Hkum Shatan ( Youth Program )

Hkum Shatan

Dai ni anhte a mungkan hta hkrit hpa lam amyu myu nga ai hta na, shatan nhkan ai lam mung langai mi lawm nga ai. Ndai shatan nhkan ai gaw, anhte a makau grup yin, htingbu hting byen, makin jinghku, manaw manang hta sha n-ga, dinghku kata hta mung, mang hkang chye jaw nga ai re. Ndai shatan nhkan ai gaw, anhte a lapran hta ndan ndawng let sha, nga taw ai hpe anhte ndum shai chye ga ai. Anhte shadu nga ai gaw anhte a myi hte  mu lu ai, hkum hkrang hpe jahten sharun chye ai hpe sha, hkrit ra ai shadu chye ai. Ndai shatan nhkan ai lam gaw hkum hkrang sha n-ga, myit masin hpe mung jahten lu ai rai nga ai. Masha langai hta myit masin gaw ahkyak dik rai nga ai. Myit masin hten yang hkum hkrang hten na loi la nga ai.

Ndai shatan nhkan ai gaw, masha hpe dingbai dingla chye jaw ai, myit daw shangun ai, tsawm htap ai prat hpe jahten kau ya ai sha n-ga, sat kau ya ai du hkra byim pru chye ai. Shatan nhkan ai lam nga ai hte maren, masha a lam tsun jahta ai lam hta kaja ai lam gaw tsun na nrai nga ai. Shakawn ai ga hte shatan ai ga gaw nachying wa shai nga ai. Anhte byim chye ai lam hta manang ni hte hkrum nna mung jahta ai rai yang manang wa a lam nlawm, nshatan rai yang, mung jahta npyaw byim chye ga ai.

Dai shatan nhkan ai a marang e, Wuhpung Wuhpawng shada da, ntsen hkat ai, nju ndawng byim chye nna, ta tut magam bungli ni hta, awng dang ai daram nlu awng dang chye nga ai. Kaga maga mi hku yu ga nga yang, shatan nhkan ai gaw manang wa hpe, manawn masham ai lam re ngu nna mung myit la mai ai. Hpa majaw nga yang, anhte gaw tinang myi sai nhtuk ai wa hpe grau chye tsun nga ai. Grau nna gaw, manang wa byim ai zawn tinang nbyim, manang wa chye ai zawn tinang nchye, manang wa lu ai zawn tinang nlu rai yang e, shanhte chye ai hpaji hpe shakawn na malai, shatan kau chye ai. Bai nna manang wa myit ru myit tsang, jam jau jam hkau hkrum ai ten, mang hkang ni hkrum ai ten, manaw manang htingbu htingbyen ni yu kaji da hkrum ai ten hkan e, shan hte hpe n-gun jaw garum la na nmyit nna, n-gun mi alu tsun chye, shatan chye ga ai. Anhte langai hpra dum chye ra ai lam gaw, dai hku shatan kau dat ai a marang e anhte hta kaja ai akyu nhkam sha ai hta n-ga, tinang hkum dai mara tawt lai ai hte tinang shatan kau ai zawn tinang hta mung nhtang byim wa chye ai.

Shatan nhkan ai lam nbyim na matu, Wasarabyim Francis mung ja ja shadum nga ai. Wa Sarabyim tsun ai hta, “ anhte kaw na kadai mung shatan nhkan ai hpe koi yen na myit daw dan ai rai yang, hpang jahtum anhte san seng ai ni byim wa na” nga nna tsun da nga ai. Matut nna wa sarabyim francis tsun da ai hta, “ shatan nhkan ai gaw hkrit tsang hpa rai nna, masha langai a mying kaja ai lam, arawng sadang hpe mung sat kau lu ai hta n-ga, nnan e gaw kaja na zawn, masha hpe mani hpa, pyaw hpa, zawn rai nna, hpang jahtum e gaw, anhte a masin salum hta ahkup ahkap byim chye the, gung mung byim wa chye ai’’ nga nna tsun da nga ai.

Dai majaw anhte a prat, manaw manang, htingbu hting byen, makin jinghku hta myit machyi shangun ai, jahten sharun chye ai, shada ntsen na lam byim chye ai ni hpe koi yen nna, shada tsawra makyit sumri dun let, tsawm htap ai, manu dan ai hku hkawm sa let, karai kasang a tsawra dik ai kashu kasha ni byim tai lu hkra shakut hkawm sa wa ga.

#crd.bropeterlabunawsan

#youthprogram

#rvakachinservice

#aungnanmyitkyina