Shaman Chyeju Kun? Ding Nge Kun? ( 9 Jan 019 )

Shaman Chyeju Kun? Ding Nge Kun?

          

           Lai wa sai shaning ni kaw na mung masa brang lang masa hkrawn hkrang wa sai hte maren an-hte myen mung dan hta matut mahkai hpaji ladat ni Ramma ni a lapran dam lata ai hku jai lang nga taw sai hku re. Ndai hpaji ladat gaw shingyim htunghkring lai masa ni a n’tsa kaba ai masing masa du hkra a-htu hkra wa nga sai hpe mung mu lu nga ai. Ndai matut mahkai lam hpaji ladat a akyu a majaw mai kaja ai lam ni lawlaw nga ai zawn, hkra machyi ai lam ni hpe mung dai ni an- hte mu lu nga ga ai. Kaja wa nga yang ndai matut mahkai ladat hpaji hte arung arai ni gaw shinggyim masha ni jai lang ai rai langai rai nga ai raitim tatut hta an-hte masha ni gaw dai hpaji ladat a Mayam ni she tai taw nga ai re, matut mahkai hpaji ladat gaw n-gun kaba ai dut sat shazai langai zawn sha rai nga ai, ndai du sat hpe Ni… wa hkra shaman ya yang tinang shangun mayu ai daram shangun sha lu ai manu dan ai du sat langai byim wa na rai nga ai law bai ndai hta ni…wa hkra ngalaw ai sha sa jai lang hkrup yang gaw nang hpe nhtang sat na sha rai nga ai.

           Tsawra ai Ramma ni lata lang Phone ni a majaw lawhtum byim chye ai yaw ga gaw tsun chyai ai ga langai rai nga ai Baw sharawt yak a-na rai nga ai.Dai phone hpe ten tup yu taw ai a majaw baw n-lu sharawt mat ai rai nna lit hprai ai ni, bai asak sum ai ai du hkra pi byim chye nna dum n’ta masha ni, manaw manang ni hte mung tsang gang shangun chye ai rai nga ai. Tinang lang ai phone gaw tingkyeng akyu a matu jai lang ai hta nre sha akyu yawm shangun chye ai, tinang hpe hkra machyi ai zawn re  ni gaw gara hku mung nmai byim ai lam rai nga ai. Matut mahkai ladat hpaji ni kaja ai a majaw shinggyim kanawn mazum lam, hpaji lam, sut masa lam, mung masa lam, zawn re ni hta  rawt jat wa nga ai hpe mung n-mai ninghkap nga ga ai raitimung lit nla let jai lang ai nga ai ni nkau mi a majaw ndai lam yan gaw hkra machyi dik lamyan langai byim wa nga ai re, matu mahaki hpaji ladat a majaw, shinggyim kanawn mazum lamni hten za wa nga ai, bai sari shadang ni yawm wa ai, hpaji lam hta n-gun yawm wa nga ai, dai majaw tinang jai lang ra na  arung arai a mayam tai wa nga ai re. Nam maling kata Jau Gawng ni kalang lang jau gawng wa she Ashu Ashan bai byim mat ra ai zawn matut mahkai hpaji ladat kata shinggyim masha ni mung jai lang hkrum ai masha byim wa chye nga ga ai re.

           Asak prat n-lata ndai mahkam kata du mat nga ga ai raitim, ndai hta law malawng gaw Ramma ni grau law nga ai hpe shadum n-gun jaw mayu ai. Dai majaw Ramma ni hku nna tinang shang sana, jai lang sana matut mahkai hpaji ladat a hpaji lam hpe tsawm sha hka ja ra na re ngu kahtap n-na shadum mayu ai, bai matut mahkai hpaji ladat a hkra machyi  htum gaw ganawn mazum lam yan rai nga ai, ndai hta tsawra ai ramma ni chye chyalu rai nga ai hte maren Facebook ngu ai sha rai nga ai  Samrt Phone lang ai ni shagu Facebook ngu hpe lang nga ga ai. Lai wa sai ten ni na Facebook Account langai hpaw na nloi la nga ai raitim  ya gaw Sim Card  langai lu ai hte mai hpaw taw nga sai re, kaja wa nga yang Facebook hpe yaw shada lam kaja hte gin shalat dat ai rai nga ai, jawng ngut n-na tsan ai shara de du mat na manang ni langai hte langai ni lu na matu gin shalat dat ai rai nga ai. Ya nga yang ndai hte sha nhkring mat n-na kaja ai lam ni hte rau n-kaja ai lam ni mung shara la taw nga sai hku re. Facebook ngu hpe shinglum hkra nchye pat da ai a majaw , nre ai mang hkang ni chye byim nga  ai re. Ya nga yang sim card ni hte facebook hpaw ai a majaw tinang a phone number gaw shawa yawng chye chalu rai ng ai re hte bung nga ai, dai phone number hpe lu ai ni gaw tinang hpe jam jau bai chye jaw nga ai. Phone hte gin-jang ai lam ni, jahkrit shama ai lam ni hte hkrum wa chye nga ai. Ya ten du hkra Upadi kaw na mung ngang ngang n-nga, madi shadaw ya ai Company mung tinang hpe makawp maka lam nlu jaw ai re majaw tinang hkum tinang sha shinglum hkra jai lang chye na matu chye na kung kyang ai ni kaw na sharin hka ja let jai lang na matu mung alak mi Ramma kanau sha ni hpe shadum n-gun jaw mayu ai. Bai lit la gwi ai myit ngu ai hpe mung tsun dan mayu ai shinggyim masha ni a htung gaw lit la nra ai ngu yang hpa  hpe mung shawng hpang n-sawn yu n-na myit lu ai hku galaw chye  nga ga ai, tinang hpa mi galaw galaw, galaw ai kaw na hkan nang wa na lit la ra na ngu ai  myit masin rawng na matu ahkrak nga ai re, dai lit la chye ai myit masin gaw an-hte ni galaw sa ai magam ni hpe hting hkang shading ya nga ai re hpe tsun mayu ai, bai dai hte maren matut mahkai ladat hpaji ni hpe jai lang ai shaloi “ Ngai galaw ai kadai mung nchye ai law” nga n-na nrai nkai ni chye galaw nga ga ai, ngai hpa ni yu ai, ngai kadai hte hkau n-na, hpa ni shaga ai , kadai mung chye ai nrai nga ai ngu Myit yang shut mat na, nkau mi nga yang facebook n’tsa kaw mying jahten ni, mrai nkai hte kam ai hku ka, kam ai hku mara, nga ai hpe mung mu lu nga ai, ndai gaw lit la nra ai ngu  ai myit hte galaw gwi ai lam mung rai nga ai, matut mahkai ladat hpaji ni a rawt jat kaba wa ai a majaw ngai hkrai sha cye ai ngu n-mai tsun nga sai re, tinang hpa galaw ai ngu ai hpe lawn hte langyan ai hku dan dawng wa chyalu rai nga ai, makoi magap lu ai ngu gaw n-nga ai daram rai nga ai , tinang a myit sawn lam n-nga sha galaw hkrup ai a majaw prat hte shingdaw let sak jaw kau ra ai lam yan ni ramma kanau kasha ni mu chye, hti ga chyalu sha rai nga ai.

           Dai majaw ngai galaw ai lam ni yang ngai lit la ra na ngu ai mchye machyang nga na nga yang matut mahkai hpaji ladat ni hpe shut ai lam yawm lu ai daram hte jai lang lu na teng sha rai nga ai, kadai mung n-mu nga ai ngu ai she teng nga timung Karai Kasang gaw ngai hpe Mu nga ai ngu ai machye machyang hpe myit masin bawnu hta dik bang da let hkawm sa shamu shamawt jai lang ga ngu  tsun mayu ai, kaja wa nga yang matut mahkai ladat hpaji gaw Karai Kasang jaw ai shaman chyeju langai mi rai nga ai. Chyeju dum ai myit hte mai kaja ai lam hta jai lang sa wa ga, magup shagu hku n-na akyu rawng ai lam langai rai nga ai majaw ayai aya jai lang hkrup na nga yang gaw akyu n-nga ai sha n-ga shaman chyeju gaw ding ngye chye byim mat na re ngu n-gun jaw let;

 

Tang Madun Ai ; John Nnye Seng Tu

RVC Gin Jaw Rung

Myitkyina Aung Nan

Add new comment

1 + 7 =

Please wait while the page is loading

Shaman Chyeju Kun? Ding Nge Kun? ( 9 Jan 019 ) | Radio Veritas Asia

Error

The website encountered an unexpected error. Please try again later.