Awng Mae Nyo ngu ai (Palam La) Nampan Pu Hkai Ladat

Aung Mae Nyo (Butterfly pea ) hpun Hkai Ai Ladat (Palam la nampan)

   Tsawra ai shiga madat Nu Wa Hpu nau ni,ndai lamang hta gaw tsi byin nhtawm gat lawk hta mung shara la wa nga ai myen myu sha ga hku na Aung mae nyo ngu ai jinghpaw ga hku gaw laksan shamying da ai lam n nga ai hpe chye lu ga ai.Ratim nkau mi gaw Palam la nampan ..ngu nna mung shamying nga ma ai.

  Ndai Aung mae nyo nampan pu hpe hka tsing nhtawm lu mai ai zawn,shat (sh) nbaw shat ni hte mung shadu sha mai ai zawn,hkaw soi ,kyauk kyaw,cake muk ,yae gae muk ,thar kuu n dai zawn amyu myu mai galaw nga ai.Dai majaw Aung mae nyo hpun hpe sut masa hku na gara ladat hte hkai ra na ngu ai hpe tang madun garan gachyan ya dat ga ai.

  1.Aung mae nyo amyu hpan ni – Shawng de aung mae phyu,aung mae nyo,amaw nsam nga ai nampan,bai na ya ten hta sumwum pu nsam ,saba nsam ndai zawn nsam myu hkum sumhpa hte htap lahkawng apu ni du hkra hkum sumhpa mari la mai sai rai nga ai.

   2. Hpun tu lu ai buga shara – Myanmar mungdan shara shagu hta mu lu nna lahta myanmar mung hkang bum,may myo,manmaw,shwe bo,meik hti lar hte Yangon ni hta mu lu nga ai.

  3. Lamu ga duhkra ladaw – Npawt nhpang hku na katsi ai duhkra ladaw hpe ra ai raitim madi bam, lum nai ai kaw na hkun hkraw ai kahtet shadang yawm ai duhkra hta hkai kaja nga ai.Ga nlata hkai sha mai nga tim zaini ga,ga hkri dat nga ai ga hta grau kaja nga ai.Hka law nna hkum pup htat ai masa hta n kaja lu ai.Dai majaw hka shalen ,hka htawk shale sadi jaw na matu ra ai.

  4. Hkai ai Duhkra – Marang law law htu ai aten ladaw hta lai na shaning tup hkai mai nga ai.Kahtet lum nai yawm ai buga ni hta ginhtawng ta hta hkai na ten rai nga ai.

  5. Bra ban galaw ai ladat – Tum kaw na raitim,laking matut nna rai tim myu nli mayat la mai ai raitim atum hkai ai hpun gaw shaning hku lat ra nna she apu pu lu ai majaw laking matut ladat hte sha myu nli la ma ai.Tum hte hkai na re yang tum hpe kawp hpa wa hkra langai hte langai gau ngwi arut jaw ra ai.Hkai ai ten hpun lapran hkai yan lapran,3’,6’ rai nga ai.Acre mi hta hpun 2800 daram hkai mai nga ai.Hkai ngut ai hpang bat 2-3 na ai shaloi maku pru wa ai hpe mu lu na rai nga ai.

  6. Namhpun jaw ai lam – Shingra namhpun hpe ra dik rai nna hpun kaji yang hpun lap shatsam hte nga hkyi hpun mi hta tang mi shadang ,kaga shingra dat namhpun tang hka ang hkup daram bai kahtap jaw ra ai.Nga hkyi,U hkyi ndai maza rai ni hpe jai lang mai nga ai.Bai nna latung hkrat yang malup lap kaba tsing shatun da ai hka hpe jaw bang jaw ra ai.

  7. Hka shalen bang jaw ai lam – Kahtet lai ai duhkra ni hta hpun npawt grup grup hta nhkrun htu nna hka jaw ra ai.bai hka ung ai hpe nra ai re majaw hka shaw hkawng ni kaw na hka shaw kau jaw ra ai.

  8. Di la ai lam – Hkai hpang ai nhtoi kaw na shata 2 jan yang apu pu hpang wa nhtawm shata mali jan wa sai hte apu hkum wa sai rai nga ai.Hpun langai hta apu (50) daram lu  mai ai.Pu jahkraw kilo mi hta nampan pu katsing 20000 daram numnak shadang hte bung pre ai.Apu jahkraw ni a manu gaw 100 g hpe 5000 ks daram manu lu mai nga ai.

  Akyu hkam la lu ai lam – Ndai AMN hpe hpahka zawn hka hpum lung hta tsing nna min 2,3 daram re yang mai lu sai.Ndai lu ai marang e, myi man shan madi tsawm wa ai,myi n-gun kaja shangun lu ai,Sai rawt,jit dwi ana lu ai ni mung mai lu nga ai.Nkau mi gaw nampan pu jahkraw da nna tsing lu mai ai.bai nna pu katsing hpe hka hpum lum hta mung mai tsing lu ai.Bai na ya ten gat lawk hta dut shang hpang wa sai lam hpe mu chye lu ga ai.

Ka lajang ai – Elizabeth Nbang Seng Lawt Lu

Website – Kachin.rveritas-asia.org

Facebook-RVA-kachin

Wechat, Viber, Youtube, Instagram & Twitter – RVA-Kachin Service