kun Dinghku Kata Asak Kaba, Machyi Ai Hte, Si Ai Lam ( 28 Jan 2019 )

Kun Dinghku Kata, Asak Kaba, Machyi Ai Hte, Si Ai Lam

           Asak  kaba ra na, machyi ra na, si ra ni gaw, mungkan ga a shingra tara rai nga tim, kun dinghku kata byim wa ai ten, salum machyi rai nga ai gaw, galoi mung sha rai nga ai. Kun dinghku shagu asak kaba, machyi masha, masha si ai lam ni gaw, ten langai mi hta hkrum wa chyalu sha rai nga ai. Yesu, Maria, Yawsep ni a san seng ai kun dinghku hta pi, ndai lam yan ni hkrum katut wa ai sha rai nga ai. Dinggai dingla nkam yang jau jau si u, sak galu mayu yang dinggai dingla na hkum hkrit nga n-na, laika ka sara Awng Ting ngu ai wa mung ya na zawn tsun da nga ai, tsawra ai ramma ni hta mung, chye rawng ai lam langai gaw, mahkawn shabrang lawan wan byim mayu tim, kaba wa ai ten hta gaw asak kaba lawan nkam  byim nga ai re. Bai Laika sharin jawng gaw hpaji  chye shangun nna, mahkrum madup gaw Hpaji rawng shangun nga ai re. Kun dinghku hta asak kaba ni nga ai gaw A Lu ai lam langai rai nga ai hpe mung, mu mada lu nga ai, hpa majaw nga yang, shan hte ni gaw Akyu hpyi  ap nawng ya lu nga ai ten ni grau jaw lu ai, bai shan-hte a kyu hpyi ya ai lam ni gaw, kun dinghku hpe grau n-na shaman chyeju  ni lu shangun  nga ai re. Shan hte ni nga ai gaw kashu ni a matu grau n-na, shim lum  lam lu shangun nga ai re. Kanu kawa ni hta grau n-na aten lu jaw ai rai nga ai, dai majaw grau masha kaba byim wa ai ni gaw masha shajan nrai nga n-na,kun dinghku a matu ra kadawn ai masha wa zawn rai nga ai re. Dai majaw tsawra ai Ramma ni shan-hte ni gaw asak grau kaba wa sai hte maren ngyan marai ni mung n-gun yawm wa nga ai, dai n-gun yawm wa ai majaw shut ai lam ni mung law wa nga ai, dai hpe chye na ya ra nga ga ai, dai majaw shan-hte shut ai mara ni gaw mara nrai nga ai law.

           Dai majaw shanhte ni hpe chye na ya ai sha n-ga, hkungga manu shadan ra nga ai, ndai ten ni hta gaw kashu kasha ni a galaw ya ai lam ni ra kadawn dik rai nga ai. Asak kaba ni hpe bau maka garum ya ai ni gaw, tinang asak kaba wa ai ten,  bau maka ya na masha hpe Karai Kasang bai jaw ya na re ngu hpe shadum n-gun jaw mayu ai. Asak kaba ai ni hpe kabai da ai lam gaw grau dik ai mara rai nga ai hte asak kaba ai ni hpe hkungga lara ai lam n-nga ai shara gaw, ramma ni a matu shawng lam n-nga lu nga ai lam, Wasarabyim Francis kaw na mung tsun shadum da nga ai hpe kalang bai n-gun jaw dat mayu nngai law, bai nna kun dinghku shagu hkrum katut ra ai lam langai gaw, machyi makaw ai lam rai nga ai. Shangai chyinghkai ai ten ni hte si hkyen ai ten ni gaw, ja la ai majan rai nga ai. Tinang hkum nan hkam sha ra ai a-na hta, kashu kasha ni hkam sha ai a-na gaw kanu ( Sh ) kawa ni hpe grai nan hkam sha shangun nga ai, byim mai yang tinang she  hkam sha kau dat ya mayu ai, dai hta ga nchye shaga shai ai ma kaji ni, machyi yang mung grai tsang la nga ai. Mungkan hta tsi rung ngu ai gaw ja gumhpraw lu yang she mai byim ai majaw masha nkau mi a matu sha naw rai nga ai, dai majaw kun dinghku n’ta masha ngu ai gaw, Ni Dik Ai tsi rung rai nga ai, machyi makaw hte hkrum ai ten gaw kun dinghku kata mayak ni law law hte hkrum wa chye nga ai re.

           Shinggyim gawng kya ai lam ni lawm wa yang, grau nna yak hkrak wa nga ai, law malawng gaw machyi ai ten ni hta nta masha ni a tsawra myit ni grau ngang grin shangun nga ai. Bai dinghku kata machyi galu hkrum nga ai marai langai ngai nga yang, dinghku a matu galu ai Wu Dang lam byim wa nga ai, n-nan daw hta hkap la  na matu yak hkak nga tim kyu hpyi ai a marang  e, lu la ai shaman chyeju hte sum sing lam maga mi de hkawm sa lu ai mahkrai zawn byim wa lu nga ai, dai hta la kap nna tsawra ai ramma ni, Mother Tereza  gaw tinang n-chye ai amyu, n-bung ai machyi masha ni hpe lam n’tsa na lakawn la let sari shadang hte hkrak, si lu na matu yu gawn lajang ai wa rai nga ai re. Ding hku kata machyi masha nga ai lam gaw mai kaja ai lam galaw lu na matu, ahkaw ahkang langai hte bung nga ai hpe mung mu mada lu ai, tinang tsaw ra ai wa hpe gawn lajang ai lam gaw madu yesu hpe gawn lajang ai hte bung nga ai majaw, sumsing chyinghka hpe lata de bang dat ai zawn rai nga ai re. Tinang hte ni nawn ai ni hpe tinang hkum hte maren tsawra ai ngu ai tara kanu hkan ai hte mung bung nga ai sha n-ga, shinggan le nra ai sha nta kata rawng nga ai shaman chyeju ahkaw ahkang rai nga hpe, aten dep dum na matu kanau kasha ni hpe n-gun jaw dat nngai law. Machyi masha langai a, a-na gaw karai hte matut mahkai taw nga ai majaw tinang a hkye hkrang la ai lam sha n-ga, dinhku n’ta masha ni a hkye hkrang la ai lam mung, grai manu dan ai shaman chyeju shachyaw ai lam byim wa ai re.

           Dinghku kata hta masha langai jat ai lam gaw, grai dan dawng ai lam nraitim, masha langai yawm wa yang grai nan dan dawng nga ai, dai majaw si ai lam gaw dinghku shagu hkrum katut ai lam yen rai nga ai, kalang lang Karai Kasang hpe mara shagun ai du hkra hkam sha lam law  nga chye ai re, dai ten ni hta makin jinghku ni a garum shingtau la ai lam ni grai ra kadawn nga ai re. Shan-hte a yawn hkyen hkrap ai lam ni hpe nmai pat shingdang da ya nga ai, shan-hte hte maren hkam sha let, tsawm sha n-gun jaw  chye ra ai si ai lam gaw htani htana sak hkrung  lam a matu chyinghka rai nga ai, shinggyim prat htum  mat ai lam gaw htani htana asak a n-nan hpang ai lam rai nga ai. Bai si ai ni gaw tsan ai shara de hkawm sa mat ai nrai nga ai, shanhte ni gaw anhte ni a matu karai a man hta matut mahkai kyu hpyi ya lu ai a majaw shaman chyeju ni lawan ai hku mai lu nga ai hpe dum let shaman chyeju ni la ra nga ai, dai majaw si ai lam hpe sung ai nhkrun zawn nhkam la let, ja n-hkrun rai nga ai ngu kam sham let, sak hkrung ra nga ga ai, dai majaw tsawra ai ramam ni sak hkrung lam hta asak kaba wa ai lam, machyi hkrum ai lam, galu ai wudang lam ni hte, si ai lam ni hpe tsawm sha chye na let, sadi sahka hkawm sa let, dinghku kata lam woi ning shawng kaja tai let, katsi la gring ai ni byim tai wa lu u ga ngu yaw shada let

Ka Lajang Ai

John Nnye Seng Tu