Kun Dinghku Shingni Hpaji Hpe Jai Lang Ga!

 

Anhte Kun dinghku de ai ngu ai gaw shinggyim hpaji langa rai nga ai,dinghku hta prinem hkra hpajang hparan ai lam gaw shingni langai rai nga ai.Dai majaw anhte ni gaw dinghku de sai  nga ai hte shinggyim hpaji rai nga ai kun dinghku hpaji hpe hkaja hpang sai ngu hkam lam ra nga ai.Anhte langai hte langai yu sharawng ra sharawng nna dinghku de sai nga yang tinang hpe shi gaw galoi mung ra sharawng nna ningrum myit ra hkra nga sa ra na rai nga ai.Dai nrai yang dinghku lam hta jin mat lagawn mat ai hte myit htum myit ruk mat nna shakram kabai kau na daram byin lam ni mung nga wa chye ai re.Madu jan madu wa shada ga law ninggyet hkat ai lam gaw myit dan bungli lam ngu mu mada ai.

Dinghku ten na magang grau nna ngang kang ai tsawra myit madun hkat na malai jahkring hkring shada ga law hkat ai lam gaw kalang marang hkrat sum kaba hpe jaw ra wa ai madang du chye nga ai.Galaw hkat ngut jang  bai tsawra ten nga ai nga tim tinang a shara hta kaga masha shara la mat ai lam ni mung nga chye ai majaw dinghku kata ga law hkat ai ngu hpe koi gam yang grau kaja ai.Dam lada ai kanawn mazum lam hte bungli galaw nga ai madu wa,madu jan nga ai ni kaw nna tinang a madu wa,madu jan hte ga law ninggyet hkat na nga jang sung sung myit yu ra ai.Ndai zawn jahkring hkring ga law hkat ai rai yang tinang madu wa hpe dum nta kaw na hprawng wa hkra galaw ai hte mung bung chye ai re. Madu jan Madu wa shada ga law hkat ai ladat hta grau kaja ai gaw shada bawngban jahkrum ai lam rai nga ai ndai zawn bawngban jahkrum ai hta lahkawng yan nsum ai ladat hpe ladat shaw shakut ra nga  ga ai re.Kun dinghku hta myit htum ai ngu ai hpe hkam sharang nna kaja dik ai masa hte rau jawm pawng nga ai hpe Kun dinghku ngu ai rai nga ai.Anhte a Kun dinghku kata  shinggyim manghkang,sut masa manghkang ni hkrum kadup wa ten madu jan madu wa chye na hkat na matu grai ahkyak nga ai.Kaga masha wa hpe chye na ya na ngu ai gaw yak hkak nna ra marin ai myit hpe tawn kau ra ai bungli mung rai nga ai.

Ndai lam ni hpe galaw lu yang gaw tinang a dinghku lam hpe sha n ga tinang prat awng dang lam hpe mung galaw lu na rai nga ai.Madu jan hte Madu wa lapran  nhprinem ai myit ningmu shut hkat ai ten ni mung nga nga ai re.Dai ten hta masin jasat dawdan ai lam hpe koi gam na matu grai ahkyak nga ga ai re.Kade daram tsawm ningtawn ai wa mi rai rai ndai madang hpe nlu htawt ai rai yang awng dang ai dinghku prat de ndu lu na ga ai.Ndai madang hta hkam sharang lu nna, chyena ya ai myit masa nga nna kunghpan ai masa nga yang she ndai madang gara hku nga ra ai,gara hku hkam sharang ra ai,aten kade la ra ai ngu ai hpe chye wa nna dinghku manghkang ni hpe tawt lai lu na sha rai nga ai.

 

By : John Mung Hkrang

 

Add new comment

4 + 0 =

Please wait while the page is loading

Kun Dinghku Shingni Hpaji Hpe Jai Lang Ga! | Radio Veritas Asia

Error

The website encountered an unexpected error. Please try again later.