Kun Dinghku Hprinem Nga Pyaw Na Matu Shada Da Jahpring Shazup Chye Ya Ra Ai

Hkristu hta hkungga tsawra ai nu wa hpu nau ni Kun Dinghku hprinem nga pyaw na matu shada da jahpring shazup chye ya ra ai ngu ai lam hte seng nna gam garan ya na nngai.Tsawra hkungga ai nu wa hpu nau ni anhte kun dinghku ngu ai gaw shi hkrai shi hprinem nga pyaw wa ai lam gaw nnga nga ga ai re. hprinem nga pyaw na matu dinghku nta masha yawng shakut nga sa ra ai lam rai nga ai. Anhte a Kun dinghku nga npyaw ngu majoi sha nga ai nga pyaw shim lum hkra n galaw shakut la ai rai yang dinghku gaw jahkrung nan nga rai mung du nga ai zawn hkam sha yak nga npyaw na sha rai nga ai.

Kaja nga yang kun dinghku ngu ai gaw Ningrum ningtau jan ai ra ai hpe ningrum ningtau wa kaw nna jahpring shazup ya ra ai zawn ningrum ningtau wa a ra ai hpe ningrum ningtau jan kaw jahpring shazup ya let shada da ra rawng ai lam hpe nang ra ai ngai ra ai ngu mara tam nga na malai shada chyena garum shingtau hkat ya she ngwi pyaw ai dinghku byin tai na rai nga ai.Kalang mi num hpaw mi langai tsun ai hta shi a ningrum ningtau wa gaw shi hpe mung grai tsawra ai,sadi dung ai ja gumhpraw tam ai lam hta mung grai byin ai dinghku a ntsa e mung grai kang ai kalang mara shi a matu manu dan ai arung arai ni mung mari jaw ai da.ndai zawn shi hta ja gumhpraw arung arai yawng hpring zup ai Raitim shi grai myit pyaw ai lam gaw nlu la ai hpa majaw nga yang shi kanu kawa ni hpe gumhpraw sen 1-2 garum mayu ai ngu shi ningrum wa hpe tsun yang nchye masu na masu re ai da.Ningrum wa gaw shi n ra ai lam hpe gaw jaw nna shi ra ai ra ai hpe gaw njaw ai majaw myit pyaw lam nlu nga ai.Anhte a kun dinghku hta mung dai zawn byin ai lam ni nga nga na re.

Dai majaw tsawra ai kun dinghku kanu kawa ni e tinang a madu jan,Madu wa hta kaja wa ra nga ai ra nga ai hpe chye na galaw ya ai lam tinang galaw ya ai lam gaw tinang a ningrum ra taw ai  ra taw ai lam re kun ngu atsawm sha myit yu jep yu nna galaw ya rai yang dinghku gaw ngwi pyaw na sha rai nga ai.Anhte nkau gaw tinang kaja ra nga ai ra nga ai lam nga tim tinang a ningrum hpe n gup kaw n tsun shapraw ai kam ai shi hkrai shi chye ra ai chye gring ai ngu sawn myit la chye nga ga ai re.Ndai zawn langai hte langai a ra ai lam hpe jahpring shazup ya na malai langai hte langai shada myit npyaw nra sharawng ai myit hte shani shana hkawm sa nga ai rai yang anhte a kun dinghku hta shim lum nga pyaw ai kun dinghku tai na matu gaw tsan mat nna madu jan madu wa shada da mung tsan gang mat wa shangun chye nga ai re.Ndai zawn anhte a kun dinghku gaw katsi katsang nga npyaw wa jang gaw madu jan madu wa lahkawng yan langai ngai gaw shut sai lam hpe myit dum ra sai re.Tinang a ningrum hpe hkrai mara tam mara jaw nmai sai kalang marang tinang hku nna mung ra ai majaw ngu myit yu sawn jep la ra nga ai.Hpa majaw nga yang kalang mara shut ai ninghpawt kaw tinang hkum nan mung rai chye nga ai.Dai majaw anhte a kun dinghku sak hkrung hkawm sa na matu ningrum kaw hkrai lit nga ai nre tinang mung lit nga ai rai nga ai.Lak lang ai masa lam manghkang lam langai ngai galai shai byin wa ai shaloi Madu jan madu wa lahkawng yan hta lit nga nga ai hpe anhte kun dinghku kanu kawa ni myit dum chye na ra ai.Tinang hkum tinang shawng sawn maram dik lik yu nna ningrum hpe mung myit yu dik lik yu shangun nna madu jan madu wa lahkawng atsawm sha bawngban la ra ai .

 

By : John Mung Hkrang

 

Add new comment

8 + 1 =

Please wait while the page is loading

Kun Dinghku Hprinem Nga Pyaw Na Matu Shada Da Jahpring Shazup Chye Ya Ra Ai | Radio Veritas Asia

Error

The website encountered an unexpected error. Please try again later.