Dinghku hta Dum Nta Masha Ni Rau Jawm Mung Jahta Chyai Ai Ten Mung Nga Ra Ai

Dinghku hta dum nta masha ni rau jawm Mung jahta chyai ai ten mung nga ra ai

Anthe kanu kawa tai ai ni gaw dinghku a matu galoi mung myit sawn sumru let kalang marang dinghku nta masha ni nmyit mada ai pyaw hpa lam ni hpe mung galaw yang mung kaja nga ai.Bai nna mani hpa pyaw hpa ni mung tsun chyai ga.Mani ai ngu ai gaw ja gumhpraw njaw ra ai tsi kaba langai rai nga ai.Hkamja lam a matu ahkyak ai zawn dinghku kata kanawn mazum lam,makau grup yin manaw manang ni hte kanawn mazum lam hta mung alum ala rai ni htep ai hku hkau lam ni hpe mung lu la mai nga ai re.Bai nna tsawra kun dinghku kanu kawa ni e anhte a kasha ni hpe shakawn shagrau ai ga n gun jaw ai ga hte kumhpa jaw ai zawn re lam hpe mung galaw ya na matu ahkyak nga ai re.Dai hta sha n ga madu jan madu wa shada mung shakawn shagrau ai n gun jaw ai zawn re lam galaw ai rai yang gaw lahkawng yang grau grau ni htep ai shada manu shadan hkat ai lam ni hpe lu la na rai nga ai.Bai nna madu jan madu wa a lapran,dum nta masha ni a lapran hte makau grup yin manaw manang ni hte tsun shaga ai shaloi chyeju kaba sai ngu ai ga hpe tsun chye na mung grai nan ahkyak nga ai re.Kun dinghku de ai na wa jang Madu jan madu wa shada tsun na matu malap kau grai ahkyak ai ga hkum mi gaw grai tsawra ai ngu ai ga hkum rai nga ai.Ndai ga gaw dinghku de ai kade mi na tim tinang a madu wa madu jan wa grai tsawra ai ngu ai ga hkum gaw grai naw manaw dan ahkyak nga ai re.Ndai ga hkum tsun ai hta sha n ga lai len lai kyang hte mung madun na ahkyak nga ai.Dai majaw tsawra hkunga kun dinghku kanu kawa ni dai ni kaw nna gaw tinang a madu jan madu wa hpe grai tsawra ai ngu kalang sha gaw tsun yu ga .Lak lai atsam marai lu na re.Bai ndai zawn kanu yan kawa tsawra manu shadan hkat ai hpe mu lu ai kashu kasha ni gaw knu yan kawa tsawra myit hkrum nga ai hpe chye lu ai hte shim lum simsa shingwang kaw nga pyaw ai hpe hkam lu nna nna shanhte myit ni mung simani wa na rai nga ai.Tsawra ai dinghku kawa ni anhte gaw myit su myit kup ai dinghku la kun dum nta masha ni yawng a kam hpa shamyet lu ai kawa kasi kaja tai lu ai kawa tai hkra shakut nga ga.Tinang a tsawra nja ningrum ningtau jan hpe tinang grai tsawra ai sumtsaw jan zawn,Manang kaja langai zawn tsawra ga,tinang a prat manang rai sai majaw si mani ai hte tsun shaga manu shadan hkungga ga,Tinang a hkum hpe tsawra ai zawn tinang a madu jan hpe mung tsawra manu shadan nga ga.Dinghku num ni gaw tinang a madu wa tinang hpe tsawra ai sha n ga kam ai hpe hkrang shapraw madun dan yang grai myit n gun lu la nna madu wa hpe grau tsawra myit kap wa na rai nga ai.Tinang a myit n gun atsam hte tinang a madu jan/madu wa dum nta masha ni myit pyaw hkra ra kadawn ai hpe grau mu mada chye galaw chye wa hkra shakut nga ga.Bai nna kun dinghku kanu num ni e kaja ai kyet htap ai sam nang maka kap ai dinghku num tai lu na matu akyu law law hpyi ra ai.Tinang a madu wa ga madat hkungga nga ga.Dinghku kata tinang a madu wa hte kashu kasha ni nga pyaw hkra magam bungli galaw ai lam, tsun shaga kanawn mazum ai lam hta dingku kanu gaw grai nan ahkyak nga ai re.Ngwi pyaw simsa nga pyaw ai kun dinghku byin tai wa lu na gaw Kang ka ai dinghku kanu,akyu hpyi shaja ai kanu,simani ai lai kyang hte kanawn mazup chye kanu kashu kasha ni a kam hpa shara,kaja ai lam hta woi sharin shaga lu kun dinghku kanu tai lu hkra shakut nga ga. Tsawra ai kun dinghku kanu kawa ni anhte Madu wa/jan shada tsawra manu shadan hkat ai dinghku,makam masham lam hta akyu hpyi shakut ai dinghku gaw galoi mung ngwi pyaw ai dinghku byin tai nga lu na rai nga ai.

By: John Mung Hkrang