Kaja ai Kanu Kawa tai Ga

Kaja ai Kanu Kawa tai na matu

Tsaw ra hkungga ai Nu Wa ni e Tinang hta kasha La kasha rai rai,Num kasha rai rai nga taw ai tinang a matu kumhpa kaba langai re ngu galoi mung myit dum nga ra ai,     Hpa majaw nga yang kanu kawa ngu ai prat hpe ra ai raitim nlu ai ni law law nga ai re.Dai majaw tinang a kasha gaw kaning re ma raitim Kumhpa langai ngu arawng la chye ra ai re.Kanu Kawa ni hku nna ndai zawn arawng  la ai kaw nna tinang a kasha mung kanu kawa ni a matu arawng la ai myit hkam sha lam ni nga wa na rai nga ai.

Tinang a kasha a arawn alai,atsam marai yup mang ni hpe anhte kanu kawa ni kaw nna hkap la lu na shakut ai rai yang she kaja ai kanu kawa ni tai wa lu na rai nga ai. Tsawra kanu kawa ni e tinang a kashu kasha ni hpe tsun sharin shaga ai shaloi jinghku,manaw manang ni hpaji jaw ai lam ni hpe la gring la ra ai daram sha la nna tinang hkum nan a mahkrum madup hpe  madung da nna anhte a kashu kasha ni hpe tsun sharin shaga ai lam gaw grau kaja nga ai.Hpa majaw nga  yang  kashu kasha         ni hte tinang a lapran kanawn mazum tsun shaga ai lam gaw tinang sha chye dik rai nga ai.Bai anhte kanu kawa ni a shamu shamawt lai kyang ni gaw tinang a ga hta grau kang akyu pru nga ai re.Tinang a kasha ni hpe si mani ai ga hte tsun nna,n gup aga hte sharin shaga ai hta Nang hkum nan mung si mani ai hte tsun shaga chye ai wa rai ra ai. Anhte Kanu Kawa ngu ai ni gaw tinang a kashu kasha ni hpe n htum ai shawang tsawra myit hte tsawra ai ni hkrai rai nga ai.Raitim tsawra chye ra nga ai.Kanu Kawa ngu ai gaw tinang a kasha maga tsap ya ai gaw jaw ai re raitim tinang kasha gaw jaw ai kun? Shut ai kun? Myi di chyip madi shadaw tsap ya ai lam gaw nmai nga ai. Sut su ai,matsan ai hta anhte a kashu kasha ni a myit hta shanhte a prat gaw shim lum ai hte simsa ai prat ngu hkam sha lu hkra Anhte kanu kawa ni nan shakut nan shakut galaw ya ra nga ai.HPawt ni hpa byin na ngu ai hpe myit tsang ra ai prat gaw ma kaji ni hpe sha n ga masha kaba hpe du hkra myit ana hkam sha shangun lu nga ai re.    

By;  John Mung Hkrang                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                     `