A Ten ( Youth Program )

Youth And Time Management

 

A ten gaw,anhte yawng a matu manu dan ai ja lung seng nhprang sut rai kaba rai mali ai lam anhte hkap la chye na hpe myit mada ai. A ten hpe jaw ai hku jai lang ai rai yang gaw, anhte a prat yat yat rawt jat galu kaba wa na chyalu sha rai mali ai. A ten  hpe manu dan ai hku n-jai lang ai sha, majoi joi jasum nga shalai kau ai rai yang chyawm gaw, anhta a prat masha wuhpung hta hpang jahtum kaw ngam nga ra na ga ai . Ya na IT prat hta aten hpe manu dan ai hku jai lang na gaw ahkyak kaba dik nan rai nga ai. Hkying hkum 24 sha nga ai lani mi hta myit dat u, nlaw la ai rai nga ai, raitimung anhte malawng maga wa lani mi tup na ten hpe, myit nna, aten grai galu ai zawn shadu let, majoi joi shalai kau ai lam ni grai galaw chye ga ai.

 Kaja wa nga yang magam bungli mai galaw hkawm sa ai ten gaw hkying hkum 12 ram sha lani mi hta rai nna, ngam nga ai ten gaw, n-gun awai yup la na ten rai mali ai. Dai hkying hkum 12 daram sha hta, anhte shamu shamawt shakut shaja hkawm sa nga ga ai. Aten hpe manu shadan let, sak hkrung ai wa a matu gaw, dai hkying hkum 12 ram gaw hpa n-law la ai hpe mung mu lu nga ai. Shalai kau na aten nnga, law pyi nlaw ai hpe mu lu ga ai. A ten hpe manu nshadan nna, majoi joi shalai kau ai wa chyawm gaw, shaning kade mi galai, asak kade mi kaba, prat kade mi galai wa tim, nan nan sha hpa lachyum pru wa na nrai ai hta sha n-ga, hkrat sum lam kaw sha nga taw ra na ra ai. Dai zawn re ai masha gaw, lung hkrung zawn sha galai shai, galu kaba wa ai lam nnga na ra ai. Anhte ni malawng maga gaw, Brang Tai hte Tau Kawk a mau mwi na ga yu ai ni hkrai rai na nhten, dai mau mwi hta taukawk  hpa majaw btang tai gat chyang ai daram ninghkring kaba hpe dang kau a ta? Hpa majaw nga yang, Tau kawk gaw aten hpe man man jai lang ai sha n-ga, aten hte rau hkawm sa ai majaw rai nga ai. Btangtai chyawm gaw, aten hpe yup nna, shalai kau ai majaw shingjawng poi sum ai hpe hkrup sha ra mat nu ai re.

 Dai mau mwi zawn sha, anhte a prat hta mung, ja gumhpraw lu su ai, arawang aya lu ai, hpaji kung kyang ai nga nna, aten hpe majoi shalai kau ai rai taw gaw, masha ni aten hpe manau shadan nna man man hkawm ai ni awng dang kau ai hkrum katut na ga ai hpe myit kraw kata tut e bang da let, aten hpe manu dan ai hku jai lang akyu jashawn ra nga ga ai. Kade mi matsan, hpaji nchye raitim, aten hpe, mau shadan nna, shakut shaja sak hkrung hkawm sa ai rai yang, awng dang lam gaw teng sha hkam la lu na ga ai. Nang na makau grup yin hpe sumru dat yu u, nang chye na ra ai. Aten hpe tup hkrak hkan nna, shakut ai masha hte aten hpe manu nshadan nna, majoi lagawn lamawn nga ai wa  a prat madang kade daram shai ai hpe mu lu na ra ai. Lu Su ai, matsan ai, awng dang ai, n-awng dang ai lam gaw, masha dai wa hte grai seng nga ai. Masha nkau ni gaw, kaji kawoi, kanu kawa ni a majaw, lu su wa ai ni nga ai zawn, tinang hkrai tinang shakut nna, lu sut lu su wa ai ni gaw, malawng maga ni rai ma ai. Dai zawn shakut ai masha ni hpe, anhte kasi la mai nga ga ai.

Ya tsun mat wa ai lam gaw, mungkan ginding aga hte seng nna aten manu dan ai lam rai nga ai. Bai nna sumsing sutgan, sumsing mungdan hta ningngai nga lu na matu mung dai zawn aten hpe manu shadan nna, shakut shaja sak hkrung hkawm sa ra nga ga ai. Sumsing sutgan mahkawng lu na matu aten ahkying shagu gaw, ahkyak la nga ai. Ahkaw ahkang nga yang nga ai zawn mai kaja ai bungli ni hpe shakut galaw ra nga ga ai. Hpa majaw nga yang anhte shinggyim masha ni gaw aten hpe nchye ga ai, galoi ten hta si na, galoi ten hpa byim wa na nchye ga ai re majaw, sadi maja let maikaja ai magam hpe sak hkrung taw nga ai aten, shagu hta, galaw shakut ra nga ga ai. Sekkan shagu minute shagu aten hpe mai kaja lam hpa baw ni galaw la na ngu nna, tut e myit hta bang da ra nga ga ai. Raitim anhte shinggyim masha ni  malaw maga “ Gau Ngwi ’ nga ai gasi grai chye lang ga ai. Aten naw nga ai ya hkring she nga nna, aten shalai chye ga ai. Dai zawn nga ai gaw wenyi lam hta sha nrai, bawng ring lam hta mung, grai dingbai dingna chye jaw nga ai myit jasat rai nga mali ai. Dai zawn re ai myit jasat hpe galai shai shamyit kau ra nga ga ai. Dai myit masa “ Gau Ngwi “ nga ai hpe mau mwi hta na ga yu na re ngu kam ai. hpa ta nga yang, ten naw nga ai, gwu ngwi yat hkring nga ai myit jasat gaw “ Tsatan “ ni a lak nak kaba shinggyim masha ni yawng hpe ngarai mung de woi gang la ai mahkm kaba rai nga mali ai hpe anhte dum hprang ra ga ai. Dai re majaw, nu wa hpu nau ni hte ramma ni e….. myit yu saga! galai shai la na ten gaw, ya nan rai sai. Hpaji ninghkring lkaba langai mi tsun ai ga malai nga ai. “ Hpun hkai ging ai gaw moi lai sai ten kaw re, raitim bai hkai ging ai gaw ya ndai aten nan rai sai” da.

Dai majaw tsaw ra ai ramma ni ten grai naw nga ai yat hkring she galaw na ngua I myit jasat rawng ai rai yang ya ya nan galai shai shawawn jahpoi kau saga. Moi prat hta gaw lagawn lamawn ai hte aten hpe majoi nga shalai ai rai yang, baw hta tsi kanu jat wa ai da, lagawn na lu ai gaw tsi kanu sha nga ai nga nna, masha kaba ni chye tsun ma ai. Raitim ya na IT prat ndai hta gaw, lagawn nna lu ai gaw U gri sha nga sai . Tsi kanu pyi nnga sai. Dai re majaw jahkring la nmai ai ndai aten hte, rau kanawat hkawm sa let , shakut shaja shamu shamawt yang she, anhte a prat gaw, madang tsaw awng dang wa na ga ai. Aten hpe hkum jasum, hkum shama, hkum shalai kau ga, dum hprang nga saga, jin jin hte  ten tup ra ai magam hpe awng sharawng myit kaba hte galaw shakut sak hkrung nga saga. Aten gaw nang ngai hpe nla ai, shi hkrai shi man man hkawm sa taw nga ai re majaw, anhte mung shi hte rau man man hkan sa nna ra ai magam hpe tup hkrak hkan galaw let hkawm sa ga ngu tsaw ra ai ramma ni hpe gam garan ya let.

 

#youthprogram

#crdlahtaw(kachyihtu)

#rvakachinservice

  

 

Add new comment

4 + 4 =