawp maga ya lu nga ai.

Labyi lap gaw hkum hkrang hta jan rawng ai sau shajan ni hpe jahkru kau ya lu ai majaw hpum shayawm na matu mung akyu jaw nga ai re. Labyi lap hta e sai kata na n kaja  jumdwi dat hpe shayawm kau ya lu ai atsam rawng ai rai nna jit dwi rawt shadang hpe shayawm kau ya lu ai. Sai kata na n kaja ai cholesterol hte sau shajan ni hpe shayawm kau ya lu ai re majaw sai lam lasa gyip ai mang hkang kaw nna makawp maga ya lu nhtawm salum hpe hkam kaja shangun lu nga ai. Sai tung sai rawt ai lam hpe shayawm kau ya lu ai atsam rawng ai.

Myi n’gun kaja shangun ai. Myi mang hkang langai rai nga ai myi ram ram ai lam lama byin wa ai rai yang labyi lap hpe wa sin hte a mani rai hkra hkak atawk nna kabaw sha ya ai rai yang, myi ram ram ai ana lawan dik ai hku mai tsai mat lu ai lam myi chyaw nan mu yu ai hpe mung  tsun dan garan kachyan ya mayu ai. Ndai myi ram ram ai ana gaw asak naw kaji ai ma ni hta mung byin chye nga ai re. Dai zawn lama byin wa ai rai yang labyi lap a katsing re ai hpe di la nna wa sin hte a mani di ahkak nna kabaw sha ai rai yang lawan ai hku myi bai mu lu na ra ai. Wa sin mung katsing hprap hprap re ai lu mai yang grau kaja ai.

Labyi lap a myi hte seng nna akyu jaw, tsi tai ai lam hka ja da lu ai hpe matut tsun ga nga yang labyi lap katsing hprap hprap re ai shing nrai lam jahkraw da ai hpe hka gawm masum hta na gawm mi sha ngam hkra rai hkying hkum mi daram shadu nna lu ai hka ntsin hpe lani mi hta hpa hka gawm kaji daram rai masum lang lu ya ai mung myi hkamja lam a matu hte sin a matu grai akyu nga ai lam tsun da nga ai. Dai hpe shata masum daram na hkra lu ya mai ai. Grai shalaw lu ai rai yang mung kan mase ai hte hka dat yawm ai lam ni byin wa chye nga ai.

Labyi lap hpe e akyu jashawn jai lang chye ai masha ni gaw tsi mawan hku nna mung malu masha hku nna mung lusha jai lang nga ma ai re. Masha n kau mi labyi lap hpe shadung hte muk kyaw kyaw sha ma ai, n kau mi shat mai ntsin shadu lu nga ma ai. N kau mi gaw hka hpunglum hte kaprawng kau nna gayau sha ma ai. N kau mi rai jang magyeng si hte shat mai hkri ntsin hku shadu lu nga ai zawn n kau mi gaw hpa hka shatai tsing lu rai nna akyu jashawn lusha jai lang chye nga ma ai re. Labyi lap gaw ana ahkya law law hpe tsi shamai ai hta akyu jaw garum ya lu ai hte hkum chying n’gun hpe mung sharawt ya lu nga ai.

Labyi lap hta e ana kanu ni hpe sat kau lu ai, bum ai hpe jasip shayawm ya lu ai atsam nga ai hte ningma mai tsai hkyamsa shangun lu ai atsam ni rawng ai majaw hpyi hkamja lam a matu mung akyu jaw garum ya lu nga ai. Hpye ningma ni nga ai rai yang labyi lap hpe grai prut hkra shadu nna htawn katsi shakawp tawn ai hpang lap apa hpe jen kau nna ningma kashin ya mai ai hte hpyi gaya ana ni byin yang mung shamai ya lu ai lam chye lu ai.

Tsawra ai shiga madat nu wa hpu nau ni labyi lap gaw shingra tsi mawan langai hku akyu jaw ai dat atsam ni rawng ai re nga tim shi hpe lusha jai lang ai shaloi sadi la ra na lam ni mung nga ai hpe chye tawn da na ra ga ai. Labyi lap hta salum hpe akyu jaw ai dat ni rawng ai, raitim aten galu sai rawt ana lu ai masha ni a matu labyi lap shup gayau ntsin, shadu ntsin ni lu na matu sarawun ni hpaji jaw matsun ai lam n nga ai. Masha n kau mi dat n htuk ai lam byin chye nga ai. Tinang hta labyi lap jai lang lusha nna dat n htuk ai kumla ni lama byin wa ai rai yang n matut lu ai sha jahkring kau na ra ai, ra ang wa jang sarawun ni hpe sa madun hpaji hpyi na ra ai. Labyi lap,labyi si ni sha ngut ai hpang kan mase wa ai rai yang mung labyi lap, labyi si ni hpe gara ladat hte raitim lusha ai hpe n matut galaw sai sha jahkring kau na ra ai lam hpe sadi la chye ga ngu tsun shadum ya mayu ai.

Shingrai tsawra ai shiga madat nu wa hpu nau ni ndai labyi lap gaw shingtai rem ai ni a matu shingtai shat hku nna akyu jaw ai sha n-ga anhte shinggyim masha ni a matu mung chye jai lang ai rai yang  hkam kaja lam akyu law law hpe jaw ya lu ai tsi mawan kaja, lusha kaja rai nga ai ngu garan kachyan ya dat lu ga ai.