Kanu Kawa ni a lit magam. August 12, 2018

 

          Nu Wa hpu nau ni, “ Kanu Kawa ni a lit magam kaba” ngu ai gin lam the seng nna, machye machyang tai u ga gam garan ya mayu n’ngai.

          Nu ni Wa ni e…dinghku a kanu kawa tai sai ngu ai the, dinghku kata na ra mara lit magam hpe mu, chye ra sai rai nga ai. Dinghku de ngut sai hte yawng ngut sai ngu ai myit n’mai rawng ai. Dinghku de hpang ai shani kawn nna, aw…ngai gaw, dinghku kawa rai sai, dinghku kanu rai sai ngu ai myit hpe bang da ra sai. Mahkawn shabrang prat hte shai ra sai rai nga ai. N’kau gaw, dinghku de ngut ai hpang, mahkawn shabrang prat na myit zawn sha , manaw manang ni hte kam ai hku nga hkawm, pyaw hkawm rai chye nga ai. Daizawn, sha pyaw hkawm jang gaw, kashu kasha ni nga wa ai hpang yak ai lam ni nga wa na gaw teng sha rai nga ai. Hpa majaw nga jang dinghku nnan de ai the, dinghku a lit hpe a’tsang a’rang sha myit nna, pyaw hkawm ai ten law ai re majaw, dinghku kata hta hpang hkrat wa ai majaw rai nga ai.

           Dai majaw, kashu kasha ni, asak a’prat hta hkan nna, hkum hkrang myit masin galu kaba galai shai wa ai lam ni hpe tut nawng maram nna, kaja ai hte htap htuk ai hku kanawn mazum nga sa na lam hpe sharin ya ra nga ai. Ndai zawn sharin ya ai lam hta, myit masin wenyi hte kyang lai len lam hpe mung sharin ya na grai nan a’hkyak nga ai. Asak a’prat hta hkan nna, num kasha ni hpe dinghku kanu hkum nan, la kasha ni hpe rai jang dinghku a kawa hkum nan, san san garan nna, sharin ya ai lam ni mung nga ra ai. Ma ni naw kaji ai ten kawn nna, myit masin san seng ai hte nga sa chye na matu sharin ya ra ai sha n’ga, kanu kawa ni hkum nan, ta tut hta san seng ai myit masin hte ma ni a man hta nga dan ra ai re. Law malawng ma ni gaw, kanu kawa ni a kyang lai len, tsun shaga ai, sat lawat ni hpe yu nna, hkan galaw chye ai hpe myit dum ra ai. Dai majaw Ma ni a man hta, n’kaja ai lai len ni hpe mai byin ai  made mi koi gam ra nga ai. Karai kasang a kashu kasha ni re ai majaw, shi zawn myit san seng ra ai. (Ephe 5: 1-5) Nu Wa ni, daini na prat hta, hpung tang hpaji rawt galu gaba wa ai majaw, kaja ai a’kyu hkam sha ai lam law law nga ai zawn, n’kaja ai hte lai kyang jahten ai lam ni law law nga nga ai re. Ga shadawn, Hkrang mu sen na hkan madun ai sum la n’kau mi, Internet, web side, face book hkan mu mada lu ai sum la n’kau mi gaw, n’san n’seng ai sha n’ga, masha a myit masin hta n’hkru n’kaja ai myit ni hpe galai bang ya ai hte bung nga ai. Prat de ai hta hkawm sa ai gaw, kaja ai raitim, n’kaja ai myit hte chye na la ai ni a matu gaw, prat hpe hkrat sum shangun na rai nga ai. Dai majaw, dinghku hpe lit la nga ai kanu kawa ni hkum nan, dum hprang nna, sadi let Ma ni hpe makawp maga, lam madun ya ra ai hpe myit dum nga let sharai , sharin ya ga. Mt 26: 41 hta, “A’gung a’lau ai kaw ndu myit ga, maja nga ai hte a’kyu hpyi nga mu, wenyi gaw let nga ai, hkum shan mahtang n’gun kya nga ai, ngu mu ai. nga nna, shadum da nga ai. Nu Wa ni, Madu karai kasang gaw, shi hpan da ai shinggyim masha ni yawng hta na, n’kau mi hpe gaw dinghku n’de ai sha san seng san pra ai hte shi a magam hpe gun hpai na matu shaga la ai. N’kau hpe rai jang dinghku de nna, san seng san pra ai hte shi a magam gun hpai shangun na matu shaga la nga ai re.   Dai majaw, Madu karai kasang de ya sai, dinghku hpe gadai mung n’mai jahten kau nga ai. Prat tup ngang kang ai hte ga sadi dung let prat tup jaw lup myit rum let gun hpai lu na matu Madu karai kasang ra sharawng ai rai nga ai. Kanu kawa ni hkum nan dai ga sadi lit kaba hpe hkan sa lu jang she kashu kasha ni hpe shadum jahprang sharin ya na matu n’gun lu na rai nga ai. Dinghku de ai hte n’de ai ni yawng hpe Madu karai kasang gaw, san seng san pra, dinghpring dingnam ai hku shi a magam gun hpai lu na matu lak san, san da ai rai nga ai. N’dai lam ni hpe ma ni chye madat na matu, kanu kawa ni hkum nan sang lang dan na lit kaba nga ai re.

          Bai, makam masham hte kanawn mazum lam sharin ai shaloi tinang a ru sai, htung hkring lam ni hpe mung kapyawn nna, htap htuk manu ai hku sharin ya na n’mai malap nga ai. Anhte a myu sha n’kau gaw, layang ga de nga kaba nna, myu sha ga hpe malap kau ai ni mung anhte a makau grup yin hkan mu lu nga ai. Ndai zawn n’byin na matu, nang kanu, nang kawa hta lit kaba rai na re. A’sak a’prat naw ram nga ai ten, karai kasang a shaga la ai lam hpe a’san sha chyena na matu sharin ya ai hte lata la na matu a’hkaw a’hkang jaw ra ai. Makam masham hta ru jung  ai wa gaw, hpa lam hta mi raitim, myit sumnung shingdi let daw dan lu na rai nga ai. Manaw manang ni a lapran, kahpu kanau shada, dum n’ta kata, u’hpung u’hpawng lapran hta, yawng hpe chyena ya ai, chye myit ai , myit su kunghpan ai wa tai na gaw teng sha rai nga ai. Ndai lam ni hpe kanu kawa ni hkum nan, sharin ya na, grai nan a’hkyak ai rai nga ai.

          Nu Wa ni, lam shagu hta kanu kawa ni gaw kashu kasha ni a a’pawt n’hpang sara rai nga ai hte maren, n’dai shinggyim num/la kanawn mazum lam, san seng san pra ai hte karai kasang a a’mu gun hpai ai lam hte prat a galu kaba, galai shai wa ai lam ni hpe chye da ra nga ai. Dai hpe chyena na matu, tinang hkum nan hka ja la ai the, sharin hpawng ni hta sa lawm sharin la mai ai rai nga ai. Ngwi pyaw ai dinghku hpe gaw de nga ai nu e wa ni e….dinghku pyaw na matu gaw, nan kanu yen kawa a lata kaw rai nga ai. Ma ni hpe gara hku sharin shaga na, gara hku bau maka na ngu ai mung nan a lit nan rai nga ai. Dinghku ngu ai hpe n’tsa lam sha n’mai myit ai. Grai nan lit kaba nga mali ai. Nan kanu yen kawa hkawng yen dinghku lit magam hpe n’chye gun jang gaw, na ga ai mahkawn na zawn, “ shatdi htum pa pyi n’chyang yang hka mat ra sai” ngu ai prat de du mat na rai nga ai. Dai majaw, tsawra ai nu wa ni, lahta de na la sai lam yan ni hpe myit dum let, dinghku hpe sharai lajang la nga ga ngu n’gun jaw dat n’ngai law.

 

Ka Lajang ai; Mama Rose Angeline Maran Nang Doi.

                         Myitkyina, RVC Ginjaw Rung.

Add new comment

5 + 2 =

Please wait while the page is loading