Anhte A Shawnglam Myit Mada Shara Kashu Kasha Ni A Prat Shimlum Hkra gawgap Ya Ga (2)

           Dai ni na rawt jat galu kaba lawan ai prat hta anhte kanu num ni mung magam bungli galaw shang ai ni grai nga wa nga ai.Dai re majaw anhte kanu kawa lahkawng yan nan bungli galaw ra ai majaw anhte kashu kasha ma ni hpe aten hpring jaw lanu lahku lakawn lanawn ai lam ni nlu galaw wa ai hpe mu lu ga ai re.Anhte Kanu Kawa ni kade mi nrau ai nga tim tinang a kashu kasha Ma ni hpe aten jaw lakawn lanawn ai lam gaw galaw nan galaw ya nga ga ai.Hpa majaw Kashu kasha Ma ni hpe aten jaw ahkyak la lakawn lanawn ra ai nga yang anhte kanu kawa ni a ahkyak la lakawn lanawn ai lam gaw Ma ni a myit hpe shimlum shangun ai hta sha n ga hkum hkrang lam hta mung tinang hkum tinang kam hpa manoi ai lam lu shangun nna zet let ningtawn ai kashu kasha ni byin shangun nga ai.Myit masa lam hta mung daw dan ai lam hta mung gwi gwi hte asan sha dawdan lu ai n gun rawng ai Ma ni byin tai shangun lu nga ai.

           Bai nna kanawn mazum lam hta mung grau nna kaja wa ai zawn sharin hkaja la ai lam hta mung grau nna myit maju jung lu nga ai majaw anhte kanu kawa ni kashu kasha ni hpe lakawn lanu lahku ra ga ai.Anhte Kanu yan kawa a lanu lahku pawn ba ai lam hpring hkra nlu ai Ma ni  a bawnu bawngring rawt jat galu kaba ai lam myit sumru nchyan shaw ai atsam hta n gun yawm ai lam asak aprat hta hkan nna  mayak mahkak hkrum sha chye nga ai.Ndai mayak lam ni hpe anhte kanu kawa ni rau sha jawm hparan ya na mu ra nga ai.Kanu kawa a lakawn lanawn pawn ba ai lam n gun yawm ai Ma ni hta mayak mahka lam ni hpe hparan lu ai atsam yawm wa nna bawnu  bawngring rawt jat ai lam hte myit sawn sumru ai atsam ni yawm wa jang gaw hpaji sharin ai lam hta mung n gun yawm ai hpe mu lu ga ai re.Bai Kanu Kawa ga nmadat ai sha jasam zawn rai nga ai,kanawn mazum lam hta anyak wa chye ai, tinang kam ai hku nga sa galaw sa wa chye nga ai.

            Kanu Kawa a lakawn lanawn ai lam yawm ai Ma gaw shana yup npyaw ai manghkang ni hkam sha chye nga ai.Yup npyaw ai ten na wa jang gaw hpaji sharin hkaja ai lam hta mung ningra wa na sha rai nga ai.Anhte Kashu Kasha ni hta mung asak aprat hta hkan nna mayak mahkak lam ni amyu myu nga nga ai.Anhte Kanu Kawa ni lanu lahku lakawn ai lam nnga wa jang shanhte hta nga ai mayak lam ni myit htum myit ru lam ni byin wa chye nga ai.Ndai zawn byin wa jang gaw shanhte hta myit npyaw ai lam,kadai hte mung nhkrum hkam ai,koi yen ai,ga nmadat ai lam ni matut manoi byin wa chye nga ai.Dai majaw tsawra hkungga ai kanu kawa ni anhte a kashu kasha ni hpe aten jaw nna shanhte a mayak lam ni myit hkam sha lam ni hpe madat ya ra nga ai.Bungli hkring ten  bungli pat ten Kru ya Laban shani hkan anhte kashu kasha ni hpe aten hpring jaw let rau hkawm chyai ai,rau ginsup ai,gat rai mari ai Muk galaw sha ai,shana maga bungli hkring ten hta rau shat jawm sha mung jahta chyai ai zawn re ni galaw let anhte shawnglam myit mada shara,kashu kasha ni a prat tsawm htap nga pyaw shim lum lam lu la hkra galaw let anhte a dinghku hpe gaw de sa wa ga.

By; John Mung Hkrang