Hkrang Pan A Hkamja Lam Akyu

Ndai lamang hta gaw anhte galoi mung sha taw nga ga ai, hkrang pan hta na hpraw nsam nga ai hkrang pan hte tsit nsam nga ai hkrang pan yan gaw gara madaw grau kaja ai re kun ngu ai hpe hka ja la yu ga. Hpa majaw nga yang hkrang pan hpan hkrai re nga tim tsit ai hkrang pan gaw grau nna tsi tai ai, grau  kaja ai nga nna tsun ai masha, sawn la ai masha law law nga ai hpe mu lu, na lu nga ga ai.

Ndai hpan lahkawng yan gaw hkrang pan hkrai rai nna, hpraw ai hte tsit ai nsam shai hkat ai sha rai nga ai, nsam nbung tim shi hta rawng ai dat atsam gaw grai wa shai hkat ai lam n nga ai sha yawng ngu na daram bung ai hpe chye lu ai. Hkrang pan hta  rawng ai dat atsam ni gaw mawm dat grai law rawng ai zawn vitamin C, vitamin K hte bum jasip shayawm ya lu ai atsam hte anti oxidant dat arai ni rawng nga ai. Hkrang pan hta e vitamin C rawng ai a majaw hkum chying ninggun kaja shangun nna vitamin K rawng ai gaw sai ngap shangun na hte nra ja dinghkak lu na matu garum ya ai, calorie yawm nna mawm dat law rawng ai re majaw hkum num nak hpe rawt jat ai lam n byin hkra garum ya lu ai. Lusha rin kaja nna kan sa man na matu garum ya lu nga ai.

Hkrang pan hta e choline rawng ai majaw atsawm sha yup pyaw lu nna matsing nyan kaja ai, sharin hkaja lu na atsam kaja ai zawn lasa shan shamu shamawt kaja na matu garum ya lu ai. Ndai zawn re ai dat atsam ni sha n-ga hkrang pan hta myit hte hkum hkrang hpe hkam kaja shangun lu ai lusha dat ni rai nga ai vitamin B, phosphate, manganese hte potassium ni mung rawng nga ai. Ndai zawn re ai Lusha n’gun dat ni law rawng ai majaw hkrang pan gaw salum hkam kaja lu nna mawng cancer ana hpan n kau mi n byin hkrum hkra makawp maga ya lu nga ai.

Tsit ai hkrang pan gaw akyu grau law ai kun ngu ai hpe hkaja yu yang tsit ai hkrang pan hta hpraw ai hkrang pan htan vitamin C rawng shadang grau law nna hkam jan lu na hkum chying ninggun kaja na matu grau nna akyu jaw garum ya lu nga ai. Vitamin K hte mawm dat rawng ai lam, calorie yawm ai lam hte kaga dat atsam ni rawng ai lam  gaw hpraw ai hkrang pan hte maren re ai lam chye lu ai. Bai cancer mawng ana hpe shayawm kau ya lu ai drup pound langai rai nga ai sulforaphane mung rawng nga ai. Dai re majaw tsit ai hkrang pan hte hpraw ai hkrang pan yan gaw gara madaw grau kaja ai ngu ai hta lahkawng yan gaw lusha dat law rawng ai hkrai rai nga ai.

Hpraw ai hkrang pan hta gaw vitamin C rawng shadang tsit ai hkrang pan na daram n law ai raitim mawm dat hte calcium dat rawng ai lam gaw n yawm nga ai. Dai sha n-ga vitamin K hte choline zawn re ai bawnu hpe akyu jaw lu ai lusha dat ni mung grai law rawng nga ai. Tsawra ai shiga madat ni namlaw namlap shagu, grau nna shingra tu ai, shingra ladat hte hkai nna lu ai namlaw namlap simai simaw shagu gaw hkam kaja lam a matu kaja ai akyu hpe jaw ya nga ai majaw shani shagu na malu masha hta bang shalawm shadu sha nga ga ai rai yang myit hte hkum hkrang hkam kaja lam lahkawng yan hpe teng sha akyu jaw garum ya lu na rai nga ai.

Rai yang hkrang pan sha nna lu mai na hkam kaja lam akyu ni hpe bai yu yu ga. Hkrang pan gaw lusha n’gun dat grai law rawng ai hkam kaja lam akyu jaw lusha simai langai rai nga ai. Shi hta rawng ai lusha dat ni gaw salum ana, cancer ana ni byin wa lu ai hpe shayawm kau ya lu ai. Hkrang pan hta e calorie yawm nna vitamin dat grai law rawng ai rai nga ai. Nang hta ra kadawn taw ai vitamin hte nhprang dat yawng ngu na daram hkrang pan hta rawng ai lam tsun da nga ai. Tsit ai hkrang pan gram ( 128 ) daram re ai shat mai gawm mi hta e calorie 25, mawm dat gram 3, vitamin C lani mi ra kadawn ai a tsa shadang ( 77 ) %, vitamin K lani mi ra kadawn ai a tsa shadang 20%, vitamin B6 lani mi ra kadawn ai a tsa shadang 11%, folic lani mi ra kadawn ai a tsa shadang 14%, penthothenic acid lani mi ra kadawn ai a tsa shadang 7%, potassium lani mi ra kadawn ai a tsa shadang 9%, magnesium lani mi ra kadawn ai tsa shadang a 4%, manganese lani mi ra kadawn ai a tsa shadang 8%, phosphate lani mi ra kadawn ai a tsa shadang 4% ni rawng nga ai.

Bai hkrang pan gaw mawm dat grai law rawng ai baw simai namlaw namlap langai rai nna mawm dat lani mi ra kadawn shadang a tsa hta 10% shadang du hkra rawng nga ai. Mawm dat gaw shat kam pu lam hta akyu jaw ai bacteria ni hkrung grin nga lu na matu garum madi shadaw lam shabyin ya nga ai. Shat kan bum ai lam hpe shayawm kau ya nna mawm dat law hkra sha bang ya ai gaw kan chyat, kan shingdang ai, pu bum ai, pu lam shakum na majaw kasha ni bum machyi ai mang hkang n byin hkra makawp maga ya lu ai.

Mi sha tsun sai hte maren hkrang pan hta calorie rawng shadang yawm ai a majaw hkum num nak rawt jat ai lam n byin shangun nga ai. Dai sha n-ga hkrang pan hta rawng ai mawm dat gaw shat kan rin shakrai ai hpe lanyan gau ngwi shangun ai majaw kan hkru taw ai hkam sha lam hpe byin shangun nga ai. Dai majaw calorie law rawng ai malu masha ni sha mayu jat ai myit kaw na makawp maga ya lu nna hpum jat wa ai lam n byin hkra garum ya lu nga ai.

Bai nna hkrang pan shat mai gawm mi hta choline dat 45mg rawng nga ai. Dai gaw shayi num ni a matu lani mi ra kadawn ai a tsa shadang 11%  rai nna shadang la ni a matu tsa shadang 8% rai nga ai. Choline gaw hkum hkrang kata cell sap sanap ni ngang kang lu na, DNA kahkyin shachyaw ai, nsoi byin masa lam hpe garum ya ai ndai zawn re ai ahkyak ai magam bungli ni hpe galaw ya taw nga ai. Bawnu nyan marai hte seng ai, maju lasa hte seng ai lam ni hta grau  kaja wa hkra galaw ya taw nga ai rai nna Alzheimer ana zawn re ai maju lasa hte seng ai ana ni, sin ana hte salum ana ni byin wa mai ai kaw nna shayawm kau ya lu ai lam machye machyang hpe garan kachyan ya dat lu ga ai. Tsawra ai shiga madat nu wa hpu nau ni yawng shani shagu na tinang lu sha na, shat mai malu masha ni hta hkrang pan zawn re ai simai simaw namlaw namlap ni lama mi nrai lama mi lawm hkra  bang shalawm shadu sha nna asak galu hkam kaja ai akyu hpe hkam la nga ga law.