Kaja Ai Ningrum Ningtau Jan Tai Ga

          Ndai Lamang hta gaw kaja ai Ningrum ningtau jan ni koi gam ra ai lam ni hpe tsun garan ya na nngai.Tsawra hkungga ga ai kun dinghku Kanu Num ni e Num hte La ngu ai gaw Num La masat ai hte mung magam bungli gun hpai ra ai dinghku magam hta mung grai shai nga ai re.Galoi mung gaw Kun Dinghku mayaw htinggaw de ai ten gaw Num kasha langai a matu gaw tsawm dik htoi tsawm dik ten rai nga chye nna La kasha a matu gaw dai shaloi she nnan awng dang hpang ai (shing nrai) Prat rawt jat wa hpang ai ten ni byin chye ai re.Dai zawn sha shingra tara hte nga yang Kasha 1,2 lu ngut ai Num ni gaw myi man nsam hte hkum hkrang ni mung hkrat wa maga shang wa ai ten La kasha ni gaw bungli hta hpri nem wa nna prat rawt jat lam de hkawm hpang wa ai ten ni mung byin chye ai re. Dai re majaw kun dinghku ngwi pyaw na matu gaw Ningrum Ningtau jan ni gaw si mani ai hte zen ra ai sai.

Ningrum Ningtau wa hpe  ahkyak shatai chye ra ai.La ngu ai ni gaw tinang hkum tinang myit kaba ai hte masat masa galaw ai hpe hkam mayu ai myit rawng ai ni hkrai rai nga ai.Ndai hpe atsawm chye lang jang tinang a Ningrum Ningtau wa hpe atsawm sha tinang ra ai hku chye hkang la mai nga ai.Dai re majaw Kun Dinghku Kanu Num ni tinang a Ningrum Ningtau wa hpe masha shawng hta myi man hpring hkra jaw dat ra ai.Kalang marang tinang daw dan ra ai lam,tinang dawdan yang ngut ai lam ni raitim tinang a madu wa hkum nan dawdan yang she ngut mai ai zawn re ai hku galaw ya ra ai.Dai rai yang gaw tinang a madu wa mung myit pyaw na sha rai nga ai.

Bai tinang a n gup tinang hting hkang chye ra ai.Tinang a madu wa a shawng hta kaga Dinghku nta masha ni a lam shatan nhkan galaw ai lam hpe koi gam ra ai.Hpa majaw nga yang Ningrum Ningtau Jan ngu ai gaw lata la mai ai.Raitim,Shi a Kanu Kawa ngu ai gaw lata la nmai ai re. Shi Kanu Kawa ni hpe mung tinang a Kanu Kawa zawn hkungga manu shadan ya ra ai.Bai langai sadi ra ai gaw Num ni shagu hta byin chye ai aput angun nga nna ngoi nga ai lam hpe mung koi gam ra ai.Ndai zawn aput angun nga mayaw galu ngoi nga ai daram dinghku hpe jahten ai lam  nnga sai nga nna hpaji ninghkring ni tsun da ma ai re.Dai re majaw tsawra hkungga ai Kun Dinghku kanu ni e mayaw galu aput angun nga nna put taw nga ai lam hpe mung koi gam ra ai.

Bai nna si shat mai shadu chye ra ai.Hpa majaw nga yang tinang a  madu wa a shat hkan hpe hkang da ya lu rai yang masha hpe mung hkang da lu ai nga ai ga mung nga ai.Dum nta hta atsawm sha shadu jaw shadu ya yang kaga de kade mu mai ai mi sha sha masum mali ya nga jang dum nta hta Ningrum Ningtau Jan shadu ai hpe bai myit dum hkra galaw ya ra ai. Anhte Kanu Num ni hta shang gumhpraw kaja ai nkaja raitim bungli langai langai gaw nga ra ai.Kun Dinghku hta shamyet machyu ai ngu ai gaw mying sha hkyem sa tim myit masin gaw nhkyem sa ai re.Tinggyeng bungli nnga yang tsun shaga ai lam yawm wa na, myit ai lam yawm wa na makau grup yin hte kanawn mazum ai lam ni yawm wa nna hkamja lam ni ningra wa  nna matsing ai bawnu ni yawm wa jang gaw tinang a madu wa a tsawra myit mung yawm wa chye ai re. Dai re majaw galoi mung bungli galaw myit sumru ai lam  hte shamu shamawt ai lam ni nga na matu gaw tinang a tinggyeng bungli langai langai nga yang grai hkrak nga ai re.

Manga hta gaw tsawm ai lam hpe manu shadan chye ra ai.Nkau dinghku kanu ni hta byin chye ai dinghku de la lu sai nga nna tsawm htap shakya ai lam nra sai nga nna sawn la chye ma ai.Hkrum mara aboi abya rai nga ai lam hpe koi gam ga.asan apan tsawm htap manu ai hku nga chye ra ai.Hkrum mara anoi abya rai nga ai lam gaw ningrum ningtau wa hpe gau ai hte bung wa chye ai majaw Kun Dinghku Kanu ni atsawm asan apan rai chye nga  hkra shakut nga ai. Mani sum sai alum ala hte nga chye ra ai.Dum nta ngu ai gaw Ningrum Ningtau Wa ai matu shim lum alum ala re ai, ba hkoi machyu nga shara rai nga ai.Dai majaw mani sum sai hte tinang a Ningrum Ningtau Wa dum nta de galoi mung bai wa mayu hkra galaw ra ai.Myi man nsam gaw galoi mung myit ndik ai lam hpe hkrai madun taw nga yang gaw madu wa ni nta kaw nkap chye wa ai re.Kalang marang tinang a Madu wa gaw tinang bungli hte tinang,tinang a kanawn manang hte tinang rai nga chye ma ai.Kalang marang tinggyeng wanglu wang lang rai nga ai lam mung ra ai re.Dai majaw mai byin ai daram gaw dat da ra ai.Raitim hpang hkrat na rai jang gaw shana wa rit yaw nga htet ai lam ni galaw chye ra ai.Bai langai gaw tinang a madu wa gumhpraw tam chye ai wa hpe shi hkum nan jai lang na gumhpraw mung jaw da gring nga ai re.Gumhpraw sumpu hta gumhpraw rawng yang she La ni myiman pa myiman nga chye ma ai re.Madu wa hpe myi man jaw mung chye ra ai.Ningrum ningtau jan  hpe gumhpraw jai na matu jaw da ai rai yang gumhpraw hte seng nna madu wa hpe shagyip ai lam n galaw yang grai kaja ai.Bai nna tinang madu wa hpe ntsen ai zawn rai jahkring hkring jep ai lam ni hpe mung koi gam ra ai.Lit la chye ai Dinghku Kawa gaw galoi mung Dinghku hpe ningshawng da ai hkrai rai nga ai.Dai re majaw tsawra hkungga ai kun dinghku kanu ni e lahta de tsun lai wa sai lam ni  rai nga ai tinang a madu wa hpe ahkyak  jaw chye ai lam,tinang a n gup hpe hting hkang chye ra ai lam,si shat mai shadu chye ai lam,tinang tinggyeng bungli nga ai lam,tsawm htap lam hpe manu shadan chye ra ai lam hte Mani sum sai alum ala rai nga ai lam ni hpe galaw lu ai rai yang anhte a Kun Dinghku gaw ngwi pyaw na sha rai nga ai.

By : John Mung Hkrang