Laika Hti Ga ( Youth program )

Laika Hti Ga

 

Laika hti ai ngu ai gaw, anhte a prat hta, sum mat ai lam nnga ai, amyat lu ai lam law law ng ai. Dai hta,  kaning re ai laika hti tim, anhte a matu amyat nga ai, akyu lu ai. Jawng sara langai tsun ga ai, anhte mu galaw taw tim, lam hkawm taw tim, mu ai laika hpe hta hti u, hpaji jat wa na ra ai nga hpaji jaw da nga ai.

Laika hti ai shaloi, masha nkau mi gaw, lawan ai , nkau mi gaw langyan ai, Lawan ai, langyan ai gaw ahkrak nre, laika hti nna, tinang a prat hpe, hpa akyu jaw ai , hpa lu matsing la ai sha ahkyak dik rai nga ai. Laika pa langai hta ngut shagu, bai myit sumru yu chye hkra, shaman la ra ai. Shaloi tinang hti da ai lam,malap mat sai ngu myit tim. tinang a htauli htaula myit hta, galoi mung rawng taw nga sai rai nga ai. Kalang lang mang hkang hkrum nna, daw dan ra wa ai shaloi, tinang hti lai wa sai lam ni, ,myit hta pru wa na ra ai. Ndai gaw laika hti ai a kaba dik ai chyeju rai nga .

Ramma ni, laika hti mu! nga laika ka ai sara ni tsun taw nga ai hpe sara shagu hta, laika buk shagu hta, tsun shadum taw nga ai. Kaja wa nga yang, ramma ni sha mung nre, masha kaba ni mung, laika hti ra ai. Ya prat hta, laika hti ai masha nau  nnga sai hpe mu lu ai. Hpa majaw nga yang , prat dep arung arai ni law wa ai majaw ngu mai tsun nga ai. yawng yawng gaw, TV shawng kaw chyu, aten kachyi mi lu ai hte gaw, phone chyu mada yu nna, manu dan ai aten ni hpe, jahtum taw nga ai. Laika nhti ai majaw, machye machyang mahkrum madup nnga, masha ni hta grau hpang hkrat taw nga ai. Hkrat sum taw nga ai. Dai Majaw, myu sha ni yawng hpe, laika hti ga ngu n-gun jaw mayuai, laika hti ai wa lu na akyu chyeju ni gaw….

1.Myit Sharawt Ya Ai…. Masha ni a prat, labau ka da ai laika ni hti ra ai. Jawng nlu lung ai majaw, laika sha hti let, hpang jahtum American gumsan magam byim wa ai, Abraham Lincoln a lam zawn re ai, sanat nlang ai sha, India mungdan hpe English ni a lata kaw nna, simsa ai hku bai lu la ya ai Mahadama Gandhi a lam ni, anhte myen mung simsa lam a matu 26 ning jan nta htawng hta nga lai wa sai Awng San Suu Kyi a lam ni hti ai shaloi, anhte a myit hpe sharawt ya ai zawn, hkam sha wa na re, shanhte zawn yaw shada myit kaba anhte hta nga wa na re.

2. Machye Machyang Mahkrum Madup Lu Wa Ai… Laika law law hti da ai wa gaw, machye machyang law na re. Tinang a amu bungli hte seng ai laika ni hti da ai wa gaw, bungli rau galaw ai  manaw manang ni hta, baw langai jan taw ai zawn, machye machyang grau law taw na re. Bungli galaw ai lam hta mung, manang ni hta grau awng dang na re. Mungkan hta hpa byim taw nga ai mungakan shiga ni hti yang mahkrum madup lu la na re.

3.Ga Jahpan Lam Hta Dam Lada Wa Na……Laika Hti ai shaloi, tinang nchye ai ga yan ni, mu wa na ra ai. Shaloi nchye ai ga yan ni hpe, chye ai ni kaw san la, ga htai chyum, dictionary ni hta tam la di ra ai. Ga jahpan dam lada ai wa gaw, masha ni a shawng kaw ,ga shaga ai shaloi, masan sa ai hku atsawm sha chye sha ga na re.

4. Matsing Nyan Grau Kaja Wa Na… Sumrai laika hti ai ngu ga, hti let dai sumrai hta hkrang shala ai ni a mying ni, matsing da ra ai. Shanhte a hkrang nsam ni, akyang lailen ni hpe matsing da ra ai. Gara shara, Gara kahtawng kaw, ngu ai ni matsing da ra ai. Ndai zawn n-matsing da jang sumrai matut hti na matu, matut manoi lam nnga mat na re. Sumrai laika hti let, ndai lam ni hpe,bawnu hta matsing da ai majaw, nyan grau kaja wa shangun ai. Asak kaba sia ni grau, sumrai laika ni hti ra ai nga , myit masin hpaji ninghkring ni tsun da nga ai.

5. Myit Maju Jung Ai Lam Grau Kaja Wa Na….Shara ra, Lama ma hta, myit maju jung ai lam nlu galaw ai ni, laika law law hti ra ai. Tinang myit lawm ai laika hpe hti ai shaloi, dai laika kaw, myit du mat nna, makau grupyin yawng hpe pyi malap kau nna, myit maju jung ai lam hta grau kaja wa na ra ai.

6. Laika Ka Masa Hta Grau Kaja Wa Na…..Laika ka ai sara ni yawng gaw, laika law law hti ai ni rai nga ai.Laika law law hti ai gaw,laika ka sara shagu a laika ka masa hpe, hka ja la ai zawn byim sai. Dai re  majaw tinang ka mayu ai, laika hpe myit ra  lu ka wa na, hti ai ni, chye na hkra, ka chye wa na, Dai majaw laika ka ai sara ni gaw, ga shaga ai hta mung, grai kung kyang ai hku chye shaga ma ai re. Laika law law hti ai jawng ma langai gaw, essay laika ka ai hta mung, masha ni hta gru chye ka na re.

7. Myit Ngwi Myit Pyaw Lam Lu Na….Maumwi, sumrai maumwi ni hti yang, myit simsa lam lu ai. TV, Video ni yu na sha nre, Myit hpe shangwi shapyaw ya nna, machye machyang mung law wa shngun ai gaw, laika hti ai hta sha lu la ai. Ta tut hti yu ga.

8. Hkrum Lam Hkawm Mahkrum Madup Lu Na…Kaga nungdan na, ahkyak mabyim ni hpe, ka da ai laika zawn re ni hpe, hti ai shaloi tinang hkum nan dai shara, dai mungdan kaw du ai zawn hkam sha wa na, Dai majaw laika hti let, maigan mungdan de hkawm sa mai nga ai.

9. Htawn Hpang Na Mayak Mahkak Ni Hpe Tau Chye Lu Na…. Bungli galaw yu ai ni, hpaga hpung kaw galaw yu sai ni a lam, ka da ai laika ni hpe hti ra ai. Shanhte shaning law law galaw wa ai, hkrum lai wa ai mayak mahkak, mahkrum madup ni hpe, gara hku hparan lai wa ai lam ka da ai hpe, hti jang lani mi tinang mung dai mayak mahkak ni hte hkrum wa ai ten, gara hku hparan na ngu mahtai tau chye lu sai. Hpaji ningli lam nkaja na jam jau hkau hkrum let, myitru nga ai ni ndai mang hakng kaw na lawt lu na matu laika hti ai hta lai, kaga lam nnga sai. Laika hti mayuai myit rawng wa hkra ngu gaw, lahkawng masum ya hte, sha lu shaman la ai baw nre, shani shagu man man hti wa jang she, mam mat wa na rai nga ai.Ga malai nga ai ‘ All readers are not leaders but all leaders are readers’ Laika hti ai ni yawng gaw ningbaw nre, raitim ningbaw ni yawng gaw, laika hti ai ni hkrai re..

#crdpaullatawng(tamungne)#rvakachinservice

Add new comment

1 + 4 =