Kanu Kawa hpe gara hku tsawra shawang myit ginhtang lu na

Tsawra ai nu wa hpu nau ni anhte kanu kawa hte seng wa jang anhte ni hta myit kraw hta myit ndik ai lam ni hkam sha machyi ai lam ni gaw nga chye ga ai.Tinang kaji ai ten hta kanu kawa sharin shaga ai ten gayet ai hkrum ga ai,kahpu kanau shada lapran hta kanu kawa kaw nna shingdaw tsun ai lam,garan ginhka kanawn mazum ai lam ni hkrum sha na ga ai.Kanu kawa hpe tsawra myit dun ai raitim myit masin hta mchyi ai ngu ai mung anhte masha hkum shagu hta nga chye ga ai.

Dai hkam sha lam ningma ni a majaw kanu kawa hte tsan tsan hta na mayu ai ni mung nga ai zawn,sut masa lam,bungli masa lam a majaw kanu kawa hte tsan ai hta nga ra ai ni mung nga nga ai.Dai hta n ga tinang ningrum hte kanu kawa gaw nhprinem ai majaw kanu kawa hte tsan ai shara hta nga nga ra ai ni mung lawm nga na ga ai.

Anhte gara hku nna sak hkrung nga ai raitim kanu kawa ngu ai gaw anhte prat hta manu dan dik ai hku nna tawn da gring ai ni rai nga ai.Kanu kawa hte kashu kasha ni a lapran manghkang kade mi law law kanu kawa gaw kashu kasha ni a ntsa tsawra shawang myit gaw hten run mat ai ngu nnga ai rai nga ai.

Anhte nkau kashu kasha ni gaw kanu kawa ni hpe prat ndep ai ngu ai ningmu hte nchye na ya lu ai ngu ai myit sawn la ai lam ni hte ahkyak nshatai kanawn mazum ai lam mung nga chye ga ai.Kaja wa nga jang kanu kawa ngu ai gaw prat ndep nchye na ai nga ai raitim kanu kawa ni gaw shanhte danglu dangdep ai daram gaw lit la ya lu nna prat a mahkrum madup grai nga ai ni rai nga ai.Shanhte a prat ting kun dinghku dum nta masha ni a matu ahkyak ai shara hta nga nna bawnba bau maka wa ai majaw anhte prat ram wa ai ten hta kanu kawa  manu dan ai lam hte ahkyak tai nga ai lam hpe masat masa galaw kanawn mazum ra nga ai.

Anhte kanu kawa shagu gaw shanhte a kashu kasha shagu hpe nbung ai hkrang masa amyu amyu hte tsawra makawp maga bawnba ai ni rai nga ai.Dai hpe chyena na nga yang gaw kanu kawa hpe bai nhtang bawnban makawp maga gring ai ngu ai ningmu machye machyang nga ra nga ai.

Anhte nkau kashu kasha ni gaw kun dinghku shang mat sai raitim tinang kan tinang bau nga ra ai re majaw kanu kawa hpe ja gumhpraw hte seng nna nlu madi shadaw lu ni mung nga nga ai.Anhte ja gumhpraw madi shadaw ya nlu ai raitim kanu kawa hpe phone hte matut mahkai ai lam ga shaga ai ten atsawm sha madat ya ai lam,kanu kawa hte ningdang kalang n galaw ai sha kanu kawa hpe chyena ya ai hte kanu kawa a matu aten jaw nna tsawra shawang myit madun kanawn mazum na ahkyak nga ai.

Anhte kanu kawa ni a myit pyaw myit dik lam ni hta kashu kasha ni a tsawra shawang myit hpe mu lu ai lam rai nga ai.Nye a kasha ni kade daram chyena  ya ai, madi shadaw ya ai,tsawra ai ngu ni gaw shanhte a matu arawng la kabu myit dik myit pyaw hpa rai nga ai.

Dai hta n ga anhte nkau ni hta nga ai kanu kawa ni asak ram wa ai ten hta shanhte a shabrang mahkawn ni a ntsa lit la hta ai lam ni nga ai.Kanu kawa ni hku nna dum nta masha ni a ntsa shahpring shazup ya na hpe lit tsang mat wa hkra tinang maga hku nna mung shahpring shazup ya ra nga ai.Dai hpe chyena myit tau ya ai lam ngu tsun mat nga ai.Shanhte kashu kasha ni gaw atsawm akawm kaja ai hku mu chye na ya ai lam nga ai gaw shanhte a matu tsun ndang hkra myit pyaw lam hpe lu shangun ya nga ai.

Dai hta  n ga kanu kawa ni gaw tinang hte tinang dum nta masha ni a matu kahtap nna myit tsampu lam ni nbyin hkra anhte tinang hkum tinang atsawm sha lanu lahku lakawn chye ai lam mung kanu kawa hpe jamjau njaw hkrup hkra nga sa mai nga ai.Kanu kawa ni gaw kashu kasha ni hte seng wa yang  shanhte ra sharawng ai lam langai sha nga ai.

Dai gaw kashu kasha ni tinang lagaw tinang tsap lu nna mungkan prat hpe ma-ap hkrum gwi nna hprinem nga na matu sha rai nga ai.Kashu kasha ni hprinem nga pyaw ai hpe na lu ai gaw shanhte a matu myit pyaw myit dik lam rai nga ai.

Kanu kawa hpe tsawra ai,shanhte hpe myit pyaw shangun mayu jang hprinem hkra nga ra ai,loi loi hte sha asum njaw ga,tinang hkum tinang kam ai myit hpring hte sak hkrung let kanu kawa ni a matu shani shagu tinang kaw nna galaw ya lu ai lam ni nga nga ai.

Anhte shani shagu kanu yan kawa a matu akyu hpyi ga.Anhte myit masin hta kam sham myit kaba akyu hpyi ya ai lam gaw gara wa nan tang du masan sa lu ai lam rai nga ai.Ga shadawn anhte kanu kawa hte tsan ai shara hta nga taw nga ai ni a matu gaw shani shagu kanu kawa ni a matu myit kraw kata kaw nna akyu hpyi ya mai nga ai.

Dai zawn anhte kanu kawa ni a matu akyu hpyi ya ai lam mung tsawra shawang myit ginhtang lu ai lam langai mung rai nga ai.Anhte kanu kawa hte rau nga ai ni gaw kanu kawa hpe ta tut nan gawn lajang lanu lahku na ahkaw ahkang nga nga ai re.Grau kaja ai masa lam ni mung nga yang tsawm sha myit yu nna anhte chyeju madu chyinghkai kanu kawa hpe gara hku nna chyeju htang tsawra myit ginhtang lu na ngu ai hpe atsawm sha galaw lu ai kashu kasha kaja ni byin tai nga ngu tsun n gun jaw dat lu nngai law..