Anhte Kashu Kasha Ni Hpe Tsawra Matsan dum Myit Tau Chye Na Ya Ai Lam Hpe Sharin Ya Ra Ai

Tsawra hkungga ai nu wa hpu nau ni e  Ma ni a myit hta langai ngai hpe myit manoi myit jung  ai lam sharin ya ai lam hpe mung anhte koi gam ra ai ngu mu mada ai.Myit manoi myit jung hkra sharin ya ai ngu ai lam hta tsun mayu ai gaw kaga gaw nrai nga ai ga shadawn  hpun nba nga yang mung laksan,kaga arung arai nga yang mung laksan hte nga sa wa aten ni na wa jang gaw anhte a kashu kasha Ma ni gaw shanhte a ting gyeng arung arai ni hpe myit manoi taw ai,myit jung taw ai lam ni lawm wa na rai nga ai.Dai rai yang shanhte kaba wa prat ram wa ai ten hta manaw manang ni hte gam garan lang nchye jai lang mat na sha rai nga ai.

Gam garan kajan jai lang ai ngu ga si hpe nchye na mat nna maji ai ting gyeng gyip ai myit masin hpe myit manoi taw ai maju jung taw ai lam ni byin ai Ma ni tai wa na rai nga ai.Dai majaw tsawra hkungga ai nu wa hpu nau ni tinang kashu kasha ni hpe laksan rai nga shangun mayu ai raitim kaning re ai  masa lam hta gara hku nga ra ai,gara hku jai lang ra ai ngu ai lam hpe gaw atsawm sha tsun sharin yang grau nna kaja na re ngu mu mada ai.Gam garan jai lang mai ai lam ni hpe mung tsun sharin da yang grau nna kaja na rai nga ai re.Bai nna gaw tsawra nu wa ni e anhte  Kashu kasha  Ma ni hpe tsawra matsan dum tau chye na ya ai lam ni hpe mung anhte a kashu kasha ni hpe tsun sharin shaga lam madun galaw dan ai lam mung ahkyak nga mali ai re.Ma kaji shagu gaw tsawra matsan dum chye ma ai.

Tsawra hku hkau chye ai myit mung rawng nga ai re.Dai hpe anhte kanu kawa ni grau nna chye na matsan dum hku hkau chye ai myit masin hpe tawn da chye hkra galaw ya ra ai.Anhte kashu kasha Ma ni hpe myit kaja tawn da chye na matu, masha kaga ni hpe myit dingbai dingna jaw ai rai yang tinang hkum nan mung myit npyaw hkam sha ra ai lam hpe chye na lu ai ladat ni hpe tsun sharin dan ra ai.Myit tau chye ai,chye na ya ai myit ngu ai gaw tinang nra ai hpe kaga masha hpe n galaw ai sha n ga masha kaga ni nra ai hpe kadai hpe mung n galaw hkrup hkra tawn ra ai myit masa hpe mung tsun sharin ya na grai ahkyak nga ai re.Ndai zawn myit tau chye ya ai myit masa tsawra shawang myit hte matsan dum garum shingtau chye ai myit masa kyang lai len ni hpe da sang nan sharin ya ra ai.Dai rai yang she anhte kashu kasha ma ni gaw kaba wa ten myit masa kaja ai tsawra shawang myit hte hpring zup ai hku kaga masha ni hpe kanawn mazum tsun shaga lu  nna kaja ai prat hta hkawm sa let awng dang lu na sha rai nga ai.Anhte Kashu kasha ma ni myit sumnung shingdi simani ai hte kaba wa lu na matu gaw anhte kanu kawa ni a lit kaba nan rai nga ai.

By : John Mung Hkrang