Hkumli Tsin Si Hta Na Lu La Mai Ai Hkamja Lam Akyu Ni

Anhte galoi mung sha taw nga ga ai hkumli tsin si gaw hkamja lam hte mung grai htap htuk dik la ai lu sha langai rai nga ai.Hkumli tsin si hta na lu la mai ai hkamja lam akyu ara ni hpe hkaja dat yu ai shaloi lu sha rin shamyit loi ai majaw kan chyat,kan shing dang ai masha ni sha ya na htap htuk ai.Bai nna calorie rawng shadang yawm ai majaw hkum hkrang hpum shayawm mayu ai masha ni,jit dwi ana lu ai masha ni hte mung htuk ai lu sha rai nga ai.

Shat kan ana lu ai masha ni hkumli tsin si htu shup ntsin hpe jahpawt jau jau lu ya ya di ai rai yang shat kan bum ai ana hpe shamai ya lu ai. Jit sa ai shaloi sai lawm ai,sinwawp kaw na sai yun ai ana lama byin ai rai yang hkumli tsin si ntsin hpe lwi hkri si ntsin hte gayau nna lu ya ai rai yang hkyamsa mai tsai lu ai.Sinbum shan htoi ana byin ai masha ni hkumli tsin si hpe bai nam shan hte shadu sha yang hkyamsa mai tsai lu ai lam tsun da nga ai.Ndai hkumli tsin si gaw bawnu n-gun  kaja na matu sha ya na hkrak ai.Maju lasa,matsing sumhting lasa ni hten za mat ai majaw byin ai ma mu ana hte,myit hkamja lam hkra machyi hkrum ai masha ni dingrun sha ya na htap htuk ai lu sha rai nga ai.

Hkumli tsin si shup ntsin hte jahkring hkring sha n-gup krang garu ya ai rai yang wa machyi ana,wa uji ana,n-gup cancer ana ni nbyin hkra makawp maga ya lu ai.Sai prat ai,kan sa yang sai lawm ai,sai yun ana lu ai masha ni mung hkumli tsin si htu shup ntsin hpe jaw lu ya yang hkyamsa mai tsai lu ai.Jit shing dang ai,jit hti hti ai,jit sa lam hta nlung rawng ai ana byin ai rai yang hkumli tsin si htu shup ntsin kap masum daram hpe shin hku hte gayau nna jaw lu ya yang mai tsai lu ai.Sinwawp hte seng ai ana hte n gun yawm ai lam ni byin ai rai yang hkumli tsin si hpe git mawng,shaman,lagat ntsin,taw bat ni loi gayau bang nna sha ya ai rai yang tsi kaba byin lu ai lam tsun da nga ai.Sade bum machyi ai,sin bum shan htoi ana byin ai masha ni a matu hkumli tsin si htu shup ntsin hpe jum dwi,glucose ni gayau bang nna lu ya yang hkyamsa mai tsai lu ai.

Jahkru,sinda chyat ana lu ai masha ni hkumli tsin si a ru hpe garang nna hka hpum lum loi mi bang rai gayau nna sha ya yang mai tsai lu ai.Ndai hkumli tsin si gaw anhte shinggyim masha ni a matu sha nrai,du sat ni shinglet hte lahkru hpye machyi  li byin ai rai yang hkumli tsin si hpe ahpa hpa rai galep nna jaw sha yang mai tsai lu ai.Dai re majaw anhte galoi mung sha taw nga ga ai hkumli tsin si gaw sha mu la ai shat mai lu sha kaja rai nga ai zawn tsi mawan kaja langai mung rai nga ai hpe daini anhte hkaja la lu saga ai rai nna grau nna akyu pru ai hku jai langa lu sha chye nna myit masin,hkum hkrang ngwi pyaw hkam kaja ai akyu hpe hkam la nga ga law.