Ningrum Ningtau Hpe Myit Pyaw Lam Jaw Ga

 Anhte Madu wa madu jan a ntsa ningrum ningtau kaja rai nga ai kun? Anhte kalang bai myit yu nga ga.Ningrum ningtau wa gaw ningrum ningtau jan a ntsa atsawm sha tau chye na ya lu ai rai yang ningrum nintau jan a matu gaw gam kaja ai lam rai nga ai.Anhte a kun dinghku hta shada da langai hte langai masa lam ni hpe atsawm sha chye na hkat na matu gaw ahkyak kaba dik rai nga ai.

Anhte Madu jan Madu wa lahkawng yan gaw dinghku de ai na wa jang gaw ngai lata la ai wa gaw jaw ai kun shut ai kun nga myit sawn sumru hkrup chyalu rai na ga ai.Dai hta anhte kanu num ni mung tinang a ningrum ningtau wa gaw tinang a matu ningrum kaja rai nga ai kun ngu ai lam ni mung anhte myit sumru chyalu sha rai na ga ai.

Kun Dinghku de ai prat hta tinang hte machyi makaw ruk yak jam jau tim rau sha hkawm sa ai rai kun?dum nta masha ni a myit simsa ngwi pyaw hkra tawn da lu ai kun ngu ai lam ni hpe nhtang myit yu ai lam ni nga chyalu sha rai na ga ai.Anhte Kun dinghku Kawa ni gaw kun dinghku a shawng lam a matu magam bungli galaw shachyen shaja ai lam,ja gumhpraw mahkawng ai lam,kashu kasha ni a hpaji lam hte prat shawng lam ni zawn re masing masa lam ni hta ningrum ningtau jan hte rau jawm bawngban jahkrup galaw sa yang gaw grau nna kun dinghku hpe ngwi pyaw rawt jat shangun lu na sha rai nga ai.

Tinang a nyan bawnu hte ningrum ningtau jan a myit nyan hpaji hte rau jawm pawng let kun dinghku a shawnglam rawt jat galu kaba lam hpe gaw gap sa wa ga.Bai nna tsawra ai kun dinghku kawa ni e anhte ningrum ningtau a ntsa hkungga manu shadan ai lailen hte shara jaw,ningshawng jaw ai hte ningrum ningtau jan a myit ra hpe masat masa galaw ya ai,myit mada yaw shada ya ai lam hpe garum shingtau hkrang shapraw ai hte n gun jaw ai zawn re lam ni galaw taw nga ai rai yang ningrum ningtau jan a matu gaw kaja ai ningrum ningtau wa ngu mai tsun nga ai.

Tsawra hkungga ai nu wa ni anhte shinggyim masha ngu ai ni gaw makau grup yin jinghku jingyu ni hte jawm pawng nga ra ai rai nga ai.Anhte Kun dinghku madu jan madu wa kaja ngu ai ni gaw ningrum ningtau jan a kanu kawa hte jinghku ni hte manaw manang ni hpe hkungga garum madi shadaw hku hkau chye ai mung kaja ai ningrum ningtau rai nga ai zawn ningrum ningtau jan mung madu wa a kanu kawa kahpu kanau, jinghku jingyu hte manaw manang ni hte mung atsawm hkungga la ra tsawra shawang myit madun let garum shingtau pawnba ai rai yang she ningrum ningtau wa a myit mung pyaw ai zawn kaja ai ningrum ningtau jan ngu mai tsun nga ai.

Bai tsawra ai kun dinghku kawa ni e shana yup tung lai hkra ph.hte matut mahkai shiga jaw ai lam hpa nnga ai sha shinggan de pyaw len nga  ai,ningrum ningtau jan hpe hpa ntsun ai sha hkrun lam galu hkawm ai zawn re ai hpe n galaw ai mung tinang a madu jan a matu ningrum kaja lailen rai nga ai.Bai ningrum ningtau jan a rawt jat galu kaba lam hpe tsun shadum madi shadaw garum ai lam hpe mung anhte galaw ya na ahkyak nga mali ai re.Ja gumhpraw lam hte seng nna kun dinghku a shawnglam masing masa ni jahkret let hkrang shapraw sa ai,ja gumhpraw hte seng nna ningrum ningtau jan nchye ai sha hpa mung ngalaw ai lam gaw kun dinghku kawa kaja a kum la nan rai nga ai.

Bai nna tinang hkring sa ten ni hta ningrum ningtau jan hte dum nta masha ni hpe aten jaw chye na mung rai nan ahkyak nga ia.Dai re majaw kun dinghku kanu yan kawa shada da chye na garum shingtau hkat ai kam hpa shamyet shanat hkat nan grai nan ahkyak nga mali ai re.Bai nna tsawra hkungga ai kun dinghku kanu ni e tinang a ningrum ningtau wa a myit mada yaw shada lam ni hpe n gun jaw ga,manghkang lam ni pru wa tim rau sha jawm tsap ya ga,mayak mahkak lam ni hpe mung myit galu hte madat ya hpaji jaw ai lam ni galaw ya na matu grai ahkyak nga ai.

Kun dinghku langai hta tau chye na ya ai,kamhpa shamyet shanat hkat ai sha n ga myit pyaw lam mung ahkyak nga mali ai re.Anhte kun dinghku madu jan madu wa lapran myit pyaw ai lam nnga jang gaw dinghku manghkang lam ni gaw kaba wa chye nga ai hpe anhte ni myit dum sadi ra nga ga ai.Tsawra ai kun dinghku kanu kawa ni e anhte a ningrum ningtau wa hpe tsawra hkungga manu shadan ai lam gaw myit pyaw lam hpe mung lu wa nna myit mada yaw shada lam ni hpe n gun jaw ga,manghkang lam ni pru wa tim rau sha jawm tsap ya ga,mayak mahkak lam ni hpe mung myit galu hte madat ya hpaji jaw ai lam ni galaw ya na matu grai ahkyak nga ai.

Anhte a ningrum ningtau wa hpe tsawra hkungga manu shadan ai lam gaw myit pyaw lam hpe mung lu shangun nga ai re.Kun dinghku na shada chye na ya ai lam gaw ahkyak ai zawn hkungga manu shadan ai lam mung grai nan ahkyak nga ai.Grau nna gaw ningrum ningtau wa ni gaw hkungga manu shadan ai lam hpe grau ra sharawng nga ai lam hpe anhte kun dinghku kanu ni nmai malap nga ai.

Kun dinghku dum nta hta ningpawt ja gumhpraw tam ai wa hku nna shi hpe hkungga ai lam gaw n gun atsam hte myit pyaw lam hpe lu nga ai re.Dai re majaw tinang ningrum ningtau wa hpe hkungga manu shadan ai lam gaw dinghku ngwi pyaw lam a ningpawt langai hta lawm nga ai hpe myit dum hkan sa nga ga.Bai nna tinang ningrum ningtau a ntsa myit malang ai lam gaw kun dinghku hpe ngwi pyaw shangun nga ai.

Masu magaw ai,njaw ai lam hpe tsun ai lam gaw kun dinghku a nga pyaw lam hpe mat wa shangun chye ai hpe anhte ni myit dum ra nga  ga ai.Bai nna ningrum ningtau jan ni kaw nna tinang madu wa hte jahkring hkring ga tsun shaga mung jahta chyai ai lam gaw dinghku ngwi pyaw lam hpe jaw ya lu nga ai.Langai hte langai ga n shaga hkat ai lamung dinghku hta myit pyaw lam hpe mat shangun chye ai hpe mung myit dum ra nga ai.Bai nna tsawra kun dinghku kanu ni e hkrum sha nga ai manghkang lam ni hparan na matu ningrum ningtau wa a hpaji jaw ai lam hpe mung la ra nga ga ai.

Anhte kun dinghku kawa ni a myit gaw dum nta masha ni yawng gaw shi hpe kamhpa shamyet nga na,bawngban jahkrup na hpe ra sharawng nga ai hpe myit dum nga ra ga ai.Kun dinghku Kawa ni gaw ningrum ningtau jan a chyena madi shadaw pawnba ya ai lam gaw ningrum ningtau hpe myit masin n gun jaw ya lu ai zawn myit pyaw lam hpe mung jaw ya lu nga ai.