Hkai ga rem ga lamang, Aug 15, 2018

       

          Tsawra hkungga ai shiga madat Nu Wa hpu nau ni, daini na hkairem lamang hta English hku gaw “Jasmine” myen myu sha ga hku gaw "Sabye Pan" ngu shamying ai "Kadawn Pan" hpe gara hku hkai ra ai, kaning re lamu ga hpe ra sharawng ai kun? gade ram kyu rawng ai rai kun? madat hka ja yu ga.

          Nu Wa ni, sama hawm ai nam pan, n’sam tsawm ai nam pan hpe n’ra ai masha, n’dai mung kan hta nga na n’re ngu shadu ai. Mungkan mungdan shagu ngu na ram hta, marai langai ngai hpe shakawn shagrau ai, awng padang poi ni hta, n’dai kadawn pan hpe chywi n’na mi rai rai, shing n’rai, shabawn nna mi rai rai , shakawn shagrau jaw chye nga ga ai re. Bai nna, Nawku jawng shagu ngu na ram hta, dum n’ta nawku tawn hkan mung kadawn pan hpe chywi hkawan la nna, tawn shatsawm ai hpe mung mu lu nga ga ai. Anhte Myanmar mungdan na hpu nau Buk-da ni nga jang shanhte a ze-ti ngu ai gaw ngu n’tsa hkan hpring chyat hkra ap jaw nga ma ai re. Ndai kadawn pan hpe madung hkai ai mungdan gaw anhte Myanmar mungdan hte, Asia dan a, dingda maga grau hkai ai hpe mu mada lu nga ai re.

          Hpa majaw nga jang n’dai kadawn pan gaw, sama hawm ai sha n’ga, n’sam mung grai tsawm ai majaw rai nga ai. shi a n’sam gaw hpraw tu nna, htap hte htap lam hte lam rai grai nan ra sharawng na zawn rai hkra tsawm ai majaw rai nga ai. Anhte Myanmar mungdan a kanu Awng San Su Kyi hpe yu dat ai shaloi, ten shagu ngu na ram hta, n’dai kadawn pan shing n’rai, num ri pan hpe kai tawn da ai hpe mu lu nga ga ai re. Myen myu  sha ni a ga malai hta, “ nampan yawng hta, hawm htum nampan, kadawn pan” nga nna pi tsun shaga nga ma ai lam chye lu nga ai. kadawn pan a sama gaw manam pyaw ai sha n’ga, myit hpe pi a’san sha nga hkra shapyaw ya lu ai a’tsam nga ai nga nna mung tsun nga ma ai.

           Bai nna, kadung pu zawn, hkyen bum zawn hpraw nna, yu mada chyai na zawn sha rai nga ai. Shara ra de hkawm sa ai shaloi, Ndai kadawn pan hpe mawdaw ni lai sa lai wa shara ni hkan, mare buga kahtawng shagu na gat hkan, mawdaw ni hkring sa ai shara hkan, dik shale lam maw hkan hkawm nna, mung dut nga ma ai hpe mu lu nga ai. Dai ram du hkra kadawn pan hpe manu shadan nga ai rai nga ai. Ndai ram tsawm ai, manam hawm ai kadawn pan hpe anhte a dum n’ta wang grup grup, yin yin hkan hkai yu ga, shing n’rai kan bau bungli magam langai hku mung hkai hpang wa yu saga. Reng gaw gara hku shawng hkai hpang na rai kun?

          Nu Wa hpu nau ni, n’dai kadawn pan hpe gaw n’li dum hpe hkai ai n’rai nga ai. kadawn pan hpe ladat lahkawng hte mai hkai nga ai. no. 1 ngu na ladat hta, hpun lakung hpe atsawm sha daw la n’htawm me, greng ai kadawn pan hpun hta matut nna, bawng la ai ladat hte hkai ai hpan rai nga ai. No.2 ngu na hta gaw, kadawn pan hpun n’dung loi greng ai hpe daw la nna, kalang ta ga kata de n’hkun loi htu nna , namhpun the htu da ai ga hpe, hkrak di gayau nna hkai yang mung mai nga ai. Dai ladat lahkawng hte hkai jang mai byin sai rai nga ai. Dai majaw, n’dai kadawn pan hpe hkai ai shaloi mung Num ri pan hpe hkai ai zawn sha , grai lakawn la ra ai.

          Reng gaw n’dai kadawn pan hpe hkai ai shaloi lang ra ai nam hpun ni gaw hpa ni rai kun? kadawn pan hpun ra sharawng dik nam hpun gaw, lamu ga loi nya nya re ai , rai nga ai. Bai, Nga hkyi, shingra nam hpun, hpunni hkraw nna, manyi mat ai lamu gasau ni rai nga ai. magyep kap ai lamu ga hpe nau n’ra ai hpe mu mada lu ai. Myanmar mungdan a Ayeyarwaddy ginwang hte Thanintaryi ginwang ni hkan gaw shingra tara gahtet ai rai tim, U hkyi hte numhkaw hpe kadawn pan hpun pawt hkan bang ya rai hkai ai hpe mu lu nga ai. Ginhtawng , lanam, n’shung n’nga, mai hkai ai re majaw anhte a wunpawng buga shara shagu hkan mung mai hkai nga ai re. kadawn pan myu hpan law law nga ai nga nna mung tsun da nga ai. Law malawng anhte Myanmar mungdan hta gaw, pu lap law ai kadawn pan hpe pulap ran ran re ai kadawn pan hpe sha law wa hkai ai hpe mu lu nga ai. Pulap law ai kadawn pan hpan gaw, Lanam n’nan shang wa ai ten hta grai pu tsawm lawan ai hpe mu lu nga ai. Sama mung grai hawm ai sha n’ga, pu mung grai kaba ai rai nga ai.

          Ndai kadawn pan hpun hpe hkai ngut ai ten kaw nna, shata lahkawng jan, masum ram rai jang pu pu sai rai nga ai. kadawn pan hpun langai mi hta, nampan pu latsa hkawng tsa kaw nna, manga tsa ram du hkra pu ai hpe mu lu nga ai. Dai zawn kadawn pan pu nga ai shara hku lai wa sai hte gaw, dai shara kaw sha hkring sa la na zawn nga hkam sha ai rai nga ai.

          Nu Wa hpu nau ni, n’dai kadawn pan gaw ginra shara n’lata ai sha n’ga, nang ,ngai anhte yawng ra sharawng ai nampan re majaw, kadawn pan hpe hkai ai gaw grai kaja ai ngu, mu mada n’ngai re. Bai , shaning tup mung shi a’ten hte shi pu ya taw nga ai re. Gat wang hta manu lu ai nampan mung rai nga ai.  Du hkawm ga ai buga ginra, shara shagu na u’hpung u’ hpawng shagu ngu na ram hta mung n’dai kadawn pan hpe hkai nna, kan bau magam galaw ma ai hpe mu mada lu n’ngai re. Machye machyang hpaji, galaw shapraw ai ladat hpaji chye ai mungdan ni gaw, n’dai kadawn pan hpe myen myu sha ga hku “ Yee Mwi” ngu ai hawm ai sama n’tsin ni hpe gun rai shatai nna, htuk shapraw jai lang nga ma ai. Dai majaw, hkai na lamu ga mai byin ai anhte a mungdan ginra shagu hkan mai byin ai made mi law law hkai nna, dut ai rai yang grai akyu jaw ai kan bau magam bungli langai mung rai nga ai ngu gahtap nna, n’gun jaw dat n’ngai law.

Ka Lajang ai –    Mama Rose Angeline Maran Nang Doi

                              Myitkyina, RVC Ginjaw Rung

Add new comment

7 + 7 =

Please wait while the page is loading

Hkai ga rem ga lamang, Aug 15, 2018 | Radio Veritas Asia

Error

The website encountered an unexpected error. Please try again later.