Dinghku manghkang hpe mahtai tam ai hta kaja dik lam gaw shada da madat ya hkat ai lam rai nga ai

Anhte shani shagu hta shinggyim mayak mahkak lam ni law law nga nga ai.Ndai lam ni hta na langai rai nga ai dinghku manghkang mung lawm nga ga ai re. Ndai dinghku manghkang hpe mahtai tam ai hta kaja dik lam gaw madat ya ai lam rai nga ai.Hpa majaw nga yang madat ya ai kaw nna tinang a ningrum a ntsa chye na myit tau ya lu ai lam ni nga wa na sha rai nga ai.Ningrum a myit kraw kata hta nga ai myit masa lam ni hpe chye na jang she tinang hte ningrum a lapran manghkang ni byin wa yang mung gara hku nna hparan lu na ngu ai lam ni hpe chye wa lu na sha rai nga ai. Ningrum a shani shagu na lam ni,manghkang lam ni hpe tsun dan taw ai ten tinang kaw na tsun mayu ai lam hpe jahkring lat la ai gaw kaja nga ai.Ningrum tsun ai hpe madat dat ai gaw shi hpe chye na ya lu ai sha n ga tinang hte ningrum a lapran na mahtai tam nlu ai manghkang ni hpe mung hparan lu ai mahtai ni mu chye wa lu nga ai.

Bai nna langai tsun ai hpe langai wa kaw nna myit lawm hkum lawm hte madat ya ai lam gaw hkungga manu shadan ai lam mung rai nga ai.Madat ya ai lam na wa jang gaw garan hkam sha ya mung chye wa nga ai.Anhte shinggyim masha yawng ngu na daram gaw tinang tsun ai hpe madat ya ai wa hpe ra chye ga ai re.Tinang a Madu jan madu wa kaw nna tinang hpe myit lawm hkum lawm rai madat hkam sha lawm ai rai yang nra ai kadai mung nnga na rai nga ai.Dai hku nre ai sha langai wa tsun taw nga ai ten Sara galaw nna ga tsun numdaw ai rai yang tinang a ningrum kaw nna hpang kalang bai tsun chyawm tsun shinggan de tinang hpa byin yang byin tsun na gaw raw chye pyi nchye shagun mat na sha rai nga ai.Myit rum myit pu nga ai ten aput angwi nga guk ai nsen gaw kadai nkam madat nga ai,myit lawm hkum lawm hte madat ya nna hparan lam rai yang kaja ai hpaji ni jaw na hparan ya nlu ai manghkang ni rai jang mung rau sha hkrum lai di rai nna tsun shaga kanawn mazum na grai ahkyak nga ai.Anhte a dinghku ngwi pyaw simsa na matu gaw tinang a myit masa lam hta sha madung rai nga ai.Bai Madu jan Madu wa shada da hku hku hkau hkau ga shaga hkat ai lam nnga ai mung kun dinghku hpe hkra machyi shangun ai lam mung rai nga ai.

Bai nna kun dinghku kanu kawa ni e tinang a tsawra myit hpe ningrum a ntsa gara hku madun dan lu na tsawra ai ngu ai hte sha gaw nngut nga ai .Tinang a tsawra myit hpe ta tut nan mung hkrang shapraw dan ra ai.Gara hku hkrang shapraw na nga yang madu jan madu wa shada da ningrum wa pyaw hkra tawn da ai gawn lajang lanu lahku ai lam ni galaw ya ra ai.Bai nna ningrum a mayak lam ni hkam sha lam ni hpe rau jawm jahkrum hkam sha bawngban lawm ai hpaji jaw ai lam ni galaw ya na grai ahkyak nga  ga ai.Bai langai a myit ra sharawng lam hpe madi shadaw garum ya ai lam ni ningrum hku nna sha nre manaw manang kaja zawn mung tsap ya ra ai. Tinang ningrum wa hpabaw galaw ai bungli hta gaw kaja ai kun myit lawm hkum lawm hte shada garum hkat na ahkyak nga ai.Tinang ningrum myitru tsampu ten shi tsun ai hpe atsawm sha madat ya ai ahkyak shatai ya ai lam gaw anhte madu jan madu wa lapran grai nan ahkyak nga ai re.Anhte a kun dinghku hpe makawp maga ai,tam jaw bau maka ai lam ni hpe manu shadan hkat ai hte chyejum hkat ai lam mung kun dinghku hta madu jan madu wa lahkawng yan hpe myit pyaw lam jaw lu nga ai.Tinang a ningrum a ntsa myit praw san seng ai hte kamhpa manoi hkat ai gaw kun dinghku hpe ngwi pyaw lam jaw ya lu nga ai.

By; John Mung Hkrang