Ma kaji ni hpe gara hku shalat shapan la na lam, Daw (1) - October 21, 2018

Ngwi pyaw ai dinghku lamang hpe hka madat la nga ai hkungga tsawra ai shiga madat nu wa hpu nau ni, daini na lamang hta, “ Naw kaji nga ai Ma ni hpe gara hku shalat shapan la na ” ngu ai gin lam hte seng nna, machye machyang rai u ga, gam garan ya matu n’ngai.

        Dinghku lit magam hta shakut nga ai Nu Wa ni e….tinang gaw dinghku a kawa, kanu rai sai ngu ai hte, ra mara ma hkra hpe myit yu ra sai rai nga ai. Dinghku de ai hte sha hpring tsup ai n’rai nga ai. Dinghku hte seng ai machye machyang ni hpe mung sharin hka ja la ra sai. Grau nna, tinang a kashu kasha ni hpe tinang nan sharin shapan ra sai rai nga ai. Hpa majaw nga jang, daini na Ma kaji ni gaw, hpawtni na mungkan hte nawku hpung hpe pawn ba, lit la, lahpa galai la na ni rai nga ai majaw, Ma shalat shapan magam bungli gaw a’hkyak dik rai nga ai hte, manu dan hpu reng ai magam kaba langai mung rai nga ai. Dai majaw, Ma kaji ni hpe shalat shapan ai hta maga mi hku nna, a’kyu tai ya lu u ga, lawu na ladat ni hpe kum hpa mayu n’ngai.

        Shawng nnan, Ma ni hpe ngang kang ai myit masin ni lu la hkra shaman shakyang ya ra ai ….ngu ai gin lam hta, Madu hkum hpe kamhpa, myit krem lam lu hkra shaman ya u. Ga shadawn, sum la soi ai ngu ga, shi myit dik hkra soi shangun u, makau kawn nna, daihku, le ra hku ngu ai hpe hkum tsun ya, shi ra sharawng ai madang du hkra soi ngut jang shi myit pyaw na ra ai. Kalang ta grai hkrak hkra n’lu galaw tim, shi hte shi, gau ngwi ngwi hkrak wa na ra ai. kanu kawa ni gaw makau kaw nga let shakawn ya na n’mai malap ai. Dai zawn shakawn ya jang Ma dai gaw, shi hkum shi kamhpa, myit dik chye wa na rai nga ai.

        Bai, myit shadik chye ai, sharawng awng chye ai myit rawng hkra n’gun jaw shakawn sharawt ya u. Tsawra matsan dum lama ai myit masin rawng hkra shaman ya ra ai. Dingman dinghpring ai hte rap ra ai tara hpe hkungga la ra, hkan sa chye hkra shaman sharin ya u. Ma ni naw kaji nga ai ten kawn nna, hkam sharang lu ai a’tsam rawng hkra, myit mada lam jaw ya ai, ngang kang ai myit masin ni lu la hkra shaman ya mai nga ai re. Reng jang she Ma ni gaw, daini na prat madang hta kaja ai ningmu ni hpe hkap la lu na rai nga ai.

        No (2) ngu na hta, Awng dang magrau grang ai kashu kasha ni byin tai hkra shakut ya ra ai lam hta, Ma ni hpe shakawn shagrau ai lam nga ra ai. Ga shadawn Ma ni mahkawn hkawn dan ai ngu gaw, n’sen pyaw tim, n’pyaw tim, grai pyaw ai, grai hkrak ai she rai nga ai ngu shakawn shagrau ya ga, reng jang Ma a myit hta kabu pyaw let ya hpang de mung mahkawn hte shangwi shapyaw chye ai Ma tai wa na rai nga ai. Mara tam jahpoi ai lam hpe koi gam chye hkra tsun dan u. Ma ni hta rawng ai a’tsam ningja ni hpe grau shadan shaleng, sharawt ya u. Anhte kanu kawa n’kau mi gaw, ma ni lama ma galaw jang a’hkre a’re nga nna, ma ni a shawng lam hpe pat hkum ai zawn rai chye nga ai. Galu kaba sai mungdan hkan gaw, ma ni hpe grai manu shadan shara jaw ai hpe mu lu nga ai. Ma ni hpe dik shale shing na hkum tsun, ga ja pi n’mai tsun ai rai nga ai. Dai zawn, ga ja tsun shaga jang Ma ni hpe dang sha ai ngu ai tara hte a’hkyak la, mara jaw ai hpe mu lu nga ai re. Dai majaw, Ma ni a galu kaba lam hta kanu kawa ni gaw, shading sharai, sharawt ya ra ai. Bai, ma ni san poi htai ai ten, shing jawng poi shang ai ten ni hta, myit zim sha chye da na matu, n’gun jaw ya chye ra ai.

        No (3) ngu na hta, Kanu Kawa ni hkan sa na matu, Ma kaji ni hpe manu shadan chye ra ai. Nang kanu, nang kawa a tsawra matsan dum myit, manu shadan ai lam ni, ma ni chye hkra ta tut hta  tsun dan ai sha n’ga, lai kyang hte mung madun u. Bai, ma ni a hkritung shingra myit hpe chye hkra, tam dinglik sagawn yu ra ai, kaja ai kasi kamang hte sharin a’chyin ya ra ai. Grau nna, ma ni hpe a’ten jaw ya ra ai. Ma ni a man hta a’put a’ngun, myit daw myit htum ai lam galoi mung hkum tsun. Hpa majaw nga jang naw kaji ai ma ni gaw, len la loi ai, mu ai hpe bai hkrang shala chye ai, a’kyang lai len ni grai mu mada loi ai re majaw, kanu kawa ni hkum nan, dai zawn a’kyang ni madun, tsun shaga jang gaw, ma ni a matu n’kaja ai rai nga ai.

        No (4) ngu na gin lam hta, Ma ni hpe bungli madun, a’mu shangun ai hta hkan sa ra ai ladat lam ni hpe bai madat yu ga. Nu Wa ni e, ma ni hpe bungli madun, shangun ai shaloi, bungli ngut daw hte ma ni bungli masa chye na,  bungli chye galaw hkra sha nre, bungli lit lamang masa, bungli a manu jahpu chye na wa hkra hte tinang hkum hpe kam ai myit, manu chye shadan wa hkra, myit marai kunghpan wa na matu ngu ai yaw shada ai lam da nna, bungli shangun chye ra ai. Ma ni hpe kaji ai ten kaw nna, n’pawt hpang sharin la ra ai. Ga shadawn lahkawng ning hpring sai kawn nna, tsang ai hpan a’rai lama ma ladawn jaw shangun ai zawn re ai hpan, dun hkan hkrat taw ai a’rai lama ma hta shangun ai zawn re ai lam ni shangun hpang wa mai sai rai nga ai. Asak (5) ning rai sai ma hpe shi a ginsup rai ni hpe ginsup ngut ai hte shi shara hta shi bai zing da chye hkra shangun shaman hpang wa lu sai.

        Asak (7) ning ram rai jang gaw, bungli kaji kajaw re shangun, sharin hpang wa lu sai rai nga ai. Ga shadawn, shat saboi hkyen ai, shat sha ngut jang ban, hkawan kashin shangun ai, dun ye ai zawn re bungli ni mai shangun sai. Dai zawn ma ni lu galaw ngut ai hpang shakawn shagrau na n’mai malap ai. Reng jang she grau galaw kam na sha n’ga, gwi ai myit masin, kabu myit dik na rai nga ai. Dai kabu myit dik lam gaw ma ni hpe myit n’gun sharawt ya ai marai n’li nnan rai nga ai. Lama na n’chye galaw, n’lu galaw ai rai jang mung n’mai a’hkre ai. Dai zawn a’hkre daru, a’sawng kau ya jang ma ni hpe myit marai n’gun daw kau ya ai hte maren sha rai nga ai.

        Dai majaw, naw kaji nga ai ma ni hpe sharin ai shaloi grai sadi let sharin ra ai. Ma ni a shamu shamawt , masa lam, tsun shaga ai hpe yu nna gau ngwi gau ngwi chye na hkra sharin ya ra ai ngu gam garan ya let, ngam nga ai daw hpe du na lamang hta bai hkap madat la lu na n’ngai.

 

Ka Lajang ai; Mama Rose Angeline Maran Nang Doi

                          RVC Ginjaw Rung, Aung Nan

                          Myitkyina

Add new comment

1 + 0 =

Please wait while the page is loading

Ma kaji ni hpe gara hku shalat shapan la na lam, Daw (1) - October 21, 2018 | Radio Veritas Asia

Error

The website encountered an unexpected error. Please try again later.