Na Bawnu Kaw Na Shaw Kau Gring Ai Lam Yan Ni

Na Bawnu Kaw Na Shaw Kau Gring Ai Lam Yan Ni

Saw Sawn Di Ai Lam..Nang hpe lahku lamai ndai ai ni hpe nang saw sawn di kau dat u, naku masha ni gaw, shanhte hpe lahku magang nang hpe manu nshadan magang sha rai nga ai, dai majaw shanhte hpe hkan nna lahku lamai nga na hta tinang hkum tinang sha lahku nga dat u ngu n gun jaw shadum mayu nngai.

Nkaja ai ningmu nga ai ni kaw na tsan ai shara de nga u..Nkau masha ni gaw, laga wa hpa mi galaw galaw galoi mung mara tam tsun chye nga ai, myit hta nga yang nga ai hku sadi nnga kam ai hku tsun chye nga ma ai, ndai zawn nkaja ai ningmu  ni nga ai ni kaw na koi yen kau u, nkaja ai myit masa gaw nang hpe du chyam bra wa shangun chye ai re

Langai ngai hpe galoi mung hka ja la nga u....Hpaji sharin hka ja ai hta sak kung ai ngu nnga ai ngu ai hte maren, gara hpaji mi rai rai sharin hkam la na matu myit hkum li dum, nye asak prat hte nhtap htuk ai law, ngai naw kaji nna nra shi ai law nga nna hkum myit nga taw

Nau hkum myit kau...Lai wa sai na mabyim ni hpe nau hkum myit, lai sai ten hta malap nlu na zawn re ni law law nga na re, raitim lai sai ten ngu gaw ten langai  hta ngut mat wa sai mabyim ni rai nga ai, bai byim wa na shawng lam ni tsawm htap wa na sha shakut nga u ngu n gun jaw mayu ai

Bai Madu Hkum Madu Manu Shadan ra ai .... Akyang lailen kaja ai wa gaw, mungkan ga ntsa hta manu dan htum masha rai nga ai dai majaw tinang hkum tinang galoi mung rawt jat wa hkra shakut hkawm sa u, myit masin hkum hkrang hpraw san wa hkra galoi mung shakut u, myit kaja tawn ra ai

Shadu kam ai hku shadu u ga.... Masha amyu myu, myit amyu myu nga ai ngu ai hte maren, masha langai hte langai manu tawn da ai lam ni, hkam la da ai lam ni, ningmu ni nbung nga ai, tinang na  lam hte tinang nga ai re majaw, tinnang jaw yang ngu shadu da ai hpe gwi gwi galaw u, laga wa gara hku mu mada na hpe hkum myit tsang nga u ngu na mung n gun jaw mayu ai

Ndai Bat hta Tsawra Ai Ramma Ni Hpe N gun jaw mayu ai gaw, Madu hkum hpe ganawn n gun jaw ra ai, hpa majaw nga yang, tinang a matu, kadai mung sa galaw ya na nrai nga ai.bai hpang na shata hta she galaw sana ngu galoi hkum ngam da, hpang de ngu gaw galoi mung nbyim wa chye ai mung lawm nga ai, galaw ra ai lam hpe kalang ta ngut hkra galaw u .... tsawra ai ramma ni awng dang ai lam ngu ai gaw, nang hpe ntam nga ai, nang sha awng dang lam hpe tam ra na rai nga ai, bai bungli ba ai ten ni hta hkum hkring kau, bungli ngut ai ten ni hta sha jahkring kau u, tsawra ai ramma ni a prat hta, kalang lang mayak lam ni law law hte hkrum katut chye nga ga ai, mayak lam ngu ai gaw nang hpe grau  hkan jan lu hkra galaw ya ai lam ni rai nga ai, bai nna, ahkaw ahkang ngu ai hpe hkum lat taw, ahkaw ahkang ngu ai gaw tam la ra ai lam yan rai nga ai, awng dang lam a zaw gaw, yaw shada lam ntsa myit maju jung na matu rai nga ai, mayak lam ni mang hkang ni ntsa myit maju jung na matu nrai nga ai

Bai mani a lam yan ni kaw na hka ja la u, dai ni na matu sak hkrung nga u, hpawt de na matu, hkum myit mada nga, ahkyk la ai ga san ni san ai lam hpe hkum jahkring kau, awng dang ai wa byim na hta, manu dan ai wa byim hkra shakut u ngu mayu ai, tinang du nga ai shara kaw na hpang di shakut hkawm sa u, madu hta nga ai lam ni hpe akyu jashawn jai lang u, madu hkum lu galaw ai lam ni mai kaja dik hkra galaw shakut u bai ahkyak ai langai bai n gun jaw mayu ai lam nga ai dai gaw tinnag hkrit nga ai lam langai hpe shani shagu langai ngai galaw yu u, hpang de nga yang dai hkrit myit ni hpe dang kau lu na rai nga ai

Mai kaja dik ngu ai lam yan ni a matu, kaja ai lam ni hpe tat kau dat na hkum hkrit nga u, sak prat hta awng dang na matu,  myit malang ai hta kam ai myit nga ra ra kadawn nga ai ngu shadum n gun jaw dat let

#youth

#rvakachinservice