Hpa Garai Nsha Ai Ten Coffee Lu Yang Hpa Byin Wa Na Kun

Hpa Garai Nsha Ai Ten Coffee Lu Yang Hpa Byin Wa Na Kun

 Anhte Shiga madat ni hta coffee lu ai masha ni grai law nga na hpe kam ai.Rai yang nang coffee hpe galoi ten hta lu nga ndai kun? Jahpawt bungli sa ra ai,jawng sa ra ai,rung hpang hkrat wa sai nga nna tin shapun rai coffee gawm mi hpe sha kahtet kamawt rai gayau lu mat nna manap shat shatai kau dat dat re ai kaw nang lawm nga ndai kun?

Coffee lu ai gaw n kaja ai majaw I nga yang, nre,coffee lu ai gaw kaja nga ai.Raitim coffee kaman hpe sha manap shat shatai nna lu taw ai gaw n kaja ai ngu tsun mayu ai.Hpa majaw nga yang  jahpawt shagu coffee gawm mi hpe sha, lu ya taw ai gaw shat kan hpe hkra machyi jamjau jaw shangun lu ai nga nna hkam ja lam the seng ai machyoi hpaji ninghkring ni hpaji jaw matsun da ai kaw na chye lu nga ai.

Hpa majaw re ai hpe matut sang lang da ya ai hta hydrochlorate acid ngu ai gaw lu sha rin  shamyit lu na matu kaja dik madi shadaw ya lu ai dat rai nna malu masha sha ai shaloi,sama marawp manam ai shaloi hte myit sumru ai aten ni hta dai acid dat ni pru wa ai.Caffeine dat lawm ai coffee hpe lu ai shaloi hydrochlorate dat grau shapraw ya lu ai rai nna dai zawn hydrochlorate dat grau law shapraw taw ai ten shat kan hta hpa mung nsha bang da ai rai yang, na a shat kan hpe teng sha jam jau wa jaw ya na re nga nna tsun sang lang da ya nga ai.Dai majaw jahpawt manap shat hpe coffee gawm mi hte sha n shangut kau ga,nlaw htum  pawng muk shing nrai muk jahkraw pa zawn re ai sha pyi, sha shalawm ya ga ngu tsun shadum ya dat mayu ai.

Jahpawt manap coffee lu ai gaw kaja ai lam langai mung rai nga ai.Hpa majaw nga yang coffee hta lawm ai caffeine dat gaw myit ni hpe shinggyin ya lu ai,set lasau nga zet tsang ai hpe hkam sha shangun lu ai  hte coffee a majaw lu la mai ai kaga akyu ni mung law law rai nga ai.Rai tim mi sha tsun sai hte maren shat kan kaman hta coffee gawm mi hte sha manap shat shatai taw ai hpe gaw n galaw ga,bai coffee hpe ra ai ngu nna grai law lu jang mung masin gari,masin kahprap ai,salum adawt gasat hkrum ai,yup nmai ai ndai zawn re ai dingbai dingna ni bai hkam sha ra chye nga ai hpe mung chye tawn da nna sadi sahka,shadawn sharam rai lu let hkam kaja ai akyu hpe hkam la nga ga law.