Shaman Chyeju Gara Hku La Ra Na ( Youth Program )

Image of online

 

Anhte Myen mungdan hta, June, July shata shang wa sai hte rau, marang ni mung htu she htu rai wa nga ai. Bai july shata hta gaw, marang ni htu ai zawn shaman chyeju ni mung, law law lu la mai ai  n-htoi shata mung rai nga ai, hpa majaw nga yang, july shata hta gaw, anhte mara kap nga ai shinggyim masha ni yawng hpe, hkye hkrang la na matu, shangai chyinghkai ya ai san seng chyoi pra ai Nu Maria a Kanu Yan Kawa rai nga ai San Joachim hte Anna yan hpe kahtawlik nawku hpung kaw na, shakawn shagrau ai poi masat shata mung rai nga ai re. Anhte kashu kasha ni hpe, shata 9 kan kata hta gun let, anhte a matu yak hkak jam jau ai hte malu masha ni mung koi gam ai sha n-ga, asak du hkra ap nawng ya let, shangai chyinghkai ya ai chyeju madu Kanu ni hte rau , anhte kashu kasha ni a matu shingma hpyi ni gaw hkam rai nna, prat lahkam, masha lahkam dep na matu, salu salat, n-gun atsam shaw ai sha n-ga, laika hpaji machye machyang yawng hte wenyi makam masham lam mung, katsi kaja madun rai nna, dinghku ting a ra mara magam hpe lit la nna, bau maka ya nga ai chyinghkai  kawa ni yawng hpe mung, shagrau sha –a  mai ai hte, nawku hpung kaw na mung masat da ya ai lak lai ai poi nhtoi, wunli la mai ai shata du wa sai majaw re.

Shaman chyeju hte seng nna, chyum laika hta rawng ai mau mwi langai mi tsun dan mayu nngai, Dai gaw Isak hte Rebecca yawn a kasha, Esaw hte Yaku yan nau a lam re. shiga madat nga ai ni hte ramma manang ni malawng maga mung na ga sai mau mwi rai nga ai re, dai hta, Esaw gaw kahpu mahtang rai nna, ya ku gaw kanau mahtang rai nga ai. shan yen a shai hkat ai lam gaw, Kahpu esaw gaw jau gawng gawng ai sha myit lawm ai hte hkum hkan e mung, mun ni grai tu ai wa re, kanau mahtang gaw, nta na ra mara magam bungli yawng galaw rai nna, kanu yan kawa hte rau grau nga ai sha n-ga, madat mara ai lam ni hta mung grau rawng ai wa rai nga ai re. Shanhte mayaw htinggaw ni, kaji Abraham kaw na,Kawa Esak du hkra, yu hkrat wa ai shaman chyeju ni a lam tsun dan tim esaw gaw nau myit nlawm sha madat mara nna, yaku mahtang gaw atsawm sha myit lawm ai hte, madat mara nga ai hpe kanu chye da nu ai. Lani mi na nhtoi hta kawa gaw esaw hpe jau gawng gawng sa nna  shan la wa jang ngai kawa ra ai hku shadu nna, la sa wa rit , rai yang nang hpe shaman ya na nngai ngu wu ai, dai hpe kanu na kau ai shaloi kanu a myit hta, esaw hpe shaman chyeju  she jaw yang gaw, amyu sha ting shaman chyeju ni mat na ra ai hpe dum let, dai majaw kanau yaku hpe mahtang kanu shaman chyeju hkam la shangun mayu ai re.

Dai majaw yaku hpe shaga la nhtawm, dai lam ni hpe tsun dan let, kasha yaku hpe bai nam lahkawng  la wa su , nwa ra ai hku ngai shat mai shadu na we ai, shaloi shi nsi yang na a shat mai sha nna, nang hpe shaman ya na ra ai ngu tsun yang, yaku gaw grai hkrit nna, kahpu esaw gaw mun tu ai, ngai gaw mun mung ntu ai, wa ngai hpe masawp yu na ra ai nhten, shaloi shi man e masu hkalem ai wa ngai tai na ra ai hte, shaman ai mahtang gaw nlu la nna, matsa kau ai chyawm ngai hkrum sha na ra ai ngu tsun yang, kanu lajang ya nhtawm. kahpu esaw a tsawm la ai palawng la nna, yaku hpe jahpun ya let, lata hte du ni hta mung bainam kasha hpyi hte hkayawp ya wu ai. Shadu da ai shatmai hpe yaku hpe jaw nna, yaku kawa kaw sa yang, Kawa Esak gaw myi nmu mat sai re majaw ngai sha e, nang gaw kadai mahtang re ta ngu san ai shaloi, Yaku gaw , Esaw rai nga nngai ngu htan wu ai. La sa wa ai shat mai sha yu nna, ngai sha nang wa tsun ai hte hkrak galaw sai, kasha ya ku hpe masawp yu yang mung, kahpu esaw zawn mun tu ai hpe chye lu yang, nsen gaw yaku a nsen, raitim, esaw zawn mun tu nga ai majaw, shi hpe kasha esaw shadu nna, yaku hpe shaman chye ju jaw ya wu ai.

Kawa Esak gaw; Nai mam hte sabyi  chyaru lawlaw mung nang hpe jaw ya u ga, masha amyu ni nang kaw mayam tai u ga, masha ni na a man e, dingyawng nga u ga,  na a nhpu nnau ni a ntsa e mung nang up nga nna, madat ya mu ga, nang hpe matsa kau ai ni yawng, matsa mawa hkrum u ga nga nna,  yaku hpe shaman ya wu ai. dai hpang esaw du wa nna, dai lam ni chye ai hte rau, pawt sin dawng ai hte, kanau yaku hpe sat na matu tam wu ai. Kanau gaw katsa re ai Larban nga ai shara de, hprawng mat wa ai ten, Rahkyela hpe mu nna, katsa larban kaw  ( 7 ) ning mayam yam wu ai, shaloi mung rahkyela hpe n-ya ai sha kanau leah hpe sha jaw sha wu ai. Dai hpang Rahkyela hpe tsawara ai majaw, ( 7 ) ning bai mayam yam nna, rahkyela hpe lu la nu ai, dai hpang yaku gaw, shaman chyeju hpring  tsup ai wa re majaw, shi rem ai u, wa, yam nga ni, sagu bainam ni mung, mayet maya law htam wa ai re. Bai shi kaw mung katsa garan ya ai kaw na, mayet maya law htam wa ai, mayam ni, u,wa, sut gan , kashu kasha law law hte dum n’ta de bai wa mat ai lam hpe anhte yang chye lu nga ga ai re. Dai lam, dai mabyim ni gaw, shaman dat ya ai, shaman ga a majaw rai nga ai.

Ndai Mau Mwi hpe la kap nna tsun mayu ai gaw, anhte dinghku kata hta mung,byim chye ai, dai hta grau nna, kahpu kanau law ai ni, kanu kawa ni a shaman chyeju ni hpe, kahpu kanau ni yawng hta rap ra hkra, lu la na matu grai ahkrak nga ai. Hpa majaw nga yang, dai mau mwi zawn jaw mayu ai gaw kaga, lu mat ai gaw kaga rai nga ai. dai majaw anhte kashu kasha ni mung, myit nkaji ra ai. Kanu kawa ni gaw, kashu kasha ni hpe tsaw ra ai gaw maren sha re. dai hta shaman chyeju hkam la lu hkra, kanu kawa ni mung jaw mayu hkra, anhte ramma ni yawng mung, shakut hkawm sa ra nga ga ai. bai nna shaman chyeju ni hpe gara hku mai la a ta? nga yang mi tsun dan mat ai mau mwi hpe sha yu ga, anhte ni mai galaw nga ai gaw, Tinang Lu ai gumhpraw ni hpe ya kaw na mahkawng da u, jawng ma ni mung lu ai muk jahpu ni hpe mahkawng da rai nna, tinang a kanu kawa ni hpa ra sharawng nga ai, gara hpan ni sha ra ai gaw, anhte kashu kasha ni chye tawn da nga ga ai re majaw, dai poi nhtoi hta mi nrai tim, masat da ai nhtoi ndu shi ai mi rai rai,kanu kawa ni ra sharawng ai malu masha lama mi hte mi rai rai, arung arai lama mi hte mi rai rai, kanu kawa ni a man hta shut kau sai mara ni hpe mung tawng ban rai nna, akyu chyeju ni, shaman chyeju ni hkam la mai ai re, tinang a prat galu kaba wa na lam hta, dai shaman chyeju ni gaw grai ahkrak nga ai re . Laga masha Miwa amyu sha ni galu kaba nga ai gaw, kanu kawa ni hpe hkungga la ra ai majaw re ai lam ni, anhte yawng na chye nga sai re, anhte w.p myu sha ni mung galu kaba na gaw, dai lam ni grai ahkrak nga ai re.dai hpe dum chye ra nga ga ai. bai nna, kanu kawa nhkum mat sai  ramma manang ni mung hpa myit nkaji ra ai. shaman chyeju she la mayu ai rai yang gaw, dum nta hta asak kung kaba sai, kaji , katwi ni hta e mung, kanu kawa ni a gawng malai  shaman chyeju ni hkam la mai nga ai re. Kara shara kaw mi du mat du mat, tinang du taw nga ai shara kaw na, chyeju madu chyinghkai  kanu kawa ni hpe myit dum let, akyu hpyi ya na nmai malap nga ai. Tsawra ai ramma manang ni e, mungkan hta, manu dawdan nlu ai nu wa ni a matsun maroi ga ni hpe, tinang a masin salum kata hta zing bang da let,tinang a asak aprat hkrun lam tup hta, kanu kawa ni hpe chyeju dum chyeju htang nga ga ngu n-gun jaw dat  ya lu nngai law.

 

By; John Nnye Seng Tu

#youthprogram

#rvakachinservice

Add new comment

1 + 18 =